LECTURAS DEL LUNES 7 DE OCTUBRE

LECTURAS DEL LUNES 7 DE OCTUBRE

Primera Lectura

Ko’ágä   ñahendúta Tupã Ñandejára ñe’ẽ Jonás arandukápe oĩ háicha   

                                       1, 1-2, 1. 11

Oñe’ẽ Tupã Ñandejára Jonáspe, Amitai ra’ýpe ha he’i ichupe kóicha: Tereho upe táva guasu ete Nínive héravape ha eikuaauka ichupe kuéra aikuaapamaha umi hembiapo vaikue. 

Jonás katu oho rangue Nínivepe, oñemomombyry ichugui. Ha okañy haguã Tupã Ñandejáragui oho táva Jópepe. Upépe ojuhu peteĩ ygára guasu osẽmbotáva Tarsíspe ha opaga ha ojupi ipype, oimo’ãgui upépe okañytaha Tupã Ñandejáragui. Tupã Ñandejára katu ombou peteĩ yvytu ratã ha upe y ipochy etereígui ha’ete vaicha ku ho’yguýta va hi’ygára kuéra. Umi marinéro oñemondýigui oñemoĩ oñembo’e peteĩ teĩ itupãme, umíva oipytyvõ haguã ichupe kuéra. Upéi opoi hikuái ýpe umi mba’e oguerekóva ombovevýi haguã hi’ygára. Upéva aja katu Jonás oguejy ra’e ygára ryepýpe ha hatã oke. 

Umi marinéro kuéra ruvicha ojuhu ichupe upépe ha he’i: Ha nde piko ko’ápe reke reína? Epu’ã eñembo’e ne tupãme. Ikatu ha’e imandu’a ñande rehe ha nañamanói. 

Umi marinéro he’i ojupe: Jaity po’a jaikuaa haguã máva rupípa ko’ã mba’e ojehu ñandéve. 

Upéicha ojapo hikuái ha ojuhu Jonás rupiha. Ha he’i ichupe hikuái: Emombe’u oréve mba’ére ojehu oréve ko’ã mba’e. Mba’e apoha ha mba’e tetãgua piko nde? 

Ha he’i Jonás: Che ningo hebréo ha amomba’e Tupä Ñandejárape, Tupã yvágape guápe. Ha’e ojapo va’ekue  umi y ha ko yvy. 

Kóva ohendúvo tuicha oñemondýi hikuái ha he’i joa ichupe: “Mba’éiko ko rejapóva!” Jonás omombe’u ichupe kuéra ha’e okañyha Tupä Ñandejáragui. 

Upe y katu ipochy pochyvénte. Upe marõ oporandu Jonáspe hikuái: Ko yvytu opi haguã piko mba’e rojapo va’erã nde hegui? 

Jonás he’i ichupe kuéra: Che rupi ha che mombo ýpe ha opytu’úta ko y pochy. Aikuaa che rupi ho’aha pende ári ko yvytu ratã. Umi marinéro katu oñeha’ã ome’ẽ háicha oñemboja haguã upe y rembe’y rehe; ha yvytu ko’ýte oipeju hatãvégui mamove ndohói hikuái. 

Upe marõ oñemoĩ oñembo’e hikuái Tupä Ñandejárape he’ívo: Ani ore rundítei kóva ko kuimba’égui roipe’áta haguére hekove. Ani emboja ore rehe mba’eve, oimérõ rojukáta ore rapichápe ojapo’ỹ va’ekue  mba’eve ivaíva. Tupä Ñandejára, ko’ã mba’e ningo ojehu nde upéicha reipotágui. 

Upéi ohupi hikuái Jonáspe, omombo ichupe ýpe ha opytu’u upe y pochy. Umi kuimba’e ohechávo upéva opyta ojerovia Tupä Ñandejára rehe. Omoguahẽ ichupe imba’e kuave’ẽ ha ome’ẽ ichupe iñe’ẽ ojapotaha ha’e oipota háicha. 

