LECTURAS DEL SÁBADO 02 DE NOVIEMBRE

LECTURAS DEL SÁBADO 02 DE NOVIEMBRE

Primera lectura:

Ñahendúta Tupã Ñandejára Ñe’ẽ San Pablo ohai va’ekue Roma guápe                                             

  11, 1-2a. 11-12. 25-29

Che pehẽnguekuéra:

Ko’ágä  aporandu: Oiméne piko Tupã Ñandejára omboyke ra’e ijehegui hetã guápe? Nahániri katu! Che voi niko Israelgua, Abraham ñemoñare, Benjamín ñemoñare atygua. Iñepyrũha guive, Tupã Ñandejára oguereko va’ekue  Israelgua kuérape hetãgua ramo. Ha ko’ágä  ndojahéiri hese. Ndapeikuaái piko peẽ Tupä Ñandejára ñe’ë  he’iha, maranduhára Elías rekovekue oñemombe’uhápe, ha’e omoĩ vai hague Israélpe Tupãme oñembo’évo? Ha’e he’i va’ekue:

Ko’ágã aporandu: Oiméne piko umi judío, oñepysãngávo ho’apa ite ra’e? Nahániri upéva! Upéva rangue, umi judío naiñe’ë  rendúivo, umi judio’ỹva ikatu oñepysyrõ, Israelgua kuéra ipochy haguã. Aipórõ, umi Israelgua ñepysãnga ha iñesë vai, ogueru rire mba’e porã ko yvy tuichakuépe umi judio’ỹvape, mba’épa ndoguerúi chéne ojeheko moatyrõ vove umi judío!

Che pehẽnguekuéra, aipota peikuaa ko Tupã Ñandejára mba’e guasu ete, ani haguã peiko peñe moarandu. Israelgua ñembopy’a hatã nda opa ára guarãi, upéva oikóta umi Israelgua’ỹva retakue oñemoaguĩva Tupã Ñandejárare, ohupity pe ha’e oipota háicha. Ágä upéva ojehúvo, Israel tuichakue oñepysyrõta.

Tupä Ñandejára ñe’ẽ niko he’i: “Pe oporopysyrõva Sióngui oúta ha omboykéta Jacóbgui teko aña.

Ha ame’ẽ ichupEkuéra che ñe’ẽ aipe’ataha hembiapo vaikuégui.” Judío kuéra nohenduséi marandu pyahu, ha upéva he’ise opu’ãha Tupã Ñandejárare, peẽ judio’ỹva peñemoĩ porã haguã. Ha opáichavo Tupã Ñandejára ohayhu gueteri ichupe kuéra, ha’e oiporavo rupi ijypy kuerakuépe. Tupã Ñandejára ome’ẽva ndoipe’ái, ha ndoheja reíri oporohenói ramo.

Tupã Ñandejára Ñe’ẽ.

SALMO ÑEMBOHOVÁI                 93, 12-13a. 14-15. 17-18

R. Tupä Ñandejára ndahesarái mo’ãi hetãguágui.

Ore Jára, ovy’a ite va’erãpa upe nde reheko mbo’éva,

upe ne rembiapoukapýpe remo arandúva.

Py’a guapýpe remoingóne ohasa asy rire,

heko vaívape ojejo’o aja ijyvykuarã. R.

Tupä Ñandejára ndahesarái mo’ãi hetãguágui,

ndoheja mo’ãi ha’eño umi imba’évape.

Teko joja ojehecha jevýne ñembojovakehápe,

ha umi imarangatúva ojapóne hekojojáva. R.

Tupä Ñandejára na che pytyvõi rire,

omanóva ohohápema kirirĩháme aĩ va’erã mo’ã.

Añandúvo che pysyrýitaha ne mborayhu che mombarete che Jára. R.

ALELUIA Mt 11, 2ab

Aleluia.

Ñandejára Jesucristo he’i:

“Pemoï pende apére che mba’e pohýi ha peikuaa che hegui,che chepy’aguapy ha korasö oñemomichï.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                 

                                 14, 1. 7-11

Upe ramo peteĩ pytu’uha árape, Jesús oho okarúvo peteĩ fariséo ruvicha rógape. Ha okáguio umi fariséo oma’ẽ ñemi hese.

Jesús ohechávo, umi ohóva okarúvo oiporavoha oguapy haguã umi oñembojeroviavéva oguapyhápe, oñemoñe’ẽ ichupe kuéra kóicha:

Reñehenóirõ peteĩ ñemenda karu guasuhápe, ani reguapy pe iñakãme. Cháke ikatu oguahẽ peteĩ mba’e guasuvéva nde hegui, ha pe óga jára pene renói va’ekue  mokõivépe, ikatu ou he’i ndéve: ‘Eme’ẽ ne renda amóvape’. Aipórõ rehóne ñemotĩme reguapy pe ipaha itépe. Reñehenóirõ karuhápe eguapy uvei pe ipaha itépe, ikatu haguã pe ne renói va’ekue  ou he’i ndéve: ‘Che irũ, ehasa peteĩ iporãvehápe.’ Upéicharõ, oñemoengoviáta ndéve umi oguapýva ne ndive mesápe, ne renondépe. Pe oñembotuicháva oñemomichĩta, ha pe oñemomichĩvape oñembotuicháta.

Ñandejára Jesucristo Ñe’ẽ.