LECTURAS DEL MARTES 4º DE CUARESMA

LECTURAS DEL MARTES 4º DE CUARESMA

PRIMERA LECTURA

Ko’ágä ñahendúta Tupã Ñandejára ñe’ẽ Ezequiel arandukápe oĩ háicha         47, 1-9. 12

Pe karia’y che reraha jevy upe rire pe tupaópe ojeikehápe. Upépe ahecha pe okẽguy rupi osẽha y, ha osyryha kuarahy resẽvo, oma’ẽha gotyo tupao. Pe y oguejy tupao akatúavo, altar yvy gotyo pegua gotyo. Upéi che renohẽ okápe yvate gotyogua okẽ rupi ha che mbojere ojeikeha okavogua peve, pe opytáva kuarahy resẽvo. Upépe ahecha y osẽha pe ojeikehágui yvy gotyo. Pe karia’y osẽ kuarahy resẽvo, oha’ã 500 métro, ha che mbohasa pe ysyry.

Y oñuãmba che py. Upéi oha’ã jevy 500 métro ha che mbohasa pe ysyry; y oguahẽma che renypy’ã meve. Oha’ã jevy 500 métro ha che mbohasa mboypýri; upépe katu, y ohupitýma che ku’a. Oha’ã jevy 500 métro, ha pe ysyry ndaikatu véima ahasa; oiko ichugui  peteĩ ysyry nde rypýva, jaytahápe mante ikatúva jahasa. Upépe he’i chéve: “Ema’ẽ porãke rehecha va’ekuére”.

Upéi che mbojevy pe ysyry rembe’ýre. Ha ahecha mokõive hembe’ýpe oĩha heta yvyra. Upépe he’i chéve: “Ko y osyry kuarahy resẽ gotyo ha oguahẽ ysyry Jordán peve, upégui oho oñehẽ yguasu hérava Mar Muértope. Oguahẽvo upépe, pe yguasu nahe’ẽ juky mo’ã véima. Mamo oguahẽháme pe ysyry ikatúta oiko ipype opaichagua pira ha ijerére katu opaichagua tymba. Ko y kóva omohe’ẽta y iróva ojuhúva hapépe, ha opáichavo oĩta oikovéva.

Pe ysyry rembe’ýpe opu’ãta opaichagua yvyra hi’áva. Umi yvyra rogue ndo’a mo’ãi araka’eve, ha opa ára hi’áta. Ohasávo peteï jasy jepi hi’áta. Opa ára hi’y porãta pe ysyry osẽvagui tupao guive. Yva oĩta oje’u haguã ha yvyra rogue pohãguã.”

Tupã Ñandejára Ñe’ẽ.

SALMO ÑEMBOHOVÁI       45, 2-3. 5-6. 8-9

Opavave: Tupä Ñandejára ipu’akapáva oĩ ñane ndive.

Tupã Ñandejára ñane mo’ã ha ñane mombarete,

ha’e oñangareko ñande rehe jajejopy vai jave.

Upévare ndajakyhyje mo’ãi, ko yvy oñehundi ramo jepe

ha umi yvyty ho’a ramo yguasu ruguápe. O.

Upe ysyry hakãmbýva ogueru tory Tupã távape,

upe Yvatetegua rekoha marangatúpe.

Tupã Ñandejára oiko ipype, ndo’ái chéne araka’eve.

Ko’ẽ vove ha’e oúne oipytyvõ ichupe. O.

Tupã Ñandejára ipu’akapáva oĩ ñane ndive.

Upe ñane mo’ãva hína Jacob Tupã.

Pejúke pehecha Tupä Ñandejára rembiapokue,

mba’e hechapyrãva niko ha’e ojapo ko yvy apére. O.

VERSÍCULO ANTES DEL EVANGELIO Sal 50, 12a. 14a

Tupã che Jára emoĩ che pype peteĩ korasõ ipotĩva,

ha eme’ẽ jevy chéve vy’a nde che pysyrõre.

EVANGELIO

Marandu porã Ñandejára Jesucristo rekove ha hemimbo’e San Juan omombe’u háicha   5, 1-3a. 5-18

Upe ramo Judíokuéra arete guasu jave, Jesús oho Jerusalénpe. Jerusalénpe, pe okẽ hérava Ovecha ypýpe, oĩ peteĩ y renda hebréo Ñe’ẽme hérava Betzatá, ha hogaguy jeréva. Heta hasýva opaichagua oñenomba pe ogaguýre.

Umíva apytépe oĩ peteĩ kuimba’e ojapóma 38 áño ijapa hague. Jesús ohechávo ichupe upépe oñeno, ha oikuaávo aréma péicha oiko hague, he’i ichupe: Rekuerasépa.

Pe kuimba’e he’i ichupe: Karai, ndarekói niko avave che moinge haguã pe ýpe, upéva oñemongu’e vove. Añeha’ãvo aike haguã, oĩma itenondéva che rehe.

Jesús he’i ichupe: Epu’ã. Ehupi nde rupa ha tereho.

Upepete voi pe kuimba’e okuera, ohupi hupa ha oñepyrũ oguata. Pytu’uha ára upe jave, ha judío kuéra moakãhára kuéra he’i ichupe: Pytu’uha árape niko ñaime. Ndaikatúi eraha nde rupa.

Pe kuimba’e katu he’i ichupe kuéra: Upe che monguera va’ekue niko he’i chéve kuri: ‘Ehupi nde rupa ha tereho.’

Ha’ekuéra oporandu ichupe. Ha máva he’i ndéve: ‘Ehupi nde rupa ha tereho?’

Pe kuimba’e katu nde’i kuaái mávapa omonguera ichupe. Jesús niko okañýma umi upépe oĩva apytépe. Upéi, Jesús ojuhu pe kuimba’épe Tupaópe, ha he’i ichupe: Rekueráma niko ko’ágã. Eñeha’ã anive haguã ne rembiapo vai, ani ágã upe haguére ojehu ndéve mba’e ivaivéva.

Pe kuimba’e oho umi judíokuéra moakãhára kuéra rendápe ha omombe’u ichupekuéra Jesús hague pe omonguera va’ekue ichupe. Ha Jesús ojapo haguére ko’ã mba’e pytu’uha árape, umi judío moakãhárakuéra oñemoĩ hese. Jesús katu he’i ichupekuéra:

Che Ru niko ndopoíri hembiapógui, upévare che avei amba’apo.

Ko’ã ñe’ẽ rehéma katu umi judío moakãharakuéra ko’ýte ojukase Jesúspe. Ohecha hikuái Jesús nomboareteiha pytu’uha ára, ha hi’ári, oñembojoja Tupã Ñandejára ndive, he’ívo ituvaha Tupã Ñandejára.

Ñandejára Jesucristo Ñe’ẽ.