LECTURAS DOMINGO VIGESIMO SEGUNDO SEMANA

LECTURAS DOMINGO VIGESIMO SEGUNDO SEMANA

LECTURA PETEÎHA:
Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha (3, 17-18. 20. 28-29)

Che ra’y, emba’apo rejechaukase’ỹ rehe, ha nde rayhúta umi ombovy’áva Ñandejárape. Nde tuichave pa’ũme eñemomichĩve, ha reñemoĩ porãta Ñandejára ndive. Ñandejára niko ipokatu eterei, ha ichupe omomba’e guasu umi ojejapo’ỹva.

Ojejapóva naipohãi voi, ñana vai roky hína umíva. Iñakã porãva oñamindu’u ñe’ẽngáre, ha iñarandúva ojapysaka porã opa mba’e rehe.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI (67, 4-5a. c. 6-7b. 10-11)
Opavave: Ñandejára, nde ne mba’eporã imboriahuva ndive.

Heko potîva torypápe osapukái ha ovy’a joa Ñandejára renondépe.
Pepurahéi Tupãme, héra peropurahéi. Tupã Ñandejára hína héra. O.

Ñandejára itupao guive opaite ityre’ỹva ru ha’e, ha imenave’ỹva ñangarekohára,
ohoga apo nda hógaivape oñeñapytĩvagui ha’e opoi ovy’a haguã. O.

Ha Ñandejára! Ama neporãva rembou, ha nde yvy yuhéi rembogue va’ekue.
Upépe ne retã oñemohenda. Ha hemikotevẽ imboriahúvape reme’ẽ. O.

LECTURA MOKÕIHA:
Ko’ágã ñahendúta Tupã Ñandejára ñe’ẽ ojehai va’ekue Hebreoskuérape (12,18-19. 22-24)

Che pehenguekuéra: Peẽ napeñembojái va’ekue, umi Israel guáicha, peteĩ mba’e ikatúva rehe ojepoko ha hendy va’ekue hína tatáicha, oĩhápe pytũ ha yvytu ratã. Ha napehendúi avei pe turu pu ha Ñandejára Ñe’ẽ.

Umi ohendu va’ekue upe ñe’ẽ, ojerure asy va’ekue anive haguã oñe’ẽ ichupekuéra. Peẽ katu, upéva rangue, peñemboja yvyty Sión rehe ha pe Ñandejára oikovéva táva guasúpe, Jerusalén yvágape guápe, ha hetaiterei Ñandejára remimbou oñembyaty hápe. Ha avei umi Ñandejára ra’y aty tenondeguáre, hérakuéra oĩva yvágape.

Peñemboja Ñandejára rehe, opavavépe ombojovakéva, ha umi yvypóra marangatu Espíritu rehe, Ñandejára omoporã añete va’ekue rehe.
Peñemboja Jesús rendápe, oñe’ẽva ñande rehehápe ñe’ẽ ñome’ẽ pyahurã ha pe tuguy ñane mopotĩva rehe. Upéva niko ome’ẽta ñandéve tuichave mba’e Abel ruguykue ome’ẽvagui.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA
Peheja tamoĩ pende apére che yugo, ha pejapo che ha’éva peẽme. Ha peikuaáta che py’a porãha ha ndajejapoiha, he’i Tupã Ñandejára.

EVANGELIO
Marandu porã Ñandejára Jesucrísto rekove ha hemimbo’e San Lucas omombe’u háicha 14, 1. 7-14

Opavave: Romomba’e guasu ndéve, Ñandejára.

Upérõ peteĩ pytu’uha árape, peteĩ fariséo okonvida Jesúspe oho haguã okaru hendive hógape. Ha opa umi oĩva upépe omaña joa hína Jesús rehe.

Jesús ohecha mba’éichapa umi oñekonvida va’ekue, tenondete voi oho oguapy. Osẽ he’i chupekuéra: Reñekonvidárõ menda hápe, anítei reho reguapy pe mesa akãme voi. Cháke ikatúne oguãhẽ peteĩ tuichavéva ndehegui. Ha upe ne konvida vaekue oúne he’i ndéve, “Epu’ãta mante oguapy haguã kóva”. Tuicha ñemotĩ rehasáne. Upéi ave, rehóne eguapy amo huguaitépe.

Reñekonvidárõ katu, tereho eguapy amoite huguápe. Ágã nde rechávo pe ne konvida vaekue, oúne he’i ndéve, “Che irũ, ehasána eguapy amo iñakãme”.

Upéicharõ, umi oguapýva nde yke rupi, tuicha nembojerovia vaerã. Umi ojejapo ha oñembotuicháva niko oñemomichĩ vaerã ágã, ha umi heko mirĩva katu oñembotuicháne.

Upéi Jesús he’i pe chupe okonvida va’ekuépe: Rejapórõ karu guasu, árape térã pyhare, ani ekonvida ne irũ nguérape, térã nde ryvy ha nde ryke’ykuérape, térã nde rogaguápe ha umi rríko kuéra nde róga jere rupi oikóvape.

Ágã upéi, ha’ekuéra ave ne konvidáne, ha péicha repyta porãne hendivekuéra. Nde katu ágã rejapo jeývo, ekonvida umi imboriahúvape, umi ipy chékeva, iñepãva ha umi hesatũvape.

Ha’ekuéra niko ndaikatu mo’ãi ne konvida mba’evépe ha ndaikatu mo’ãi omyengovia ndéve. Ñandejára katu tuicha nde rovasa vaerã ágã opa hekojojáva oikove jeyha árape.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.