LECTURAS JUEVES DECIMOSÉPTIMA SEMANA

LECTURAS JUEVES DECIMOSÉPTIMA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 18, 1-6

Tupã Ñandejára oñe’ẽ chéve ha he’i: “Tereho kambuchi apoha rógape ha upépe añe’ẽta ne ndive.” Che, Jeremías, aha ha ajuhu kambuchi apohápe ombojeréva hína ñai’ũ imba’e jerépe. Pe kambuchi ojapóva hína osẽ vai ramo ichupe, pe ñai’ũme voi ojapo jevy ambue, osẽ meve ichupe ha’e oipota háicha.

Upérõ Tupã Ñandejára he’i chéve: Che piko ndaikatúi ajapo pende rehe, Israelgua, pe kambuchi apoha ojapo háicha ñai’ũ rehe? Peẽ hína che pópe ñai’ũicha kambuchi apoha pópe. Che, opa mba’e Jára, upéicha ha’e.

Tupã Ñandejára Ñe’ẽ.

SALMO ÑEMBOHOVÁI 145, 1b-6b

Opavave: Ovy’a va’erã upe ojeroviáva Tupã Ñandejára rehe.

To ñemomba’e guasu Tupã Ñandejára.
Amomba’e guasu Tupã Ñandejárape che py’aite guive,
aikove aja amomba’e guasúta Tupã Ñandejárape,
che rekove pukukue apurahéita Tupã Ñandejárape. O.

Poguasu kuérare ani pejerovia, umíva niko yvypórante
ha ndaikatúi ñane renohẽ jejopy vaígui;
ha’e kuéra omano vove, yvýpe jeýnte oho opa,
ha upe árape opyta rei opa umi mba’e ojaposéva. O.

Ovy’a va’erã upe Jacob Tupã oipytyvõvape,
upe ojeroviáva Tupã Ñandejára rehe.
Ñandejára upe ojapo va’ekue yvága ha yvy, yguasu
ha opa mba’e ipype oĩva. Ha’e niko nopyrũiva iñe’ẽre. O.

ALELUIA Cf. Hech 16,14b

Aleluia.
Tupã Ñandejára, epoko ore korasõre, ikatu haguã rojapyhy nde Ra’y ñe’ẽ.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 13, 47-53

Upe ramo Jesús he’i opavavépe: Ñesãmbyhy Tupã Ñandejáragui oúva niko ojogua avei ku pyaha y guasúpe ojepoívape, ha oitýva opaichagua pira. Henyhẽ vove pirágui, umi pira renohẽhára oguenohẽ y rembe’ýpe ha oguapy upépe oiporavo umi pira. Omoï ajakápe umi iporãvéva ha umi oje’u’ỹva katu omombo.

Péicha avei ojehúta ára pahápe. Tupã Ñandejára remimboukuéra osẽta oipe’a haguã heko vaíva heko potĩva apytégui, oity haguã tatakua hendývape. Upépe ojahe’o ha omopururũta umi hãi. Upéi Jesús oporandu ichupekuéra: Peikuaápa mba’épa he’ise ko’ã mba’e?
Ha’ekuéra he’i ichupe: Roikuaa.

Upéi Jesús he’i ichupekuéra: Peteĩ Moisés rembiapoukapy mbo’eha oñemoarandúva hína ñesãmbyhy Tupãgui oúvape, ojogua ku óga járape oguenohẽva ikarameguãgui mba’e ipyahúva ha itujáva. Jesús omombe’upa rire ko’ã ñe’ẽ mbojoja, osẽ oho upégui.

Ñandejára Jesucristo Ñe’ẽ .