Tupä Ñandejára katu omondo peteĩ pira guasu omokõ haguã Jonáspe. Ha Jonás oĩ upe pira guasu ryepýpe mbohapy ára ha pyhare. Upéi Tupä Ñandejára he’i upe pirápe oity haguã Jonáspe y rembe’ýpe. 

Tupã Ñandejára Ñe’ẽ.

SALMO ÑEMBOHOVÁI                       Jon 2, 3-5. 8

R. Ajejopy vai jave rohenói Ñandejára, ha nde che rendu. 

Ajejopy vai jave rohenói Tupä Ñandejára,  

ha Nde che rendu. 

Omanóva ohoha ruguágui asapukái 

ha nde rehendu che ñe’ẽ. R.

Che mombo niko y ipypukuvehápe, 

ha upépe aĩ aja umi y che aho’i, 

opavave umi y ha umi

ypochy opu’äva che ári ohasa. R.

Upe marö ha’e che py’apýpe:

añemosẽha mombyry ne renondégui, 

ha che katu ama’ë meme jevýnte 

nde Tupao marangatúre. R.

Añandu ramo ojehekýiha che hegui che rekove, 

añembo’e ndéve, Tupä Ñandejára. 

Che rembijerure oguahẽ ne rendápe,

 nde tupao marangatúpe. R.

ALELUIA. Jn 13, 34

Aleluia. 

Ame’ë peëme peteï tembiapoukapy pyahu:

pejoahu ojoapytépe, Che pohayhu haguéicha.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?    

                                                             10, 25-37

Upe ramo peteĩ Moisés rembiapoukapy mbo’eha oho oñe’ẽ Jesús ndive, ha oha’ã haguã ichupe oporandu: Mbo’ehára, mba’e piko ajapo va’erã areko haguã jeikove opa’ỹva? 

Jesús he’i ichupe: Mba’épa oĩ tembiapoukapýpe? Mba’e piko pehecháva kuatiápe? 

Upe Moisés rembiapoukapy mbo’eha he’i: Ehayhu Tupã nde Járape ne nde py’a ite guive, ne ánga rugua guive ha opa ne arandukue reheve, ha ehayhu nde rapichápe rejehayhu háicha nde. 

Ha Jesús katu he’i: Ere porã, rejapórõ upéicha, reikovéta. 

Pe tembiapoukapy mbo’eha katu, omoĩ porãsévo imba’e porandu, he’i Jesúspe: Ha máva piko pe che rapicha? 

Aipórõ Jesús he’i ichupe: Peteĩ karia’y oguata ohóvo Jerusalén rapéguio Jericó gotyo, ha peteĩ mondaha aty ohape joko ichupe, ha oipe’a ichugui  ijao peve. Oinupã hikuái ha oheja ichupe omano ha nomanóime. Peichahágui rei peteĩ pa’i ohasa upe rupi, ha ohechávo ichupe ojere ichugui  ha ohónte ha ndopytái. Peteĩ levíta avei oguahë upépe, ha ohecha vove, ojere ichugui  ha ohónte avei tenonderã. 

Peteĩ kuimba’e Samariagua katu, ohóva hína upe tape upévare avei, ohechávo oiporiahuvereko ichupe. Oñemboja hese, oipohano ñandyry ha vínope ha ojokua ichupe umi ojekutu hague rupi. 

Upéi ohupi ichupe ikavaju tee ári, ogueraha peteĩ óga ojepytahápe ha oñangareko hese. 

Upe riregua ko’ẽme, upe Samariagua oguenohẽ mokõi ára mba’apokue repy ha ome’ẽ upe óga járape, ha he’i ichupe: Eñangareko ko karia’ýre. Ndohupitypáirõ viru, che ahepyme’ẽta ndéve upéi ajevývo. 

Ha néi, mávapa ko’ãvagui, ndéverõ guarã pe karia’y rapicha, ohape joko va’ekue  umi mba’e vai apoha? Upe Moisés rembiapoukapy mbo’eha he’i: Pe oiporiahuvereko va’ekue  ichupe. 

Jesús katu he’i ichupe: Néi, tereho ha ejapo nde ave upéicha. 

Ñandejára Jesucristo Ñe’ẽ