LECTURAS DEL VIERNES 24 DE ENERO

LECTURAS DEL VIERNES 24 DE ENERO

Primera lectura:

Ko’ágä   ñahendúta Tupã Ñandejára ñe’ẽ Jueces arandukápe oĩ háicha                       

       24, 3-21

Saúl oiporavo 3.000 kuimba’e opa Israelgua apytégui ha oho David rekávo umi yvyty ijyvatevéva rupi. Hape rupi oguahẽ peteĩ ovecha oñemongorahápe. Ijypýpe oĩ peteĩ itakua okañyháme David hendivegua ndive. Saúl oĩse sapy’a ñanáme ha oike pe itakuápe oĩ haguã. Umi David ndive oĩva he’i ichupe: Ko árape ojapo Tupä Ñandejára upe he’i va’ekue ndéve: ome’ẽtaha nde pópe nde rehe ija’e’ỹvape. Ejapo rejaposéva hese.

Upérõ David oñemboja mbegue katu ha oikytĩ peteĩ Saúl ahoja pehẽngue . Ha ojapopa vovénte ombyasy jevy, ha he’i hendive guápe: Ani ágã oheja Tupã Ñandejára ajapo mba’eve che ruvicha guasúre. Ha’e niko oiporavo va’ekue ichupe Israel ruvicha guasúrõ. Ha’e hína mburuvicha guasu, Tupã Ñandejára oiporavo haguére ichupe.

Péicha David ojoko hendive guápe ha ndohejái ichupe kuéra ondyry Saúl rehe. Saúl osẽvo pe itakuágui oho hapére. Upérõ David osẽ hapykuéri ha osapukái ichupe: Che ruvicha guasu, che ruvicha guasu!

Saúl oma’ẽ hapykuévo, ha David ojayvy henondépe, he’ívo ichupe: Mba’ére piko rejapysaka ñe’ẽ reíre, che ruvicha guasu? Oĩ he’íva ndéve ajaposeha nde rehe ivaíva. Ko árape Tupä Ñandejára ne moĩ kuri che pópe amo itakuápe ha che ndorojukaséi, ha’égui che jupe Tupã Ñandejára nde poravo hague mburuvicha guasurã. Ema’ẽ porãke che ruvicha guasu ko arekóva rehe che pópe. Kóva hína peteĩ nde ahoja pehẽngue  ha ikatu va’erã mo’ã rojuka.

Ko’ágã reikuaáma ndoroguasu api mo’ãiha ha ndajapo mo’ãiha nde rehe mba’eve ivaíva. Nde katu reiko che muña che juka haguã. Tupä Ñandejára ta ñane reko ra’ã ha ha’e to japo nde rehe upe ojapo va’erã! Che katu araka’eve namopu’ãi chéne che po nde rehe. Oĩ niko ñe’ẽnga yma guive oñehendúva ha he’íva: “Tembiapo aña osẽ iñañávagui”.

Upévare che namopu’ãi chéne che po nde rehe mba’eveichave ramo. Ha hi’arive: Máva rapykuéri piko osẽ ra’e Israel ruvicha guasu? Mávape piko omuña oikóvo? Peteĩ jagua re’õngue, peteĩ tungusu. Upeichaguáma niko che ko’ágä ! Upévare, Tupä Ñandejára ta ñane reko ra’ã ha te’i mávapa ojavy: che térãpa nde! Ha’e tohecha che reko potĩ ha ta che pe’a nde pógui!

David oñe’ẽmba vove, Saúl osapukái: Nde piko hína che ra’y David, upe reñe’ẽva chéve?

Oñemoĩ hasẽ, ha he’i ichupe: Nde hína upe nde reko potĩva, remoengovia niko chéve iporãvape upe ivaíva ajapo va’ekue nde rehe. Ko árape rehechauka chéve rehekaha iporãva chéve guarã. Tupä Ñandejára niko che moĩ nde pópe ha nda che jukái. Añetehápe ndaipóri avave ojuhúva hese ija’e’ỹvape ha ohejánteva oho ojuka’ỹ rehe ichupe. Upévare Tupä Ñandejára tomoengovia ndéve upe iporãva rejapo va’ekue che rehe! Ko’ágä  ahecha kuaáma ndetaha pe mburuvicha guasu, omoakã rapu’ãtáva Israélpe.

Tupã Ñandejára Ñe’ẽ

SALMO ÑEMBOHOVÁI     56, 2-4. 6. 11

R. Che poriahuvereko Tupã Ñandejára, che poriahuvereko

Che poriahuvereko Tupã Ñandejára, che poriahuvereko,

che ánga niko nde pópe oñemoï.

Ne rendápe niko aguahẽ che pytyvõ haguã.

Nde pepo guýpe añemo’ã ohasa peve che hegui po’a’ỹ. R.

Añembo’éta Tupã Ñandejára, yvatete guápe, ojapo va’ekue che rehe opa mba’e.

Ha’e yvága guive che pe’áne jejopy vaígui,

ha vaípe ombojecháne umi che rayhu’ỹvape. R.

Tupã Ñandejára oñandukáne chéve imborayhu ijojaha’ỹva.

Tupã Ñandejára, yvágare epu’ã, to hecha nde tuichakue.

Ne mborayhu niko tuicha yvága peve oguahẽ,

nde reko jeroviaha katu araíre ojepyso. R.

ALELUIA 2Cor 5, 19

Aleluia.

Tupä Ñandejára oï va’ekue Ñandejára Jesucristo ryepýpe

omoingo porä jevývo yvypóra hendive, ñene mbojerovia

ome’ëvo ñandéve ñe’ë oporomoingo porä jevýva.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       3, 13-19

Upe ramo Jesús ojupi peteĩ yvytýpe ha ohenói umi ohenoise va’ekuépe. Oñemboaty rire, oiporavo 12 ijapytégui kuéra, omoirũ haguã ichupe ha omondo haguã omoerakuãvo iñe’ẽ. Ko’ãvape ombohéra apóstol, ha ome’ẽ ichupe kuéra pokatu omosẽ haguã umi Añáme. Ko’ãva hína umi 12 ha’e oiporavo va’ekue: Simón, ha’e ombohéra va’ekue Pedro, Zebedeo ra’y kuéra Santiago ha ityvýra Juan, umívape ha’e ombohéra Boanerges, Andrés, Felipe, Bartolomé. Mateo, Tomás ha Alfeo ra’y Santiago, Tadeo, Simón hetã rayhúva, ha Judas Iscariote, pe upéi omoñuhã va’ekue Jesúspe.

Ñandejára Jesucristo Ñe’ẽ