LECTURAS LUNES DÉCIMO NOVENO

LECTURAS LUNES DÉCIMO NOVENO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha 1, 2-5. 24-28c

Che ahecha Tupã Ñandejárape peteĩ jechauka rupi. Upérõ hína ára 5, mes irundyha, áño 30. Mburuvicha guasu Joaquín ojereraha rire Babilóniape ohasáma 5 áño. Tupã Ñandejára omoĩ ipo che ári.

Ahecha ou yvate gotyoguio peteĩ yvytu ratã, peteĩ arai tuichágui osẽ tata ojoguáva ára tirípe ha ijerekuévo oĩ peteĩ mimbi mbarete. Pe tata mbytépe overa peteĩ mba’e ojoguáva ita vera sỹime, ha mbytetépe oĩ irundy tekove yvypórape ojoguáva.

Ha ahendu avei ipepo kuéra ryapu, oho jave tenonderã: ha’ete y okakuaáva ryapu, Tupã Ñandejára ipu’akapáva ñe’ẽicha, yvypora ita térã ñorairõhára aty guasu ryapúicha. Opyta jave, omboguejy ipepo kuéra. Ha osẽ peteĩ tyapu pe mba’e apu’a iñakã ári kuéra oĩvagui.

Upe mba’e apu’a ári ahecha peteĩ mburuvicha guasu guapyha joguaha, ita vera guigua vaicha ha upépe peteĩ ojoguáva yvypórape. Iku’águi yvate gotyo, ahecha overa fiérro isỹi porã vaicha ombojerepáva tata, ha upégui iguy gotyo peteĩ mba’e ojoguáva tata. Ijerekuévo katu omimbipa, ha’ete mba’e karapã jegua araíre osẽva okýrõ.

Péicha ojechauka Tupä Ñandejára reko mimbipa. Ahechávo, ajeity ha amboja che syva yvýre ha ahendu oñe’ẽva.

Tupã Ñandejára Ñe’ẽ.

SALMO ÑEMBOHOVÁI 148, 1-2. 11-14bc

Opavave: To ñemomba’e guasu Tupä Ñandejára.

To ñemomba’e guasu Tupã Ñandejára.
Yvágagui to ñemomba’e guasu
Tupã Ñandejára, amo yvate guive
ichupe to ñemomba’e guasu. O.

To momba’e guasu ichupe hemimboukuéra,
to momba’e guasu ichupe opa tekove yvága pegua.
mayma mburuvicha guasu ha tetãnguéra,
poguasu ha opa mburuvicha yvy arigua. O.

Pemomba’e guasu Tupä Ñandejára réra,
ha’e año ite upe héra tuicha itéva.
Ha’e imimbipápe oĩ yvága ha yvy ári.
Hetã ha’e omombarete va’ekue. O.

Ichupe omomba’e guasu
umi hese ojeroviáva,
Israelgua, umi ha’e ohayhúva,
umíva hetägua hína. O.

ALELUIA Cf. 2Tes 2, 14

Aleluia.
Tupã Ñandejára ñane renói Marandu porã rupi,
jaguereko haguä Ñandejára Jesucristo mimbipa.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 17, 22-27

Upe ramo oiko aja hikuái Galiléa rupi Jesús oñe’ẽ hemimbo’ekuérape kóicha: Che, yvypóraicha aju va’ekue, ha’áta hína yvypóra kuéra pópe. Ha’e kuéra che jukáta, mbohapy ára haguépe katu aikove jevýta.

Kóva ohendúvo, tuicha oñembyasy hikuái.

Jesús ha hemimbo’e kuéra oguahẽ rire táva Cafarnaúmpe, umi viru ombyatýva Tupaópe guarã oho Pedro rendápe ha oporandu ichupe: Pene mbo’ehára piko ome’ẽ oikóvo pe viru tupaópe guarã? Ha Pedro he’i ichupe: Ome’ẽ.

Upéi, Pedro oikévo Jesús rógape, Jesús raẽ imandu’a Pédrope, ha oporandu ichupe: Simón, mba’épa nde ere? Mburuvichakuéra omboaty ramo viru, mávarepa ha’e kuéra omopẽ? Hetãgua kuérarepa térã ambue tetãguáre? Pedro he’i ichupe: Ambue tetãguáre.

Jesús he’i ichupe: Péicharõ niko hetãgua natekotevéi ome’ẽ. Péicharõ jepe, ani haguã ipochy ñane ndive avave, tereho ýpe ha eity ne pinda. Pe pira reikutu raëva jurúpe rejuhúta viru ohupitýva ñande mokõime guarã. Eraha ha eme’ẽ ichupe kuéra upéva.

Ñandejára Jesucristo Ñe’ẽ.