LECTURAS DEL LUNES PRIMERO DE ADVIENTO

LECTURAS DEL LUNES PRIMERO DE ADVIENTO

Ko’ágã ñahendúta Tupã Ñandejára ñe’ẽ Isaías arandukápe oĩ háicha   2, 1-5

Isaías Amós ra’y ohecha va’ekue, Judá ha Jerusalén guigua. Ojehúta ára ko’ẽ ramo guápe: Yvyty oĩ háme Tupã Ñandejára Róga, yvyty kuéra ru’ãme opyta hatãta ha opa ite yvytýgui ijyvatevéta. Opa tetã hese oñembyatýta.

Heta tetã he’íta oúvo: “Jaha jajupi Tupã Ñandejára yvytýpe, Israelgua Tupã Rógape, ohechaukáta ñandéve hape, ha hape rupi jaguatáta.”

Sióngui osẽta Ñandejára rembiporavopy Jerusaléngui katu iñe’ẽ.

Tupã Ñandejára ombojovakéta tetã nguérape, joavy oĩva tetã nguéra rupi ha’e omoĩ porãta, umi tetã mombyryve oĩvape jepe.

Kyse pukúgui ojejapóta yvy mbovoha, ha kyse yva vukúgui machéte.

Ndaipóri mo’ã véima ñorairõ, avavépe noñembo’e mo’ãi mba’éichapa oñorairõ va’erã.

Néike, Jacob rogaygua!

Jaguata katu Tupã Ñandejára ohesapeha rupi!

Tupã Ñandejára Ñe’ẽ.

En el año A, cuando esta lectura se lee en el domingo primero de Adviento, en su lugar puede leerse, la siguiente:

Habrá gran alegría para los sobrevivientes de Israel

Ko’ágã ñahendúta Tupã Ñandejára ñe’ẽ Isaías arandukápe oĩ háicha  4, 2-6

Upérõ, pe Tupã Ñandejára omoheñóitava, iporã ha omimbipáta, umi Israélpe oikovévape guarã.

Umi opytáva Siónpe ha hembýva Jerusalénpe, oñembohérata marangatúva ha ojehaíta hérakuéra umi oikovéva apytépe. Tupã Ñandejára ojohéi rire, Siongua kuña nguéra ky’akue, ha omopotĩ rire tuguy Jerusalén pegua, teko joja pytúpe ha yvytu akúpe opa ha’e mba’e ohapýta, opa yvyty Sión jere kuévo, ha umi ñemboatyha rupi, Tupã Ñandejára ojapóta arakue, arai iñypytũva ha tata rendýpe pyharekue ohesapéta.

Hi’ári, Tupã Ñandejára reko mimbipa omo’ãta ichupekuéra kuarahy aku, ama ha ára pochýgui.

Tupã Ñandejára Ñe’ẽ.

SALMO ÑEMBOHOVÁI   121, 1-2. 4-9

Opavave: Vy’ápe jaha tupaópe

¡Avy’a ite chéve oje’e ramo: “Jaha tupaópe”!.

Ore py opyrûma hína ne rokẽma Jerusalén. O.

Upépe ojupi ñemoñare, Israel ñemoñareguakuéra,

Ñandejára réra omomba’e guasúvo, apoukapy ramo Israélpe.

Upépe oguapy mburuvicha guasu David rogaygua,

teko jojápe oporombojovake haguã. O.

Peñembo’e pejévo: “Py’a guapýpe to jeiko Jerusalénpe,

kyhyje’ỹme toiko umi nde rayhúva.

Py’aguapy toĩ upe táva ryepýpe, ha mburuvicha guasu rógape.” O.

Che pehẽnguenguéra ha umi che irüme,

ajeruréta: “Py’aguapy toĩ pende pype.

Tupã Ñandejára róga rehehápe, ahekáta ndéve guarã vy’a.” O.

ALELUIA Sal 79, 4

Aleluia.

¡Ore apo jevy, Tupã ñorairöha Jára,

to mimbi nde rova ha roñepysyrõta!

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha  8, 5-11

Upe ramo Jesús oikévo táva Cafarnaúmpe, peteĩ mburuvicha Romagua oñemboja hendápe. Ojerure Jesúspe oipytyvõ haguã ichupe he’ívo: Karai, che rembiguái niko oime ógape. Ijapa paite ha oñeno hasyete.

Jesús he’i: Aháta amonguera ichupe.

Pe ñorairõhára ruvicha katu he’i: Karai, máva piko che, nde reike haguã che rógape? Eréntena okuerataha, ha che rembiguái okueráta. Che niko aĩ mburuvicha poguýpe, ha areko avei che poguy pegua. Ha peteĩme ha’érõ oho haguã, upéva oho. Ambuépe ha’érõ ou haguã, upéva ou. Ha ha’érõ che rembiguáipe ojapo haguã ha’éva, ojapo.

Jesús ohendúvo upéva tuicha oguerohory, ha he’i umi hendive oĩvape:

Añetehápe ha’e peẽme, Israelguakuéra apytépe jepe ndajuhúiva péicha ite peve ojeroviáva Tupã Ñandejárare. Ha ha’eve peẽme: Heta oĩ oúta kuarahy resẽ guio ha kuarahy reike guio ha oguapýta mesápe Abraham, Isaac ha Jacob ndive pe karu guasúpe oikótava Tupã Ñandejára oporosãmbyhy vove yvágape.

Ñandejára Jesucristo Ñe’ẽ.