LECTURAS DEL MARTES 8 DE OCTUBRE

LECTURAS DEL MARTES 8 DE OCTUBRE 

Primera Lectura 

Ko’ágä   ñahendúta Tupã Ñandejára ñe’ẽ Jonás arandukápe oĩ háicha      

                                                3, 1-10

Oñe’ẽ jevy Tupä Ñandejára Jonáspe ha he’i ichupe kóicha: Tereho upe táva guasu ete Nínive héravape ha eikuaauka ichupe kuéra upe che ñe’ẽ ame’ẽva ndéve. 

Ha ojapo Jonás Tupä Ñandejára ojerure háicha ichupe. Nínive niko peteĩ táva nde tuichapa jepéva mbohapy árape ojeguatáva peteĩ hembe’ýgui ambue hembe’y peve. Ha Jonás oguahẽ upe távape. 

Upe oguahẽha árape oguata upe távare ha he’i umi upépe guápe: Ko ára guive 40 ára haguépe Nínive oñehundíta. 

Umi Ninivegua oguerovia Tupä Ñandejára Ñe’ẽ. Ha ohechauka haguã oñembyasyha hembiapo vaígui, oĩ haguéicha, imboriahúva ha imboriahu’ỹva ndo’uvéi mba’eve ha oñemonde ao vosakuépe. Nínive ruvicha guasu ohendúvo ko’ã mba’e, oheja iguapyha, oipe’a ijehegui ijao jegua, omonde ao vosakue ha oguapy tanimbu apytépe.

Ha ojekuaauka umi Nínive guápe ñe’ẽ oúva mburuvicha guasu ha umi mburuvicha iguýpe oĩvagui ha he’íva kóicha: “Avave to’u’ỹ mba’eve; opavave Ninivegua ha hymba kuéra anítei ho’u mba’eve térã hoy’u. Opavave to ñemonde ao vosa kuépe ha upéicha avei to monde hymba kuéra. Opavavete to ñembo’e ipy’a ite guive Tupã Ñandejárape ha to heja heko vai ha hembiapo vai. Ikatu mba’e niko upéicha Tupã Ñandejára oheja rei ñandéve ñane rembiapo vaikue, ndaipochyvéi ñane ndive ha nañamanói.” 

Ha ohecha Tupã Ñandejára umi mba’e Ninivegua ojapóva. Ohecha ohejaha hikuái heko vai. Upévare nohundíri ichupe kuéra he’i haguéicha ojapotaha. 

Tupã Ñandejára Ñe’ẽ.

SALMO ÑEMBOHOVÁI                       129, 1-4. 6c-8

R. Ajerovia Tupä Ñandejára rehe

Amo ipypukuve hágui niko ndéve añembo’e che Jára. 

Che Jára, che rendu mína. 

Ejapysaka porã che rehe, 

ejapysaka che rembijerurére. R.

Ne mandu’átarõ ore rembiapo vaikuére, 

piko máva oñemoĩta ne renondépe? 

Nde katu reheja rei oréve ore angaipa 

ikatu haguã ndéve romomba’e. R.

Ha’e niko pe centinélaicha oha’arö ára pyahu.

Imborayhu niko na iñambuéiva, 

ha jejopy vaígui ha’e ñane renohẽta. 

Ha’e oheja reíta Israélpe opa iñangaipa. R.

ALELUIA                                           Lc 11. 28

Aleluia. 

Ovy’ a ite niko umi ohendu ha 

ojapóva Tupä Ñandejára ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                         

                       10, 38- 42

Upe ramo Jesús oipykúi hape ha oguahẽ peteĩ táva’ipe, ha upépe omoguahẽ ichupe hógape peteĩ kuña hérava Marta. Ha’e oguereko peteĩ ikypy’y hérava María, oguapýva Jesús ypýpe ohendu haguã umi he’íva. 

Marta katu, oikóva hína heta hembiapo reheve, oñemboja Jesús rehe ha he’i ichupe: Che Jára, na nde py’apýipa che kypy’y che rejaha cheño ko tembiapo heta ite reheve? Ere ichupe ta che pytyvõ. 

Jesús katu he’i ichupe: Marta, Marta, rejepy’apy heta iterei mba’ére, ha peteĩ mba’énte tekotevẽ. María ojapyhy pe iporãvéva, ha avave ndoipe’a mo’ãi ichugui . 

Ñandejára Jesucristo Ñe’ẽ