LECTURAS DOMINGO III DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha 3, 1-8a. 10. 13-15

Moisés oñangareko hembireko ru, pa’i Jetró Madián pegua, ovechakuéra rehe ñúme. Peteĩ ára ogueraha ijovechakuéra yvy ojeiko’ỹha rupi ha oguata Tupã Ñandejára yvyty Horeb gotyo.

Upépe ojechauka ichupe Ñandejára remimbou peteĩ tata rendýpe osẽva ñuatĩ mátagui. Moisés ohecha upe ñuatĩ máta hendy ha ndokáiriva.

Upéma ramo he’i ijupe: ¡Arovia’ỹ haguãicha ko ahechava hína! Mba’éicha rupi piko upe ñuatĩ hendy ha ndo káiri? Ta ñemboja mandi ta hecha upe ojehúva hína. Tupã ohechávo oñembojaha, ohenói Moiséspe ñuatĩ pa’ũgui ha he’i ichupe: Moisés, ¡nde Moisés!

Ha’e he’i: ¡Rohendu che Jara! Mba’épa erese chéve?

Tupã he’i ichupe: Eipe’a raẽ nde py rehegua reñemboja mboyve ko’a gotyove.

Cháke upe yvy repyrũháme ikarai hína. Ha upéi he’i: Che hína Tupã, nde rukuéra ypykue omomba’e guasu va’ekue. Che hína Abraham Tupã, Isaac Tupã ha Jacob Tupã.

Upéma ramo Moisés oñomi hova okyhyjégui ohecha ramo guarã Ñandejárape.

He’i Tupãme: Ahecha oiko asyha che retãguakuéra Egíptope. Ahendu ipyahẽha mba’e pohýi guýpe. Ahechapa ite hembiasa asy. Péina aguejy aipe’a haguã Egiptogua poguýgui Israel guápe, upégui araha haguã ichupekuéra peteĩ yvýpe tuicha ha iporãva. Ýicha osyry kamby ha eíra upéva upe yvýpe!

Upéva rehe ko’ágã romondo. Aipota reho Faraón rendápe renohẽ haguã Egíptogui Israel guápe.

Moisés he’i Tupãme: Ágã ahavo añe’ẽ Israelgua ndive, ha ha’e ichupekuéra: “Tupã pende ru ypykue Jára che mbou pene rendápe”. ha ha’ekuéra oporandu ramo chéve: “Mba’éicha héra?”. piko mba’e ha’éta?

Tupã he’i Moiséspe: Che hína che voi. Ha eréta Israel guápe: “Che voi” che mbou pene rendápe.

Tupã he’ive Moiséspe: Ere avei Israel guápe: “Pende Jára, upe Tupã omomba’e guasu va’ekue pende ru ypykue: Abraham Tupã, Isaac Tupã ha Jacob Tupã, che mbou pene rendápe”. Kóva hína héra, ha upéicha pehenóita ichupe opa ára.

Tupã Ñandejára Ñe’ẽ

Opavave: Romomba’e guasu ndéve, Ñandejára.

SALMO ÑEMBOHOVÁI 102, 1-4. 6-8. 11

Opavave: Ñandejára imba’e porã ha oporo poriahuvereko.

Amomba’e guasu Ñandejárape che py’aite guive, che py’aite guive amomba’e guasu héra marangatu.
Amomba’e guasu Ñandejárape che py’aite guive, nda che resarái chéne heta mba’e porã ome’ẽ hague chéve. O.

Ha’e oheja rei chéve che rembiapo vaikue ha che mongueráva opaichagua mba’asýgui.
Ha’e ndohejái apa yvykuápe, mborayhúpe che añuã ha che mokunu’ũ. O.

Ñandejára heko joja hembiapokue itápe ha ohecha kuaa umi ojejopy vaívape.
Moiséspe ha’e ohechauka hembipota, ha Israélpe mba’e hechapyrãva. O.

