LECTURAS DEL MIÉRCOLES 29 DE ENERO

LECTURAS DEL MIÉRCOLES 29 DE ENERO

Primera lectura:

Ko’ágä   ñahendúta Tupã Ñandejára ñe’ẽSamuel arandukápe oĩ háicha                                         7, 4-17

Tupã Ñandejára katu upe pyharépe voi oñe’ẽ Natánpe, ha he’i ichupe: “Tereho ere che rembiguái Davídpe ko ha’eukáva ichupe: ‘Na nde mo’ãi pe remopu’ãtava chéve óga aiko haguã. Egíptogui anohẽ guive Israel guápe ko’ágä  ite peve, ndaikói va’ekue tupaópe araka’eve, óga vakapi pénte aiko va’ekue. Aiko aja ijapytépe kuéra, ndajeruréi va’ekue mavave tendotápe che amoĩ va’ekue Israel sãmbyhyhárõ, omopu’ã haguã chéve óga porã.

Upévare ere che rembiguái Davídpe che, Tupä Ñandejára ipu’akapáva, ha’eukaha ichupe: Che roguenohẽ va’ekue nde ovecha kuéra korágui, ovecha rapykuéri reikohágui, reiko haguã che retã Israel ruvichárõ. Romoirũ va’ekue mamo rehoha rupi, ahundi opa nde rehe ija’e’ỹvape, ha romoherakuã va’ekue umi karai guasu kuéra herakuã guasu háicha ko yvy ári.

Upéi ave, ambosako’i va’ekue che retãgua Israel rendaguã ha upépe amohenda ichupe kuéra oiko haguã henda teépe, ikatu’ỹ haguãme avave omyangekói ichupe kuéra, térã umi mba’e vai apoha oguereko asy ichupe kuéra ymave guaréicha, amoĩrõ guare tendotakuéra oisãmbyhy haguã Israel guápe.

Che roipe’áta opa nde rehe ija’e’ỹvagui. Ha che ha’e ndéve, che ame’ẽtaha ndéve ne ñemoñarerã. Opa vove nde rekove ko yvy ári ha remano, amoĩta peteĩ ne ñemoñare ne rendaguépe ha amohendáta ichupe nde guapyhápe. Ha’e omopu’ãta chéve peteĩ tupao ha amohatãta ichupe iguapyhápe opa árape guarã.

Che itúvata ha ha’e che ra’ýta. Hembiapo vaírõ ainupãta ichupe, túva oinupã háicha ta’ýrape, ha ndajei mo’ãi ichugui , ajei haguéicha Saúlgui. Ichupe che amosẽ va’ekue romoĩ haguã hendaguépe. Nde rogagua ha nde retãre añangarekóta ha nde guapyha avei oĩ hatãta opa árape guarã.’ Natán omombe’u opa ko’ã mba’e Davídpe, ohecha ha ohendu hagueicha ite.

Tupã Ñandejára Ñe’ẽ

SALMO ÑEMBOHOVÁI  88, 4-5. 27-30

R. Tupã Ñandejárape ahayhúne opa ára

Che ame’ẽ va’ekue che Ñe’ẽ che rembiporavópe.

Kóicha ha’e va’ekue che rembiguái Davídpe:

“Ne ñemoñare ndopa mo’ãi araka’eve, ha’ekuéra mburuvicha guasúta ojoapykuéri nde rire”. R.

He’íne chéve ha’e: ‘Nde hína che ru, Tupã che Jára che renohéva jejopy vaígui ha reñangarekóva che rehe.

Ajapóta ichupe che ra’y ypykue, mburuvicha guasu tuichavéva yvy ári. R.

Ichupe ahayhúne opa ára, che ñe’ẽ ichupe ame’ẽva rehe

napyrũi chéne, iñemoñare hendaguépe oguapýne opa ára yvága oiko aja. R.

ALELUIA Cf. Mt  11, 25

Aleluia.

