LECTURAS DEL JUEVES 3 DE OCTUBRE
3 octubre, 2019LECTURAS DEL DOMINGO 6 DE OCTUBRE
5 octubre, 2019LECTURAS DEL SÁBADO 5 DE OCTUBRE
Primera Lectura
Ko’ágä ñahendúta Tupã Ñandejára ñe’ẽ Baruc arandukápe oĩ háicha 4, 5-12. 27-29
Néike, che retãgua, peẽ rupi oiko mandu’a Israel rehe.
Peñe me’ẽ va’ekue hepýre tetã ambuépe ndaha’éi peñehundi ete haguã.
Tupã Ñandejárape pembopochy haguére ha’e pende reja pende rayhu’ỹva pópe.
Pembopochy pende Apoharépe pemoguahẽvo añáme pende mba’e kuave’ẽ, pemoguahẽ rangue Tupã Ñandejárape.
Pende resarái Tupã Ñandejára, opa ára oikovévagui, pene mongaru va’ekue .
Pemoñembyasy pende sy Jerusalénpe.
Ha’e ohechávo Tupã Ñandejára pene nupãtaha, he’i: Pehendu táva kuéra che jere rupi peiméva. Tuicha ñembyasy Tupã Ñandejára oity che ári.
Che ahecha mba’éichapa Tupã Ñandejára, opa ára oikovéva, che memby kuéra omondo tetã ambuépe tembiguáirõ.
Vy’apópe amongakuaa va’ekue, tesay syrýpe ahecha oho.
Ani avave ovy’a apytágui mena’ỹre, ha ojepe’a haguére che hegui heta ite che memby. Néike, che memby kuéra, pejerure Tupã Ñandejárape pytyvõ.
Ha’e, pene nupã va’ekue, imandu’a jevýne pende rehe.
Pejetu’u haguéicha, pejei haguã Tupã Ñandejáragui.
Pejere ko’ágä, peñe ha’ãmba ite peheka ichupe.
Ha’e, oity va’ekue pende ári ko’ã mba’e, ha’e pende pe’a jeýne jejopy vaígui, ha pene mbovy’áne opa ára.
Tupã Ñandejára Ñe’ẽ.
SALMO ÑEMBOHOVÁI 68, 33-37
R. Tupä Ñandejára ohendu ombopyahúvape.
Imboriahúva ohecha ha ovy’a,
ikyre’ỹne umi Tupã Ñandejára rehe ojeroviáva.
Tupã Ñandejára ojapysaka imboriahúvare,
ha nomboykéi umi iñapytĩmby oikóva. R.
Yvága, yvy ha umi y
to momba’e Tupã Ñanejárape,
ha opa ipype oikóva
to momba’e Tupã Ñandejárape. R.
Tupã Ñandejára oguenohẽne Siónpe upe ojejopy vaihágui,
ha táva kuéra Judápe oĩva omopu’ãmba jevýne.
Upépe oikóne hikuái ha oñemomba’éne upe yvýre.
Upépe oikóne héra omomba’éva. R.
ALELUIA Cf. Mt 11, 25
Aleluia.
Nde niko hovaspyre, ore Ru, Tupä yvy ha yvága Jára,
hehechauka va’ekue mba’e guasu ete Sambyhy rehegua
umi imichïvévape.
Aleluia.
EVANGELIO
Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?
10, 17-24
Upe ramo umi 72 ou jevy hikuái vy’apópe, ha he’i: Ore Jára, umi mba’epochy jepe ojapo ro’éva nde rérape.
Jesús he’i ichupe kuéra: Upéicha. Che ahecha Satanápe ho’a ramo yvágagui aratirícha. Che ame’ẽva’ekue peẽme pokatu peguata haguã mbói ha alakran apytépe, ha pende pu’aka haguã umi pende rehe ija’e’ỹvare, ojehu’ỹre peẽme mba’eve ivaíva. Anínte pevy’a umi mba’epochy ojapo haguére pejéva. Pevy’a uvei oimemaháre pende réra ojehai yvágape.
Upe javete Jesús henyhẽ Espíritu Santo guigua vy’ápe, ha he’i: “Romomba’e guasu che Ru, yvága ha yvy Jára, reñomi haguére ko’ã mba’e umi iñarandu ha imba’e kuaávagui, ha reikuaauka umi iñarandu’ỹvape. Upéicha che Ru, péichante voi reipota va’ekue ojehu.
Che Ru niko omoĩ che po guýpe opa mba’e. Avave ndoikuaái Tupã Ra’ýpe, Túva añónte. Ha avave ndoikuaái Túvape, Tupã Ra’y añónte, ha umi ojekuaaukávape Tupã Ra’y.”
Ha ojerévo hemimbo’e kuéra gotyo, he’i ichupe kuéra año: “Ovy’a iténe umi ohecháva pe peẽpehecháva hína. Añetehápe ha’e peẽme, heta maranduhára ha heta mburuvicha guasu ohechase va’ekue ko peẽ pehecháva, ha ndohechái. Ha’e kuéra ohenduse va’ekue ko peẽ pehendúva, ha nohendúi.”
Ñandejára Jesucristo Ñe’ẽ