LECTURAS DOMINGO TRIGÉSIMA SEGUNDA SEMANA

LECTURAS DOMINGO TRIGÉSIMA SEGUNDA SEMANA

LECTURA PETEÎHA:
Ko’ágã ñahendúta Tupã Ñandejára ñe’ẽ Macabeos aranduka mokõiháme oĩ háicha 6, 1; 7, 1-2

Upérô mburuvicha guasu omondo haguã peteĩ myakãhára Atenas guápe ojopývo umi Israel guápe oheja haguã itúvakuéra ypykue reko ha Ñandejára rembiapoukapy.

Umi ára umívape oñemyakãsã peteĩ sy 7 imemby reheve. Mburuvicha guasu oinupãuka ichupekuéra tukumbo ha teju ruguáipe ho’u haguã kure ro’o, oheja’ỹva Ñandejára rembiapoukapy.

Peteĩva, opavave rérape, kóicha he’i: “Mba’e piko peikuaase? Roime romano haguãicha rojei rangue ore rukuéra ypykue rembiapoukapýgui”. Ha ha’e omanonguévoma he’i: “Nde, nde reko añáva, reipe’a ore hegui ore rekove ko’ágã, opa mba’e Jára katu ore moingove jevýta ha ome’ẽta oréve jeikove opave’ỹva, romano hague rehe hembiapoukapýre”.

Kóva rire oñemboharái hikuái pe mbohapyhare. Ha’e, ojejerurévo ichupe, oguenohẽ ikũ ha oipyso ichupekuéra ijyva, okyhyje’ỹ rehe, ha he’i: “Ñandejára ome’ẽ va’ekue chéve che rete, ha hembiapoukapy amomba’égui narombyasýi, ha ichugui aha’arõ ome’ẽ jevývo chéve”.
Umi upépe oĩ va’ekue ha mburuvicha guasu jepe ipirĩmba ohechávo mba’eichaite pevépa ipy’a guasu pe mitã rusu.

Péicha ohechaukáva nomomba’eiha upe jehasa asy. Omanóvo ha’e, pe irundyháre avei oñemboharái hikuái. Ha ha’e, oĩma ramo omano haguãicha, he’i: “Nambyasýi amanotaha pende po rupi, ajeroviágui Ñandejára ñe’ẽre, he’i va’ekue ore moingove jevytaha. Ndéve guarã katu ndaipóri mo’ãi jeikove jevy”.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 17, 1. 5-6. 8b. 15
Opavave: Ñandejára mba’e aipotave. Apáyvo, rohecha guive.

Ñandejára, hendapeguánteko ajerure ndéve. Ndéve niko rohenói jevy jevy.
Ehendu kena che ñembo’e, añeteguánteko ha’e ndéve. O.

Nde rape rupi memete aiko, araka’eve ndapiái ichugui.
Che Jára, ndéve niko añembo’e. Ejapysaka kena che rehe ha che rendu. O.

Nde pepo guýpe kena che mo’ã Che katu Ñandejára, nde reko joja rehehápe
nde rehe amaña guive piko mba’e aipotave. Ha apáyvo, rohecha guive. O.

LECTURA MOKÕIHA:
Ñahendúta San Pablo ohai va’ekue ikuatiañe’ẽ mokõiháme Tesalónica guápe 2,16- 3, 5

Che pehẽnguekuéra: Ñandejára Jesucrísto voi ha Tupã ñande Ru, ñande rayhúva ha ome’ẽ va’ekue ñandéve vy’a opa’ỹva, ha ñeha’arõ kuaa ipy’a porã rupi, ta pene mbopy’a kyre’ỹ, ha ta pene mombarete opa mba’e porã peje ha pejapóvape.

Ipahávo, ore pehẽnguekuéra, peñembo’ekena ore rehe, Ñandejára ñe’ẽ oguahẽ pya’e ha ojererohory haguã opa rupi, ojehu haguéicha pende apytépe. Peñembo’e avei Ñandejára ore pe’a haguã umi tekove añágui, nda opavavéi niko oguerovia umi mba’e ro’éva.

Ñandejára katu heko jeroviaha, ha ha’e pene mombarete ha pene mo’ã va’erã Añágui. Ha Ñandejára rehe rojerovia pejapo ha akóinte pejapotaha umi ro’e va’ekue peẽme. Ñandejára ta pene pytyvõ peporohayhu haguã Tupã oporohayhuháicha, ha peropu’aka haguã jehasa asy, Cristo ojapo haguéicha.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA Apoc 1, 5a. 6b
Ha Jesucristogui avei, mba’e rechahára jeroviaháva, teko mimbipa ha pokatu ta imba’e opa ára.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 20, 27-38
Opavave: Romomba’e guasu ndéve, Ñandejára.

Peteĩ árape, saduséokuéra oho Jesús rendápe. Ha’ekuéra niko ndogueroviái omanóva oikove jeyha.

Upévare he’i Jesúspe: — Mbo’ehára, Moisés niko oheja va’ekue oréve kuatiápe, peteĩ kuimba’e omanórõ hembireko imemby’ỹre chugui, tyvýra omenda vaerãha hembirekorére. Ha upe kuña imemby ramo, pe mitã opyta tyke’ýra ra’ýrõ.

Oiko vaekue ndaje raka’e 7 kuimba’e ojoryvýva. Pe ijypykue omenda, ha omano ta’yra’ỹre. Upéi katu pe mokõiha, ha pe mbohapyha omenda hembirekorére, omano ha nda’ita’ýrainte avei hikuái. Ha upéicha, oho omenda paite pe kuñáre umi hembyre, ha nda’ita’ýrai avavete. Ipahápe omano avei pe kuña. Ha néi, ág̃a ojeikove jey vove, piko máva rembirekóta hína pe kuña. Omenda paite niko hese
umi 7.

Jesús he’i chupe kuéra: — Ko yvy ári jaikove aja niko, kuña ha kuimba’e omendáva voínte. Ha Ñandejára mante niko oikuaa máva-mávapa oikove jeýta. Ha ág̃a upéva ojehu vove niko ndaipóri mo’ã véima ñemenda. Ndaipóri mo’ã véima omanóva ave. Maymáva oikóta Ñandejára ángel kuéraicha, ha Ñandejára mba’éta ha’e kuéra oikove jey haguére.

Moisés voi niko ohechauka ñandéve omanóva oikove jeytaha. Ku jukeri hendypárõ guare okai’ỹre ykére oĩ ramo guare, niko ha’e he’i va’ekue Ñandejára ha’eha Abraham, Jacob ha Isaac Tupã. Ñandejára niko ndaha’éi omanóva Tupã. Ñandejára niko oikovévape Tupã. Ñandejára peg̃uarã niko opavave oikove hína.

Ñandejára Jesucristo Ñe’ẽ.

Opavave: Romomba’e guasu ndéve, Ñandejára Jesucristo.