LECTURAS: DOMINGO I DE CUARESMA

LECTURAS: DOMINGO I DE CUARESMA

PRIMERA LECTURA:

Ko’ágã ñahendúta Tupä Ñandejára ñe’ẽ Génesis arandukápe oĩ háicha   9,8-15

Upérö Tupä Ñandejára  he’i Noé ha ita’ýrakuérape:

“Ko’ágã añe’ẽ me’ẽ pene ndive ha pene ñemoñarekuéra ndive, ha avei tymbakuéra, guyrakuéra ha opa oikovéva osẽ va’ekue várko guasúgui ndive. Che ñe’ẽ ame’ẽva peẽme: águive, avave nomano mo’ãvéi y oporoaho’ipáva rupi, ha y ndojaho’i mo’ãvéi yvy.

Techaukaha ramo añe’ẽ me’ẽ hague peẽme opa árape guarã, amoĩ araíre arko’íri. Ajaho’i ramo araípe ko yvy ha ojehecha araíre che arko’íri, che mandu’áta che ñe’ẽ rehe, upe ame’ẽva peẽme ha tekovekuéra yvy ári guápe ha ndaipóri mo’ãvéi y ojaho’ipáva yvy.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI      25, 4-5b. 6. 7b-9

Opavave: Tupã, ehechauka chéve umi nde rape, ha umíva rupi che sãmbyhy.

Ñandejára , ehechauka chéve umi nde rape, ha umíva rupi che sãmbyhy.

Che mbo’e umi mba’e añete guáva.

Ndéko hína che Jára. O.

Ñandejára, ani nde resarái ne mborayhu ha nde poriahuverekógui,

reñandúva ore rehe opa árape, ani nde resarái che hegui,

ne mborayhu niko tuicha. O.

Ñandejára niko imba’e porã ha imarangatu,

upéva rehe oheko mbo’e heko vaívape.

Imboriahúvape oisãmbyhy ani haguã ojavy,

ha hápe rehe ichupe kuéra omboguata. O.

SEGUNDA LECTURA:

Ñahendúta Tupã Ñandejára Ñe’ẽ peteĩha San Pedro ohai va’ekue 3, 18-22

Che pehenguekuéra:

Cristo jepe niko omano ñande pekádo rehe, peteï jevy opa ára guarã. Ha’e nda ipekádoi va’ekue, ha umi iñañáva rupi ohasa asy, pende reraha haguã peëme Ñandejára rendápe.  Yvypóra háicha omano ha oikove jevy espiritu háicha. Ha upéicha oho omoherakuã osẽ porã hague, umi espíritu ojeheko jopy va’ekuépe.

Umíva naiñe’ẽ rendúi va’ekue yma, Noé oikoveha árape, Ñandejára  oha’arõ ramo hína py’a guapýpe, ojejapo aja pe várko guasu, 8 yvypóra osalva haguépe hekove y rupive. Ha upe y upéva niko ohechauka va’ekue upérö pe y ñañe mongaraiha ñande pe’áva jejopy vaígui.

Pe ñemongarai nda ha’éi  ipotĩ haguã ñande rete, upéva hína jajerure haguã Tupã Ñandejárape ta ipotĩ ñande py’apy Jesucrísto oikove jevy rupi, ha ojupi va’ekue yvágape, oĩ haguã Tupã ykére, ha opyta haguã iguýpe umi Ánhel, ha opa espíritu ipokatúva ha ikatúva oporoguereko ipoguýpe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN Mt 4, 4b

“Ndaha’éi  tembi’u añónte oikotevẽva yvypóra oikove haguã, opa ñe’ẽ  Ñandejára jurúgui osẽva rehe avei oikotevẽ”.

EVANGELIO

Marandu porã Ñandejára Jesucrísto  rekove ha hemimbo’e San Marcos omombe’u háicha    1, 12-15

Opavave: Romomba’e guasu ndéve, Ñandejára.                                        

Upérõ Espíritu Santo ogueraha Jesúspe desiértope. Upépe opyta oiko 40 ára, tymba saite apytépe. Ha upépe ou chupe Sataná, oipy’ara’ã haguã Jesús pe. Ha Ñandejára ángel kuéra ou oservi chupe.

Juan ojeapresa rire, Jesús oho Galiléape omyerakuã haguã Tupã marandu porã. He’i: “Oguahẽma upe ára oje’eva’ekue, ha Ñandejára Rréino hi’aguĩma. Pejevy Tupã gotyo ha perovia pe marandu porã.”

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Hesukrísto.