LECTURAS DEL VIERNES 30 DE AGOSTO

LECTURAS DEL VIERNES 30 DE AGOSTO

Primera Lectura

Ñahendúta Tupã Ñandejára Ñe’ẽ San Pablo ohai va’ekue Tesalónica guápe      

4, 1-8

Che pehẽngue  kuéra:

Ha ko’ágä  rojerure ha ro’e peẽme Ñandejára Jesús rérape: ta pekakuaave ára ko’ẽre pe teko kuaa peikuaa va’ekue  ore heguípe, ovy’a haguã Tupã Ñandejára, pejapo háichama hína. 

Peẽ niko peikuaáma umi ijapopyrã rome’ẽ va’ekue  peẽme Ñandejára Jesús pu’aka rupi. Pe Tupã Ñandejára oipotáva niko ta peikove marangatúpe, avave ani itie’ỹtei, ha peteĩ teĩ ta ipu’aka hetére, marangatúpe ha teko kuaápe, anítei mba’e pota vai ha tembiapo vaisépe, umi Tupã Ñandejárape oikuaa’ỹ vaicha. Aníke avave oñemombarete ha ombotavy ko’ã mba’épe hapichápe, Tupä Ñandejára oporonupã hatã hína opa ko’ã mba’ére, ro’e haguéichama peẽme. Tupã Ñandejára ñane renói va’ekue  ndaha’éi jaiko ky’a haguã, ñane marangatu haguãnte. Upe, oro’yrõva ko’ã mba’e, ndoro’yrõi yvypórape, oroyrõ uvei Tupã Ñandejárape, ome’ẽ va’ekue  peẽme Espíritu Santo. 

Tupã Ñandejára Ñe’ẽ.

SALMO ÑEMBOHOVÁI                      96, 1. 2b. 5-6. 10-12

R. Tupä Ñandejára rérape pevy’a peẽ pende rekojojáva. 

Tupä Ñandejára mburuvicha guasu hína. 

Ko yvy tuichakue to vy’a, umi yvy y mbyte rupi oĩva to vy’a. 

Arai ypytũ oñuãmba ichupe, 

teko hekopegua ha teko joja iguapyha ramo oguereko. R.

Umi yvyty araitýicha hykupa 

Tupä Ñandejára renondépe. 

Ha’e opa ko yvy Jára hína, yvága heko joja omoherakuã 

ha maymáva ohecha heko mimbipa. R.

Tupä ore Jára, nde rehayhu, 

umi mba’e vai ndojaposéivape, 

reñangareko umi nde rehe ojeroviávare, 

ha renohẽ ichupe kuéra umi iñañáva po guýgui. R.

Ko’ẽ pyahu iñapysẽ heko jojávape, 

vy’a katu heñói imarangatúvape. 

Tupä Ñandejára rérape pevy’a peẽ pende rekojojáva, 

ha pemomba’e guasu héra marangatu. R.

ALELUIA                               Lc 21, 36

Aleluia. 

Peikóke peha’aröháme ha opa ára peñembo’e,

péicha ramo peñe mbojovakéta kyhyje’ÿre Tupä Ñandejára ra’y yvypóraicha oú va’ekue rovake. 

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                                     

25, 1-13

Upe ramo Jesús he’i hemimbo’e kuérape:

Upe Tupã Ñandejára sãmbyhy yvága pegua kóichata. Oĩ va’ekue  10 kuñataĩ, peteĩ pyhare ojapyhýva imba’e rendy ha pe kuñataĩ omendátava ndive osẽva ohuguãitĩ pe imenarãme. Umi kuñataï apytégui, 5 itavy ha 5 iñakã porã. Umi itavýva, ogueraha ramo jepe imba’e rendy, ndoguerahái heta ñandyry péichahágui oikotevẽve ramo guarã. Umi iñakã porãva katu ogueraha imba’e rendy ha iñandyry ryru. Pe menarã hi’arégui oguahẽ haguã, umi kuñataĩ hopehyipa ha ipahápe okepa. Pyhare pyte rupi katu, oñehendu sapy’a peteĩ osapukái ha he’íva: “Oúma pe menarã. Peju pehuguãitĩ ichupe!” Upévo, opáy umi 10 kuñataĩ omoendy tuichave haguã umi imba’e rendy. Umi 5 itavýva he’i umi 5 iñakã porãvape: “Peme’ẽmona oréve pende ñandyry. Ore mba’e rendy niko ogue pota itéma hína.” Umi iñakã porãva katu he’i ichupe kuéra: “Nahániri. Péicharõ niko opavave japytáta mba’eve’ỹre. Tapeho pejogua pene mba’erã.” Ha umi 5 itavýva oho aja ñandyry joguávo, oguahẽ pe menarã. Ha umi kuñataĩ iñakã porã va’ekue oike hendive mendahápe, ha upe rire pe okẽ oñemboty. Upéi, ou jeývo umi kuñataĩ oho va’ekue  oñemu he’i: “Karai. Karai. Eipe’ána oréve pe okẽ!” 

Ha’e katu he’i ichupe kuéra: “Añetehápe ha’e peẽme, che ndapoikuaái.” Ha upéi he’i Jesús: “Pejesarekóke peẽ, ha ani peke. Cháke ndapeikuaái araka’etépa ajúne che, yvypóraicha aju va’ekue .” 

Ñandejára Jesucristo Ñe’ẽ