LECTURAS: DOMINGO 5º DURANTE EL AÑO

LECTURAS: DOMINGO 5º DURANTE EL AÑO

LECTURA PETEĨHA:

Ko’ágã ñahendúta Tupã Ñandejára ñe’ẽ Job arandukápe oĩ háicha        7, 1-4. 6-7

Job he’i:Yvypóra rekove ko yvy ári tembiguái rekovéicha, ojogua hepy rehe omba’apóvape, tembiguái hi’ãhóva kuarahy’ã rehe, mba’apohara oha’arõ asýva hembiapo repy.

Are ahasa jeroviave’ỹme ha heta pyhare ñembyasýpe. Añeno ha pyhare ndohasavéi, che kane’õ ajere hague ko’ãmba peve, ha ha’e:

“Araka’e piko apu’ãne”?

Che rekove osyryry pya’eterei ñambovyvy ramo guáicha ha opa inimbo, mba’eve naha’arõvéi.

Ne mandu’ána, Tupã Ñandejára, che rekove peteĩãhominteha ha araka’evéma ndavy’avéi va’erãha .

Tupã Ñandejára Ñe’ẽ.

Opavave: Romomba’eguasundéve, Ñandejára.

SALMO ÑEMBOHOVÁI 146, 1-6

Opavave: To ñemomba’e  guasu Ñandejára, ohasa asývape ha’e omonguera.

Ajépa iporã ite TupãÑandejárape japurahéi ramo, ichupe ñamomba’e guasu va’erã vy’a pópe.

Tupã Ñandejára omopu’ã jevy Jerusalén ha omboaty pa Israelgua mombyry rupi isarambi va’ekue. O.

Ohasa asýva ha’e omonguera ha umi ho’o ojejoka hague rupi ha’e ojokuapa.

Ha’e he’i mbovýpa mbyjakuéra oĩta ha héra rupi peteĩ teĩme oikuaa.  O.

TupãÑandejára niko tuicha ha imbarete hína, iñarandukuépe ndaijojahai.

Tupã Ñandejára oipytyvõ imboriahúvape, hembiapo vaívape katu yvy rehe oipete.  O.

LECTURA MOKÕIHA:                             

Ñahendúta Tupã Ñandejára Ñe’ẽ San Pablo ohai va’ekue Corinto guápe          9, 16-19. 22-23

Che pehenguekuéra:

Che ndarekói mba’e rehepa ajejapo haguã, aiko hague rehe amoherakuã ko marandu porã, ahechágui upevaha che rembiaporã ikatu’ỹva aheja. Ha ta jererekóke namoherakuãi ramo!

Upéva rehe, che jeheguínte ajapo ramo, ajerure va’erã mo’ã che rembiapo repykue. Ha ajapo ramo ajapo va’erãgui katu, upéva, ajapógui hína Tupä Ñandejára rembiapoukapy. Aipo ramo, che rembiapo rekovia hína pe vy’a ahasáva, amoherakuã hague rehe pe marandu porã ojehepyme’ẽ’ỹ rehe chéve, he’ise, ajerure’ỹ rehe pe oñeme’ỹ va’erã chéve amoherakuã hague rehe pe marandu.

Ndaha’éi  ramo jepe avave rembiguái, aiko opavave rembiguái ramo, ikatu haguã agueru heta hetave yvypóra Crístope.

Aime ramo guare  umi heko jeroviaha ikangýva ndive, che kangy va’ekue avei peteĩha’ekuérava ramo guáicha, agueru haguã avei che ndive. He’ise, aiko hague opavave oiko háicha, ikatu haguã aipysyrõ mbovymíme jepe. Opa mba’e ajapóva, ajapo pe marandu porãre, areko haguã avei pype che mba’éva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA   Mt 8, 17

Aleluia.

“Ha’e oipe’apa ñande hegui ñane mba’asy ha ogueraha opa mba’e hasýva ñandéve”.

Aleluia.

EVANGELIO

Marandu porã Ñandejára Jesucrísto  rekove ha hemimbo’e San Marcos omombe’u háicha 1, 29-39

Opavave: Romomba’e guasu ndéve, Ñandejára.                                         

Upe ramo Jesús oho Santiago ha Juan ndive, Simón ha Andrés rógape. Simón rembireko sy iñakãnundu ha oĩ hupápe. Jesús ohendu upéva, oñemboja ha ipojáivo ipo rehe omopu’ã ichupe. Upévo opi iñakãnundu ha oñemoĩ ohecha mba’épa ha’ekuéra oikotevẽ.

Ka’aruete, oikévo kuarahy, ogueraha hikuái Jesús rendápe opa hasýva ha oguerekóva mba’epochy, ha opa tavagua oñemboaty  hokẽme. Jesús omonguera heta hasývape opaichagua mba’asýgui ha omosẽ heta mba’epochy. Ha ndohejái   ichupekuéra oñe’ẽ, ha’ekuéra oikuaágui ichupe.

Ko’ẽ mboyve Jesús opu’ã ha osẽ pe távagui, ha oho peteĩ avave oĩ’ỹháme oñembo’e haguã. Simón ha iñirũnguéra oho Jesús píari, ha ojuhúvo he’i ichupe: Opavave nde reka.

Jesús katu he’i ichupekuéra: Jaha umi hi’aguĩha rupi. Umi rupi avei tekotevẽ amoasãi che ñe’ẽ, upeva’erã  niko asẽ va’ekue.

Ha upéicha Jesús oiko Galilea rupi omombe’úvo iñe’ẽ umi judíokuéra tupao rupi, ha omosẽvo mba’epochykuéra.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.