LECTURAS DEL VIERNES 3° DE ADVIENTO

LECTURAS DEL VIERNES 3° DE ADVIENTO

Ko’ágã ñahendúta Tupã Ñandejára ñe’ẽ Isaías arandukápe oĩ háicha      56, 1-3a. 6-8

Tupã Ñandejára he’i: “Pejapo heko joja ha hekópe guáva.

Oguahẽ mbotáma ára ivaívagui oñesẽ haguã ha teko joja che mba’éva oĩma ojechauka haguãicha.

Ovy’a ite va’erãpa upe ojapóva upéicha ha oñemohatã hembiapópe ojejokóvo pytu’uha ára momarãgui ha mba’e vai apógui!”

Mombyrygua ojapóva Tupã Ñandejára rembipota, ha umi mombyrygua oikóva che rape rupi ojapo haguã che rembipota, che rayhu, ha oiko haguã che rembiguái ramo, omboaje ha nomomarãirõ pytu’uha ára ha oñemohatã che ñe’ẽ me’ẽ, arúta ichupekuéra che yvyty marangatúpe ha ambovy’áta che ñembo’e rógape.

Arohorýta che altárpe imymbahapyha imymbajuka, che rógare oje’étagui opa tetãme guarã, ñembo’e róga.”

Péicha he’i Tupã Ñandejára, ombyatýva Israelgua isarambi va’ekuépe: Umi oñemboaty va’ekuépe ambojo’avéta.

Tupã Ñandejára Ñe’ẽ.

SALMO ÑEMBOHOVÁI   66, 2-3. 4b-5. 7-8

Opavave: Tupã Ñandejára ta ñande poriahuvereko

Tupã Ñandejára ta ñande poriahuvereko, ha ta ñande rovasa,

to hesape ñande rehe hova,

to jekuaa opa rupi hembipota,

ha opa tetã rupi ha’e oporope’aha jejopy vaígui. O.

Ta ne momba’e guasu mayma tetã.

To purahéi vy’a pópe tetãnguéra,

resaimbyhýgui opavave teko jojápe,

hekopete remboguata tetã nguéra yvy ári. O.

Yvy ome’ẽ hi’a:

Tupã, ñande Jára, ñande rovasa.

Tupã Ñandejára ta ñande rovasa,

ha to ñemomba’e ichupe ko yvy jerekuévo. O.

ALELUIA

Aleluia.

Eju Tupã Ñandejárape nde py’aguapy reheve ore recha, rovy’a haguã hekoitépe.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Juan omombe’u háicha 5, 33-36

Upe ramo Jesús he’i judíokuérape: Peẽ peporanduka va’ekue Juánpe, ha upe ha’e he’i va’ekue che rehe añetegua hína. Naikotevẽi jepe niko che mba’eve avave he’ívare. Ha’énte peẽme ko’ã mba’e ikatu haguã Tupã Ñandejára pene pysyrõ.

Juan niko ojogua va’ekue ku mba’e rendýpe ohesapéva, ha peẽ katu pevy’ase sapy’a va’ekue hesapépe. Che katu areko peteĩ oñe’ẽ porãvéva che rehe Juángui.

Upe che ajapóva niko hína, pe che Ru ome’ẽ va’ekue chéve ajapo haguã, ha upéva ohechauka che Ru che mbou hague. Ha che Ru voi, pe che mbouhare, oñe’ẽ che rehehápe, jepe peẽ araka’eve napehendúiva ichupe, térã pehecha ichupe

Ñandejára Jesucristo Ñe’ẽ.