LECTURAS DEL LUNES 04 DE NOVIEMBRE

LECTURAS DEL LUNES 04 DE NOVIEMBRE

Primera lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe

11, 29-36

Che pehẽngue kuéra:

Tupã Ñandejára ome’ẽva ndoipe’ái, ha ndoheja reíri oporohenói ramo. Yma peẽ na pene ñe’ẽ rendúi va’ekue Tupã Ñandejárape, ha ko’ágä judío kuéra naiñe’ẽ rendúiva, Tupã Ñandejára pende poriahuvereko.

Upéicha ite avei, ko’ágä naiñe’ẽ rendúi ha’e kuéra, ha upéva Tupã Ñandejára pende poriahuvereko haguãnte, ha ko’ágä avei, oiporiahuvereko haguã ichupe kuéra. Tupã Ñandejára oñapytĩ va’ekue opavavépe iñe’ẽ rendu’ỹ haguã, oiporiahuvereko joja haguã peteĩcha opavavépe.

Tuicha ite mba’e piko umi mba’e Tupã Ñandejára oguerekóva, ha pe iñarandu ha iñakã porãngue! Avave ndaikatúi omoesakãvo mba’épa ha’e ojapóta, ha oikuaávo hape kuéra. “Máva piko oikuaa Ñandejára akã ryepy? Máva piko oñemoñe’ẽta ichupe? Mávapa omba’e ome’ẽ raka’e ichupe, ha’e ko’ágä omoengovia haguã?” Opa mba’e ou Tupã Ñandejáragui, ha oĩ ha’e rupi ha ichupe guarã. To jererohory opa ára Tupã Ñandejárape! Amén.

Tupã Ñandejára Ñe’ẽ.

SALMO ÑEMBOHOVÁI 68, 30-31. 33-34. 36-37

R. Tupã Ñandejára ojapysaka imboriahúvare.

Tupã Ñandejára, che niko vaípe ajejopy.
Eju che pytyvõ ha che pe’a ko jejopy vaígui.
Tupã Ñandejára réra aropurahéine.
Amoherakuãne ha’e tuichaha. R.

Imboriahúva ohecha ha ovy’a,
ikyre’ỹne umi Tupã Ñandejára rehe ojeroviáva.
Tupã Ñandejára ojapysaka imboriahúvare,
ha nomboykéi umi iñapytĩmby oikóva. R.

Tupã Ñandejára oguenohẽne Siónpe upe ojejopy vaihágui,
ha táva kuéra Judápe oĩva omopu’ãmba jeýne.
Upépe oikóne hikuái ha oñemomba’éne upe yvýre,
umi héra ohayhúva oikóta ipype. R.

ALELUIA Jn 8, 31b.32a

Aleluia.
Ñandejára Jesucristo he’i:
“Ndape mboykéi ramo che ñe’ë, peikóta añetehápe che remimbo’e ramo ha peikuaáta pe añetegua”.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?

14, 1. 12-14

Upe ramo peteĩ pytu’uha árape Ñandejára oho pe kuimba’e ojerure va’ekue ichupe oho haguã okarúvo hógape: Rejapóvo peteĩ jekaru, asaje térã pyhare, ani rejerure oho haguã ne irũ nguérape, térã nde ryvy ha nde ryke’y kuérape, ha opa nde róga guápe ha nde róga ykeregua imba’e retávape. Ha’ekuéra ojeruréne avei ndéve reho haguã, ha upéicha omoengoviáta ndéve hikuái.

Rejapo ramo karu guasu, ejerure uvei oho haguã upe karuhápe umi imboriahúvape, umi oĩmba’ỹva ha iñepãvape, umi ohecha’ỹvape, ha revy’áta. Umíva niko ndaikatu mo’ãi ohepyme’ẽ ndéve. Ndéve katu oñemoengoviáta opavave hekojojáva oikove jevyha árape.

Ñandejára Jesucristo Ñe’ẽ.