LECTURAS: DOMINGO II DE CUARESMA

LECTURAS: DOMINGO II DE CUARESMA

PRIMERA LECTURA:

Ko’ágã ñahendúta Tupã Ñandejára ñe’ẽ Génesis arandukápe oĩ háicha        

                    22, 1-2. 9-13. 15-18

Upe rire, Ñandejára oikuaa porãseve mba’éicha guápa Abraham ha ohenói ichupe: Abraham, Abraham!

 Ha’e he’i: Ápe aime!

Ñandejára he’i ichupe: Eraha nde ra’y peteĩmi rehayhu etéva Isaac, peteï hendápe hérava Mória. Upépe, peteï yvyty ru’ãme che ahechaukátava ndéve, eikuave’ẽ chéve nde ra’y rejukávo ichupe ha rehapývo chéve guarã altar ári.

Oguahẽvo he’i haguépe ichupe Ñandejára, Abraham omopu’ã peteĩ altar ha omoĩ jepe’a hi’ári. Oipokua ita’ýra ha omoĩ ichupe altárpe jepe’a ári. Upéi oipyso ipo ojuka haguã ichupe ikysépe.

Ñandejára remimbou katu ohenói ichupe yvága guive ha he’i: Abraham, Abraham!

Ha’e he’i: Ápe aime!

Ñandejára remimbou he’i ichupe: Ani reikutu nde ra’ýpe térã rejapo hese mba’eve. Aikuaáma rehayhuha Ñandejárape ha rejeroviaha hese. Nde ra’y peteïmi rehe jepe na ne rakate’ỹi.

Abraham ohecha ovecha mácho hatĩgui opa’ãva javorái rehe. Oho ipiári ha ogueru oikuave’ë Ñandejárape mymbahapy ramo ita’ýra rekovia.

Ñandejára remimbou ohenói jevy Abrahampe yvágagui, ha he’i ichupe:

Che jehe voi añe’ẽ me’ẽ, he’i Ñandejára: Rejapo hague rehe ha’e va’ekue ndéve, ha na ne rakate’ỹigui reme’ẽ haguã chéve nde ra’y, amboheta etereíta ndéve ne ñemoñare, mbyjakuéra yvága pegua ha yvyku’i ra’ỹi yguasu rembe’ýpe guáicha.

Ne ñemoñarekuéra ipu’akáta umi hesekuéra ija’e’ỹvare. Ha opa tetã ko yvy arigua ojehovasáta ne ñemoñare rupi, rejapo hague rehe ha’éva ndéve.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI       116, 10. 15-19

Opavave: Ñandejára rape rehe aikóne.

Ajerovia va’ekue, ha’e ramo jepe che jupe ajecha vai etereiha.

Ñandejára ombyasy ohechávo omano umi hese ojeroviáva. O.

Ñandejára, che ne rembiguái! Ne rembiguái membyre hína che!

Nde upe che jora va’ekue apytĩmby aikohágui.

Ahepyme’ẽta ndéve che mba’e kuave’ẽ reheve.

Nde rérape, che Jára, añembo’éta. O.

Ajapóne umi mba’e ha’e va’ekue Ñandejárape

opa hetãgua renondépe, Ñandejára tupao pepo guýpe,

Jerusalén mbytetépe. O.

SEGUNDA LECTURA:

Ñahendúta Tupã Ñandejára Ñe’ẽ San Pablo ohai va’ekue Roma guápe         

 8, 31b- 34

Che pehẽnguekuéra:

Ñandejára oĩ ramo ñane ndive, piko máva oñemoĩta ñande rehe? Ñandejára ome’ẽ rire ñandéve ita’ýra tee jepe, ha oheja katu omano ñande rehe, mba’éicha piko nome’ẽ mo’ãi ñandéve, Ita’ýra ndive, opa mba’e?

Oiméta piko oñe’ẽ vaíva umi Ñandejára oiporavo va’ekue rehe? Ñandejára niko pe omboheko jojáva ichupekuéra. Mávapa ikatúne omboja hesekuéra angaipa? Avave.

Jesucrísto  niko pe omano va’ekue. Ha oimeve katu, ha’e niko pe oikove jevy va’ekue ha oime ko’ágã Ñandejára akatúape, oñembo’e hína ñande rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN       Mt 17, 5

Ou peteĩ arai omimbipáva ha ojaho’i ichupekuéra. Pe araígui oñehendu peteĩ ñe’ẽ he’íva: “Kóva hína che Ra’y ahayhuetéva, che aiporavo va’ekue”

EVANGELIO

Marandu porã Ñandejára Jesucrísto rekove ha hemimbo’e San Marcos omombe’u háicha                  9, 2-10

Opavave: Romomba’e guasu ndéve, Ñandejára.      

   Upe ramo Jesús oho ojupi peteĩ sérro ru’ãme, ha ogueraha hendive Pedro, Santiágo ha Juan. Upépe henondépe kuéra, Jesús rete oñemoambue ohóvo.  Ijao overa hendy ha morotĩ sakã. Yvy ári ndaipóri mba’eve peichaite morotĩva.

Upéi katu, ohecháma hikuái Elías ha Moiséspe, oñemongetáva hína Jesús ndive.  Ha osẽ he’i Pedro, Jesúspe: — Maéstro, ajépa iporãite ñaimembáre ko’ápe. Reipotárõ, na torojapo peẽme ráncho’imimi pene rendaguã. Peteĩ ne mba’erã, peteĩ Moiséspe guarã ha Elíaspe guarã avei.

  Oñemondyipa niko hikuái, ha Pedro katu ndoikuaái mba’épa he’íta.  Upe jave ou peteĩ arai ha ojaho’i chupe kuéra. Ha pe araígui katu oñehendu peteĩ he’íva, “Kóva niko che Ra’y ahayhúva. Pehendu chupe.”

  Ha oma’ẽ jeývo hikuái ijerére ohecha ndaipóri veimaha avave hendivekuéra. Jesús añoite.

  Oguejykuévo hikuái pe sérrogui, Jesús he’i chupekuéra ani haguã omombe’u avavépe upe ohecha va’ekue, ha’e oikove jey peve omanóva apytégui.  Ha oñongatu hikuái ko’ã mba’e ipy’apýpe. Upe “jeikove jey” katu ndoikuaái hikuái mba’épa he’ise.

Ñandejára Jesucrísto  Ñe’ẽ.

Opavave: Romomba’e guasu ndéve, Ñandejára Hesukrísto.