Ñandejára imba’e porã ha oporo poriahuvereko, ndaipochy reíri ha oporohayhu.
Yvága oĩ mombyry háicha yvýgui, upeichaite tuicha imborayhu umi hese ojeroviáva rehe. O.

LECTURA MOKÕIHA:
Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 10, 1-6. 10-12

Che pehenguekuéra: Ndaipotái pende resarái umi ñande ypy kuérakue oñemo’ã hague ku arai guýpe, ha maymáva ohasa hague Mar Rojo upéicha rupi, opavave ojoaju va’ekue Moisés rehe oñemongaraívo upe arai ha upe yguasúpe.

Upéicha avei, opavave ha’ekuéra ho’u pe tembi’u espíritu reheguáva, ha opavave hoy’u pe espíritu rehegua ojevy’úvagui. Hoy’u hikuái pe espíritu rehegua itágui, omoirũva ichupekuéra tape pukukue. Ha upe ita upéva Cristo va’ekue.

Upéicha ramo jepe katu, opavave nunga nombohorýi Tupãme, ha upéva rehe hetekuéra opyta ojepyso pe yvy ojeiko’ỹháme. Opa ko’ã mba’e oiko ñane rembiechaukarã, jaipota’ỹ haguã ivaíva, ha’ekuéra oipota haguéicha. Ha ani peñe’ẽ guyguy Tupã rehe, oime haguéicha oñe’ẽ guyguýva, ha upéva rehe ojukapa ichupekuéra Tupã remimbou, oguerúva mano.

Opa ko’ã mba’e ojehu ñande ypykuérakuépe tembichaukarã ñandéve guarã. Ha oñemoĩ va’ekue Tupã Ñe’ẽme ñane momarandúvo, jaikómagui ára pahavo. Ha upéicha, pe oimo’ãva oĩ hatãha, to ñeñangareko ani ho’a.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ACLAMACIÓN Mt 4, 17
Ñandejára Jesucrísto he’i: Pejevy Tupã gotyo, hi’aguĩma hína ñesãmbyhy
yvágagui oúva.

EVANGELIO

Marandu porã Ñandejára Jesucrísto rekove ha hemimbo’e San Lucas omombe’u háicha 13,1-9
Opavave: Romomba’e guasu ndéve, Ñandejára.

Upérõ oñemombe’u Jesúspe Pilato ojukayka hague heta Galileaguápe. Ko’ã kuimba’e niko ojejuka tupaópe, iñofrénda oikuave’ẽ jave hikuái Ñandejárape.

Jesús osẽ he’i: Peimo’ã nga’u piko peẽ, umíva ojejuka hague iñangaipa hetave haguére hapichakuéragui. Nahániri. Ha peẽ voi ndapejevýirõ Ñandejára gotyo, pemanótante avei. Pene mandu’ápa umi 18 omano vaekuére ho’árõ guare hi’árikuéra óga Siloépe.

Peimo’ã piko péicha ojehu hague chupekuéra hembiapo vaive haguére hapichakuéra Jerusalenguágui. Nahániri. Ha peẽ
voi ndapejevýirõ Ñandejára gotyo, pemanótante avei.

Jesús omombe’u chupekuéra kóva ko káso: Peteĩ kuimba’e ndaje oguereko raka’e peteĩ ígo máta iparraltýpe. Peteĩ ára, oho ohecha hi’ápa, ha ndojuhúi hese mba’eve.

Upépe osẽ he’i ikapatápe: ‘mbohapy áño háma aju ahecha hína ko ígopa hi’a, ha mba’eve ndajuhúi. Eity ñandéve. Oĩ reíma hína ko’ápe.’ Pe kapata katu he’i chupe: ‘Karai, jahejavéntena gueteri peteĩ áño. Ahapyatýta ñandéve ha ambyavevo porãta pe yvy ijerére. Ágã hi’a ramo jaheja. Nahánirirõ katu jaity.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.