LECTURAS DEL MIÉRCOLES 9 DE OCTUBRE

LECTURAS DEL MIÉRCOLES 9 DE OCTUBRE 

Primera Lectura

Ko’ágä   ñahendúta Tupã Ñandejára ñe’ẽ Jonás arandukápe oĩ háicha      

                                   3 10; 4, 1-11

Ohecha Tupã Ñandejára umi mba’e Ninivegua ojapóva. Ohecha ohejaha hikuái heko vai. Upévare nohundíri ichupe kuéra he’i haguéicha ojapotaha.

Jonás oñemyrõ ha ipochy ko’ã mba’ére. 

Ha oñembo’e Tupä Ñandejárape kóicha: 

Tupä Ñandejára, che niko aikuaa porã va’ekue  voi asẽ mboyve aikohágui kóicha rejapotaha. Upévare voi añeha’ã va’ekue  aha akañy Tarsíspe. Aikuaa Tupã Ñandejára nde ne mba’e porã ha reporohayhuha, ha hasýpe nde pochýva. Nde reporohayhu etereígui nde rejapói voi hembiapo vaívare upe eréva rejapotaha. Upévare Tupä Ñandejára eipe’a che hegui che rekove. Iporãve ningo amano mba’e kóicha aikove rangue. 

Ha Tupä Ñandejára he’i ichupe: Mba’ére piko péicha nde pochy? 

Ha osẽ oho Jonás upe távagui. Oho oñemohenda kuarahy resẽ gotyo. Upépe omopu’ã peteĩ oñemo’ã haguãme kuarahýgui. Oguapy iguýpe ha oha’arõ ohecha haguã upe ojehútava Nínivepe. Upe marõ Tupã Ñandejára omoheñói peteĩ mba’ysyvo máta omo’ã haguã Jonáspe kuarahýgui, oñeñandu porãve haguã. Kóva tuicha ombovy’a Jonáspe. Ko’ẽvo katu Tupã Ñandejára omondo peteĩ yso okarúva upe mba’ysyvo mátare, ha ombopiru. Kuarahy opu’ãvo, Tupã Ñandejára ombou kuarahy resẽguio peteĩ yvytu raku ombopy’a ropútava Jonáspe. Kuarahy katu haku tini iñakãre ha ho’áta katu ete hese pytũ. Jonás he’i ipy’apýpe: “Iporãve ningo amano mba’e kóicha aikove rangue”. 

Tupã Ñandejára katu he’i ichupe: Mba’éicha rupi piko nde pochýta upe mba’ysyvo mátape ojehu va’ekuére? 

He’i ichupe Jonás: Ha mba’ére piko nda che pochy mo’ãi? Pochýgui amano pota aína! 

Upe marõ Tupä Ñandejára he’i ichupe: Ko mba’ysyvo máta ningo heñói ha okakuaa peteĩ pyharépe, ha ko’ẽmbávo omano. Nde ndaha’éi imoheñói térã iñangarekohare ha ko’ágä  rembyasy imano. Mba’éicha piko aipo ramo che, na che mandu’a mo’ãi Nínive rehe? Upe táva tuicha itépe niko oĩ amo 120.000 rupi oikóva ha oikuaa’ỹva ivaíva ha iporãva. Upépe heta avei mymba kuéra. 

Tupã Ñandejára Ñe’ẽ.

SALMO ÑEMBOHOVÁI                                  85, 3-6. 9-10

R. Tupä Ñandejára ne mborayhu nda ijojahái

Che poriahuvereko kena Tupã Ñandejára, 

ndéve ajerure asy ára pukukue. 

Che mbopy’a rory Tupã Ñandejára,

 ne rendápe che ñembo’e amoguahẽ. R.

Tupã Ñandejára, nde niko ne mba’e porã 

ha reheja rei oréve ore rembiapo vaikue. 

Ne renyhẽ mborayhúgui umi ne momba’évape guarã. 

Háa Tupã Ñandejára, ehendu che ñembo’e. R.

Ejapysaka ko ndéve ajerure asývare, Ore Jára, opa tetã niko ne rembiapokue, oúne oñesũ ne renondépe ha ne momba’e guasúne hikuái, nde tuicha ha rejapógui mba’e hechapyrãva. 

Nde añónte niko Tupã ore Jára. R.

ALELUIA.        Rom 8, 15b, 

Aleluia. 

Oñeme’ë va’ekue peëme ta’ýranga espíritu 

he’iukáva ñandéve Tupä Ñandejárape ¡Abbá!, ¡ore Ru!.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?

                                                                 11, 1-4

Peteĩ jevy Jesús oñembo’e hína peteĩ hendápe. Oñembo’epávo, hemimbo’e peteĩ he’i ichupe: Ore Jára, ore mbo’éna roñembo’e haguã, Juan ombo’e haguéicha hemimbo’e kuérape. 

Jesús he’i ichupe kuéra: Peñe mbo’évo, peje: 

Che Ru to ñemomba’e nde réra marangatu. 

Eju ore sãmbyhy, ko’ẽ ko’ẽre kena eme’ẽ oréve ore rembi’urã.

Eheja rei oréve ore angaipa, ore roheja rei háicha opavave ore rehe ojapo vai va’ekuépe. 

Aníkena rehejátei rojepy’a ra’ã! 

Ñandejára Jesucristo Ñe’ẽ