LECTURAS DEL MARTES 05 DE NOVIEMBRE

LECTURAS DEL MARTES 05 DE NOVIEMBRE

Primera lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe

12, 5-16a

Che pehẽnguekuéra:

Ñande, ñande reta ramo jepe, peteĩnte Cristo ndive, ha jajoaju ojuehe, peteĩ rete rehegua ramo.

Tupã Ñandejára niko ome’ẽ va’ekue ñandéve ñande katupyry haguã peteĩ mba’épe, ome’ẽse haguéicha ñandéve. Upévare, Tupã Ñandejára ñane mbokatupyry rire japoromo marandu kuaa haguã, ñañe’ẽ va’erã upe mba’e jaroviávare. Ha ñane mbokatupyry rire ñaipytyvõ haguã ñande rapichápe, ñaipytyvõ porã va’erã. Upe oñembokatupyry va’ekue oporombo’e haguã, to porombo’e. Pe oñembokatupyry va’ekue oporomokyre’ỹ haguã, to poromokyre’ỹ.

Ome’ẽva, to me’ẽ ojejapo’ỹre, omba’apóva tembiapo hasyhápe, to mba’apo hekópe. Pe oipytyvõva umi oikotevẽvape, to ipytyvõ vy’ápe.

Pejoayhúke añetehápe. Pembotove ivaíva ha peñemboja iporãvare. Pejoayhu oñopehenguéicha, peñombojerovia ha peño momba’e.

Peñe ha’ãke ani pene ate’ỹ, ha pemba’apo Ñandejárape guarã akã rakúpe.
Peikove vy’ápe, umi mba’e peha’arõvare. Peropu’aka py’a guasúpe umi pehasa asyha. Aníke araka’eve peheja pene ñembo’e.

Pereko pene mba’érõ umi Tupã Ñandejára mba’éva remikotevẽ. Pemoguahẽ porãke pene mbohupápe.

Pehovasa umi pene muñávape. Pehovasa ha ani peja’o vai ichupe kuéra.
Pevy’a umi ovy’áva ndive, ha pene rasë umi hasẽva ndive.
Peiko peñorairõ’ỹre ambue kuéra ndive. Ani pejejapo, peñe moĩ uvei umi heko mirĩva ykére. Ani peñe moarandu.

Tupã Ñandejára Ñe’ẽ.

SALMO ÑEMBOHOVÁI 130, 1-3

R. Che Jára, ndaha’éi ku añemo ha’enteséva

Che Jára, ndaha’éi ku añemo ha’enteséva,
térã amoĩva che resa mba’e tuichávare.
Ndaha’éi yvate eterei aguahẽséva,
térã aipotáva mba’e hendape’ỹ, ndahupytýiva. R.

Che ajoko umi che mba’e pota,
ku mitã okambu vaicha aiko py’a guapýpe.
Péicha oï che ánga che ryepýpe.
Israel! ejerovia Ñandejára rehe ko’ágä ha opa ára. R.

ALELUIA Mt 11, 28

Aleluia.
Ñandejára Jesucristo he’i:
“Peju che rendápe maymave pejepy’apy ha pene kane’öva,
che ambovevúita peëme.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?

14, 1a. 15-24

Upe ramo pe pytu’uha árape Ñandejára oho peteĩ fariséo rógape okaru haguã.
Peteĩ oguapýva hína upe mesápe, he’i Jesúspe: Ovy’a ite va’erãpa pe okarúva Tupã Ñandejára oisãmbyhyhápe.

Jesús he’i ichupe: Peteĩ karia’y ojapo peteĩ karu nde tuicháva ha omondo ojerurévo hetápe oho haguã okaru. Ojekarúta jave omondo hembiguáipe he’ívo ichupe kuára: ‘Peju, karurã oĩmbáma.’ Ha upépe peteĩ teĩ oñepyrũ he’i ndaikatu mo’ãiha oho.

Pe tenondegua he’i: ‘Péina ajogua ramo peteĩ yvy, ha aha va’erã ahecha. Ehecha kuaamína chéve.’ Ambue katu he’i: ‘Ajogua niko 5 joyvy guéi, ha aha va’erã ahecha oikópa. Ehecha kuaamína chéve.’ Ha ambue he’i: ‘Amenda ramo niko ha ndaikatu mo’ãi aha.’

Upe tembiguái ojevy ha omombe’upa ijárape. Ha’e ipochy, ha he’i hembiguáipe: ‘Tereho pya’e pe okáre ha eru ko’ápe umi imboriahúvape, umi oĩmba’ỹva, umi ohecha’ỹva ha umi iñepãvape.’ Kurive rire upe tembiguái he’i: ‘Che jára, ajapóma pe ere va’ekue chéve, ha heta rendaguã gueteri oĩ.’

Aipórõ, ijára he’i upe tembiguáipe: ‘Tereho umi tape rupi ha umi óga jerére ha emoaña rejuhúvape oike haguã, ta henyhẽ che róga. Ha’e peẽme, mavavete umi ojejerure ypy va’ekuépe ou haguã okaru, ndokaru mo’ãi che mesápe.’

Ñandejára Jesucristo Ñe’ẽ.