LECTURAS DEL SÁBADO 25 DE ENERO

LECTURAS DEL SÁBADO 25 DE ENERO

Primera lectura:

Ko’ágä   ñahendúta Tupã Ñandejára ñe’ẽ Samuel arandukápe oĩ háicha

1, 1-4. 11-12. 17. 19. 23-27

Omano rire Saúl, David ou jevy Siclágpe ipu’aka rire Amalec guáre, ha upépe opyta mokõi ára. Pe ára mbohapyhápe katu oguahẽ Saúl rekohágui peteĩ kuimba’e ijao soropa ha yvy iñakãre, mba’e mbyasýgui. Oguahẽvo David rendápe oñesũ ha ojayvy ombojávo isyva yvýre. David oporandu ichupe: Mamóguipa reju? Aju Israelgua rekohágui, he’i pe kuimba’e.

Mba’épa ojehu? Emombe’u katu! he’i ichupe David.

Ñane ñorairõhára oguevi ha heta eterei ojejuka, he’i pe kuimba’e. Omano avei Saúl ha ita’ýra Jonatán!

Upérõ David ha umi omoirũva ichupe omondoro ijao mba’e mbyasýgui, ha hasẽ ha osapukái Saúl ha ita’ýra Jonatán manóre ha oguevi haguére Israelgua ha Tupã Ñandejára ñorairõhára, ha ndo’úi hikuái mba’eve ka’aru pytũ meve.

Háa, Israel, ogue ne mimbipa umi yvytýpe, ho’ávo upépe, umi kuimba’e py’a guasu!

Saúl ha Jonatán ojehayhu ha ika’avóva, oikove ha omanóvo ndojeíri ojuehegui. Taguato guasúgui ha’ekuéra iñakuãve, leóncha imbarete mokõive!

Israel rajykuéra, pejahe’o Saúlre, ao pytã ha líno sãime ha’e pene mondéva, ha poyvi órope pene mbojegua!

Mba’éicha itépa umi ipy’a guasúva ho’a ñorairõme. Jonatán ojejuka amo yvyty ru’ãme. Rasa itéma nde rehe añembyasy, Jonatán, che ryke’y rohayhu’etéva, che rayhu re’ẽte va’ekue avei, kuña mborayhúgui chéve he’evéva, upe ne mborayhu! Mba’éicha itépa ho’a ijojaha’ỹva, mba’éicha itépa hembiporu ñorairõrã oñehundi!

Tupã Ñandejára Ñe’ẽ.

SALMO ÑEMBOHOVÁI         79, 2-3. 5-7

R. Ehechauka oréve ne mbareteha ha eju ore pytyvõ.

Israel rerekua ore rendu kena Nde reisãmbyhýva

José ovecha atýicha, ha reguapýva; umi tekove ipepóva ári, ehechauka nde pokatu,

ehecha kuaami Efraín, Manasés, Benjamín ñemoñarépe. R.

Ehechauka oréve ne mbareteha ha eju ore pytyvõ Tupã, ore Jára, nde pu’akapáva,

araka’e peve piko ne mbopochýta umi ne retãgua ñembo’e? R.

Tasẽ mante re’uka ichupekuéra opa ára, ha tesaýpe remboy’u jevy jevy,

umi tetã ore jere rupi oikóva oñe’ẽ ore rehe, ha umi ore rayhu’ỹva oñembohory joa ore rehe. R.

ALELUIA Cf. Hech  16, 14b

Aleluia.

Tupä Ñandejára epokomi ore korasöre

roguerohory haguä nde Ra’y ñe’ë.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Marcos omombe’u háicha. Pejapysaka porãtapa hese?                                                       3, 20-21

Upe ramo guare oike Jesús peteĩ ógape, ha upépe oñemboaty jevy heta eterei, ha ichugui  kuéra ndaikatuvéi okaru Jesús ha hemimbo’e kuéra. Oikuaávo upéva Jesús rogagua kuéra, oho ogueraha haguã ichupe he’ígui hese itarovaha.

Ñandejára Jesucristo Ñe’ẽ