Romomba’e guasu che Ru, yvy ha yvága Jára,

reikuaauka hague mba’e guasu ete Sambyhy rehegua naiñarandúivape.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       4, 1-20

Upe ramo Jesús oñepyrũ oporombo’e jevy yguasu rembe’ýpe. Hetágui umi oñemboatýva Jesús jerére, ojupi ha’e ha oguapy peteĩ kanóape, ha opavave opyta pe y rembe’ýpe. Upe guive ha’e oñe’ẽ ichupe kuéra heta mba’ére, ha oiporu ñe’ẽ mbojoja omoesakã haguã ichupe kuéra pe he’iséva.

Oporombo’évo, he’i ichupe kuéra: “Pehendu kóva: ‘Oĩ va’ekue peteĩ osẽva oñemitỹ haguã. Ha omosarambívo pe oñotỹséva ra’ỹi, oĩ ho’áva umi tape ojeguataha rupi ha ou guyra kuéra ha ho’upa. Oĩ avei ho’áva itatýpe, yvy ipokãháme. Umíva voi heñói, ipererĩgui pe yvy. Kuarahy ojopévo katu ohapypa, ha ndahapo pypukúigui ipirupa. Oĩ avei ho’áva ñuatĩndýpe, ha umi ñana okakuaávo ojaho’ipa ha ojuka. Oĩ katu avei ho’áva yvy iporãháme ha upépe hi’a heta. Oĩ hi’áva 30, oĩ hi’áva 60, ha oĩ hi’áva 100”.

Upéi he’i Jesús: “Ohendúvake tojapysaka porã.”

Upéi, Jesús opytávo ha’eño, umi oĩva ijypýpe umi 12 apóstol ndive, oporandu mba’épa he’ise upe Ñe’ẽ mbojoja. He’i ichupe kuéra: “Tupã Ñandejára niko oikuaauka peẽmente umi mba’e guasu ete Tupã Ñandejára sãmbyhy rehegua.

Umi okápe oĩvape katu ojekuaauka ñe’ẽ mbojoja rupi, oma’ẽ ma’ẽve ramo jepe ani haguã ohecha, ha ohendu henduve ramo jepe ani haguã oikuaa, ani ágä ojevy Tupã Ñandejára gotyo ha ha’e oheja rei ichupe kuéra iñangaipa.”

He’i ichupe kuéra: “Nahesakãi piko peẽme ko mbojoja? Aipórõ piko mba’éicha hesakãta peẽme umi ambue? Pe oñemitỹva hína pe omoerakuãva upe ñe’ẽ. Oĩ ojoguáva pe mba’e ra’ỹi ho’a va’ekue tapépe: ohendu upe Ñe’ẽ ha ou Satana ha oipe’a pe ñe’ẽ ipy’apýpe oñeñotỹ va’ekue.

Oĩ ojoguáva upe ho’a va’ekue itatýpe: ohendu umi Tupä Ñandejára ñe’ẽ ha vy’apópe ogueroguahẽ, ha ndahapo pypukúigui ndopyta hatãi ipype kuéra.

Upévare, oiko asy térã ojejopy vai ramo oguerovia haguére pe ñe’ẽ, pya’e ojei ichugui. Umi ojoguáva mba’e ra’ỹi oñeñotỹva ñuatĩndýpe, umiva hína umi ohendúva pe ñe’ẽ. Ha’ekuéra katu ojepy’apy umi mba’e yvy arigua rehénte voi, ha mba’eta rerekose ombotavyete ichupekuéra.

Ko’ã mba’e ojaho’i ha ojuka pe ñe’ẽ, ha upévagui ndaikatúi hi’a. Umi oñeñotỹva yvy porãme katu ojogua umi ohendúva pe ñe’ẽ, ha oikuaa porãva mba’épa he’ise. Upéi hi’a porã, oĩ hi’áva 30, oĩ hi’áva, 60 ha oĩ hi’áva 100 peteĩgui.”

Ñandejára Jesucristo Ñe’ẽ