LECTURAS JUEVES DÉCIMO NOVENO

LECTURAS JUEVESDÉCIMO NOVENO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha 12, 1-12

Tupã Ñandejára he’i chéve: Nde, kuimba’e, reiko tetãgua che rehe opu’ãva apytépe. Hesa ha ndohechái, ijapysa ha nohendúi, opu’ãgui che rehe.

Upévare, embosako’i reikotevẽva reho haguã ne reta’ỹme, ha ára itépe, opavave renondépe, esẽ nde rógagui ha tereho ambue hendápe, ikatúko ohecha kuaa hikuái ha’e kueraha tetãgua opu’ãva che rehe. Áraitépe ha opavave rovake enohẽ reraha va’erã ha ka’arúvo opavave rovake avei, esẽ tereho, oho háicha umi tetã mombyrýpe ojereraháva.

Upe rire, embokua pe táva tápia opavave rovake ha esẽ upe rupi. Ha ágã pyhare vove, emoĩ nde ati’y ári ne mba’e kuéra ha esẽ opavave rovake. Ejaho’i nde rova ku nde rehechái haguãicha ne retã. Aipota reiko mba’e rechaukahárõ Israelgua kuérape okyhyje

haguã.Ambosako’i che mba’e kuéra, he’i haguéicha chéve Tupã Ñandejára ha ára itépe asẽ heseve okápe, umi tetã ambuépe ojereraha vaicha. Ka’arúvo ambokua che pópe táva korapy yvate, ha pytỹvo, opavave rovake, amoĩ che ati’y ári che mba’e kuéra ha asẽ.

Pyhareve oúvape, Tupã Ñandejára he’i chéve: “Oporandu piko ra’e Israelgua kuéra, che rehe opu’ãva, mba’épa rejapo? Ere ichupekuéra che rérape, péicha amomaranduha mburuvicha guasu Jerusalén guápe ha opa ite ipype oikóvape. Ere ichupekuéra ndeha mba’e rechauka okyhyje haguã ha ojapotaha opa nde rejapóva, ha’ekuéra avei oñemosẽmbataha tetã ambue gotyo.

Pe mburuvicha oguerekóva hikuái ohupíta mante imba’ekuéra ijati’ýre, ha pytũ vove osẽta heseve pe táva tapiakua rupi tetãgua ojapótáva ha’e osẽ haguã. Ojaho’íta hova, ohecha’ỹ haguã moõpa ohóta.

Tupã Ñandejára Ñe’ẽ.

SALMO ÑEMBOHOVÁI 77, 56-59. 61-62

Opavave: Peromandu’ákena Tupä Ñandejára rembiapokue porã ita.

Ha’e kuéra oipy’a ra’ã Tupã yvatete guápe ha opu’ã hese.
Ndojapói hembiapoukapy.
Itúvakuéra ypykuéicha ojeheja Tupã Ñandejáragui
ha hu’y oho karë vaicha opia tape porãgui. O.

Ombopochy ichupe hikuái omopu’ãvo
altar tupã gua’úpe umi ijyvateha rupi
ha umíva omomba’évo, omoñeko’õi Tupã Ñandejárape.
Tupã ohechávo ko’ã mba’e, ndoikuaasevéi Israélgui. O.

Oheja ho’a ambue tetãgua pópe
ikarameguã, ipokatu ha heko mimbipa rechaukaha.
Ipochy etereígui hetãgua ndive
oheja ichupekuéra ojejukapa kyse pukúpe. O.

ALELUIA Sal 118, 135

Aleluia.
To jajái che ári nde rova mimbikue Tupã Ñandejára, ha che mbo’e ne rembiapoukapy.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha 18, 21- 19, 1

Upe ramo Pedro oñemboja Jesús rendápe ha he’i ichupe: Che Jára, mbovy jevyvépa che rapicha rembiapo vaikue aheja rei va’erã ichupe? Iporãma piko 7 jevyve aheja rei ramo?

Jesús he’i ichupe: Nahániri. Iporãta 70 jevy 7 reheja rei ramo.

Upévare, Tupã Ñandejára sãmbyhy yvága pegua niko kóicha hína. Oĩ va’ekue peteĩ mburuvicha guasu oikuaa porãséva mba’éichapa umi ichupe omba’apóva oĩ hendive viru porúpe. Ha oñepyrũvo ohecha peteĩ teĩ, ojegueru ichupe peteĩ heta eterei viru omyengovia’ỹ va’ekue ichupe. Ha upéva ndoguerekóigui mba’eve, pe mburuvicha guasu he’i oñeme’ẽ haguã ichupe hepýre tembiguái ramo ambuépe, ta’ýra kuéra ha opa oguerekóva reheve. Péicha omoengovia haguã pe viru oiporu va’ekuére.

Upépe, pe kuimba’e oñesũ huvicha renondépe ha ojerure asy ichupe he’ívo: “Che ruvicha, che ra’arõna. Ame’ẽmba jevýta niko ndéve.” Pe mburuvicha guasu oiporiahuvereko ichupe. Oheja rei ichupe pe viru oiporu va’ekue ha oheja oho.

Pe kuimba’e osẽvo okápe katu, ojuhu peteĩ hapicha oiporu va’ekue ichugui viru sa’imi. Opo voi ijajúrare ojuvy haguãicha ichupe, he’ívo: “Emoengovia chéve pe aiporuka va’ekue ndéve”.

Pe hapicha oñesũ henondépe ha ojerure asy ichupe he’ívo: “Che ra’arõna. Ame’ẽmba jevýta niko ndéve.” Ha’e katu ndoikuaaséi ichugui mba’eve. Omoakãsã ha ombotyka koty ypytũme omoengoviapa peve pe viru oiporu va’ekue. Ohechávo upéva, umi hapicha kuéra ombyasyeterei. Oho hikuái mburuvicha guasu rendápe ha omombe’upa ite ichupe pe ojehu va’ekue.

Upe marõ pe mburuvicha guasu ohenoiuka pe kuimba’épe ha he’i ichupe: “Nde tembiguái ahẽ! Che aheja rei ndéve pe ikatu’ỹ va’ekue remyengovia, rejerurégui chéve. Ha nde reiporiahuvereko va’erã mo’ã avei nde rapichápe, che roiporiahuvereko haguéicha.” Pe mburuvicha guasu ipochy eterei pe kuimba’e ndive. Omoakãsã ha ombotyka koty ypytũme omoengoviapa peve ichupe pe viru ome’ẽ va’ekue ichupe.

Upéi Jesús he’i: Péicha avei che Túva yvágape oĩva ojapóta pende rehe, pende py’a ite guive napeheja reíri ramo pende rapichápe, pe ojapóva pende rehe.

Jesús he’ipa rire ko’ã mba’e, osẽ oho Galiléagui ha oguahẽ Judéape, opytáva kuarahy resẽ gotyo ysyry Jordángui.

Ñandejára Jesucristo Ñe’ẽ.