LECTURAS TUPÃSY CAACUPÉ ÁRA

LECTURAS TUPÃSY CAACUPÉ ÁRA

LECTURA PETEÎHA:
Ko’ágã ñahendúta Tupã Ñandejára ñe’ẽ Génesis arandukápe oĩ háicha 3:9-15,20

Upérõ ho’u rire Adán pe yva Ñandejára ohenói chupe ha oporandu: – Mamo piko reime?

Ha’e he’i: – Ahendu reguatáramo yvaty rupi ha akyhyje ajechágui opívo, upévare akañy.

Tupã oporandu chupe: – Máva piko he’i ndéve nde opivoha? Re’u piko ra’e upe yva ha’eva’ekue ndéve ani hagua re’u?

Adán he’i: – Kuña reme’ẽva’ekue chéve che irũrã, ome’ẽ chéve upe yva ha ha’u.

Ñandejára oporandu kuñáme: – Mba’e piko rejapo?

Ha’e he’i: – Mbói che mbotavýgui ha’u.

Upérõ Ñandejára he’i mbóipe: Rejapo haguére kóva, ne añoite reikóta tymba jaheipýrõ, retyryrýta reikóvo yvýre ha ne ñembyahýiramo re’úta yvy. Kuña ndive romoingo vaíta, ha iñemoñare ne ñemoñare ndive.

Kuña ñemoñare ne akãre opyrũta, nde katu reha’ãta reisu’u ipytápe. Kuimba’e ombohéra hembirekópe Eva he’iséva sy, opa yvypóra sýgui ha’e.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI SALMO 97
Opavave: Japurahéi Ñandejárape purahéi pyahu

Pepurahéi Ñandejárape purahéi pyahu,
mba’e hechapyrãva niko ha’e ojapo.
Ipyapy mbarete ha imarangatúgui
ipu’aka opa mba’ére. O.

Ñandejára ohechauka ipu’akaha opa mba’e rehe,
ohechauka niko ha’e hekojojaha.
Ndahesaráiri pe mborayhu
Teko jeroviaha Israel ndive guarã. O.

Opa ko yvy apére niko ojehecha
Ñandejára ipu’akaha opa mba’e rehe.
Toropurahéi, toroñembo’e Ñandejárape,
Purahéi rory ha torovy’a. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue Éfeso guápe 1:3-6, 11-12

Toñemomba’e guasu Tupã, Ñandejára Jesucristo Túva. Cristo rupi niko ha’e ñande rovasava’ekue opaichagua jehovasápe yvágagui oúva reheve.

Cristo rupi niko Tupã ñande poravo va’ekue opa mba’e ojapo mboyve, jaiko hagua henondépe, chupe oñemboykeva’ekue ha imarã’ỹvaicha. Ha ha’e ñanderayhúgui, ymaite guive voi ñande poravova’ekue, ñande rereko hagua ta’ýra teéramo Jesucristo rupi, péicha ha’e ojaposégui ha oipotágui.

Péicha ha’e ojapo, opa árape ñamomba’e guasu hagua Tupãme imborayhu tuichaitére, ha heseve ñande rovasa haguére Ta’ýra ohayhu etéva rupi.

Tupã péicha oipotágui, ha opa mba’e ojehúva ojehúgui ha’e oipota háicha niko ore poravova’ekue ymaite guive Cristo rupi, roiko hagua imba’e teévaramo. Ha’e niko oipotava’ekue ore raẽvete roju rojerovia Cristo rehe, ikatu haguãicha opavave romomba’e guasu ipokatu tuichaite.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Lc 1, 28
Roguerohory nde Tupã rembiporavo, Ñandejára oĩ nendive.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha Lc 1, 26-38
Opavave: Romomba’e guasu ndéve, Ñandejára.

Upérõ, 6 mése haguépe, Tupã omondo Ánhel Graviélpe peteĩ pueblo Galilea pegua hérava Nazarétpe. Upépe oiko Maria, peteĩ kuñataĩ marã’ỹ, ome’ẽma vaekue iñe’ẽ omenda haguã Josére, Rréi David ñemoñare.

Upe Ánhel oike María oĩháme ha he’i chupe: – Roguerohory, nde Tupã rembiporavo! Ñandejára oĩ ne ndive. María oñemondýi ha opensa mba’énepa he’ise pe maitei ohendúva. Pe Ánhel he’i chupe: – Ani rekyhyje, Maria, Tupã nde rerohory. Nde rye guasúta ha ne membýta, ha pe mitã rembohérata Jesús.

Ha’e mba’e guasúta ha oje’éta hese: “Tupã Yvatetegua Ra’y”. Ha Tupã Ñandejára ojapóta chugui mburuvicha guasu, Rréi Davídcha. Ha’e oisãmbyhýta Israel retã guápe opa ára guarã.

María oporandu pe Ánhel pe: – Mba’éicha piko ojehúta upéva, ko che ndaikóiva gueteri kuimba’e ndive?

Pe Ánhel katu he’i chupe: – Espíritu Santo oikéta nde pype, ha Tupã Yvatetegua pu’aka oúta nde ári.

Upévare, pe mitã oútava oñembohérata Imarangatúva ha Tupã Ra’y. Isabel, nde rogaguáva, imembýta avei, iguãiguĩma ramo jepe. Pe kuña oje’e va’ekue ndaikatuiha imemby, ojapóma 6 mése hye guasuha. Tupãme guarã ndaipóri ikatu’ỹva.

Aipórõ María he’i: – Che, Ñandejára rembiguái. Tupã tojapo che rehe pe ere haguéicha. Ha uperire, pe Ánhel oho.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Jesucristo.