LECTURAS SÁBADO XVIII DEL TIEMPO ORDINARIO

LECTURAS SÁBADO XVIII DEL TIEMPO ORDINARIO

LECTURA PETEÎHA:

Ko’ágã ñahendúta Tupã Ñandejára ñe’ẽ Deuteronomio arandukápe oĩ háicha 6, 4-13

Moisés he’i péicha hetãguápe: Ehendu Israel ñemoñare, Tupã Ñandejára ha’e año iténte hína Tupã. Ehayhu Tupã Ñandejárape nde py’a ite guive, opa nde rekovéreve ha opa ne mbaretekue reheve. Ani nde resarái araka’eve ko’ã tembiapoukapýgui che ame’ẽva ndéve Ko’ágã.

Eheko mbo’e umíva rehe nde ra’y kuérape, ne mandu’a hese manterei ichupe kuéra, nde rógape, tapére, reñeno nguévo ha repu’ã nguévo.

Eñapytĩ umíva nde jyváre ha eraha nde syváre mandu’arã. Ehai umíva nde róga rokẽ horkon rehe ha nde táva kuéra rokẽre. Tupã Ñandejára he’i haguéicha ome’ëvo iñe’ẽ pende ru kuéra ypykuépe Abraham, Isaac ha Jacob, ha’e ome’ẽta peẽme peteï tetã oguerekóva táva tuicha ha iporãva peẽ napemopu’ãi va’ekue.

Hógakuéra henyhẽta opa mba’e porãgui peẽ napemboatýi va’ekue, oguerekóta ykua peẽ ndapejo’ói va’ekue, parral ha olivoty peẽ napeñotỹi va’ekue. Pe’u rire ha pene ryvãtã rire, ani pende resarái Tupä Ñandejára pene renohẽ hague Egíptogui peiko haguépe tembiguái ramo.

Pehayhu Tupã Ñandejárape, pemomba’e guasu chupénte, ha peme’ẽ pene ñe’ẽ hérape añoite.

Tupã Ñandejára Ñe’ẽ.

SALMO ÑEMBOHOVÁI 17, 2-4. 47. 51ab

Opavave: Rohayhu Tupã Ñandejára, nde hína pe che mombaretéva.

Rohayhu Tupã Ñandejára,
nde hína pe che mombaretéva,
Ñandejára che pyendaha,
che mbareteha, che pysyröha. O.

Nde Tupã che Jára reñangareko che rehe,
ne rendápe aguahẽ akañy haguã,
nde reime che jerekuévo,
nde hína pe che renohéva jejopy vaígui. O.

Añembo’e Tupã Ñandejárape, ichupe jaropurahéi va’erã.
Ha’e, che pe’a umi che rayhu’ỹvagui.
Tuicha reipytyvõ mburuvicha remoĩ va’ekuépe,
na nde resaráiri ne rembiporavo pyrégui. O.

ALELUIA MCf. 2Timt 1, 10b

Aleluia.
Ñandejára Jesucristo ore Pysyröhára ipu’aka manóre ha ombojajái pe tekove, Marandu porã rehe ae.
Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 17, 14-20

Upe ramo oguahẽvo hikuái opavave oĩháme, oñemboja Jesús rendápe peteĩ karai, oñesũ henondépe ha he’i ichupe: Karai, eiporiahuvereko mína ko che ra’ýpe. Imba’asy ojopy jave ichupe niko oity jepi ichupe ha upévare oiko asy eterei. Hetáma péicha ho’a tatápe térã ýpe. Agueru kuri ne remimbo’e kuérape, ha ha’e kuéra ndaikatúi omonguera.

Jesús he’i upémarõ: Háa, tekove jerovia’ỹ! Araka’e peve piko aiméta pene ndive, araka’e peve piko aikóta pende reheve? Peru chéve pe mitã rusu.

Upépe Jesús oñe’ẽ hatã pe mba’e pochýpe, ha omosẽ pe mitãgui. Pe mitã okuera upepete.

Upéi umi hemimbo’e kuéra oñe’ẽ Jesús ndive ha’eñoháme, ha oporandu ichupe: Mba’ére piko ndaikatúi ra’e ore romosẽ pe mba’epochy?

Jesús he’i ichupekuéra: Ndapejeroviapáigui Tupãre. Añete ha’e peẽme, pende jerovia michĩ ramo jepe oimeraẽ mba’e ra’ỹi michĩve vaicha, pejéta peteĩ yvytýpe: “Ejei ko’águi. Eva amo”, ha pe yvyty ováta. Oimeraẽ mba’e ikatúne pejapo.

Ñandejára Jesucristo Ñe’ẽ