LECTURAS LUNES DECIMOSÉPTIMA SEMANA

LECTURAS LUNES DECIMOSÉPTIMA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha   13, 1-11

Tupã Ñandejára he’i chéve: “Tereho ejogua peteĩ ku’a jokuaha líno, ejeku’akua pype ha ani remoakÿ.” Ajogua upe ku’a jokuaha Tupã Ñandejára he’i haguéicha chéve ha ajeku’akua pype. Upérõ oñe’ẽ jevy chéve Tupã Ñandejára ha he’i: “Eraha pe ku’a jokuaha rejogua va’ekue  ha rerekóva nde jehe, tereho y Éufratespe ha upépe eñongatu peteĩ itakuápe.” Aha y Éufratespe ha añongatu Tupä Ñandejára he’i haguéicha chéve.

Aremi rire Tupã Ñandjára he’i chéve: “Tereho y Éufratespe ha egueru pe ku’a jokuaha ha’e va’ekue  ndéve reñongatu haguã upépe.” Aha y Éufratespe ha anohẽ yvygýgui pe ku’a jokuaha añongatu haguégui. Ajuhu itujupáma.

Upérõ Tupã Ñandejára oñe’ẽ jevy chéve ha he’i: “Upéicha ite amboaíta Judá ha Jerusalén ojejapo itéva. Ko’ã tetãgua ahẽ ndo japoséi che ñe’ẽ ha akóinte oiko iñakãre. Oho tupã nguéra rapykuéri oiko haguã hembiguái ramo ha omomba’e guasu haguã ichupe kuéra. Opytáta pe ku’a jokuaha oñehundi va’ekuéicha. Pe máva ojeku’a jokua háicha, areko va’ekue  Israel ha Judá guápe che jehe oiko haguã che retãgua ramo, oikuaauka haguã che réra, ha’e haguã che jeroviaha ha che reko mimbipa. Ha nohenduséi che ñe’ẽ.” Che, opa mba’e Jára, upéicha ha’e.

Tupã Ñandejára Ñe’ẽ.

SALMO ÑEMBOHOVÁI Deut 32, 18-21

Opavave: Re’apo’i Tupã Ñandejárape, nde apoharépe.

Re’apo’i mo’ãhárape ne moingo va’ekue ,

reñemboesarái Tupãgui nemoñemoña va’ekue!

Tupä Ñandejára ohecha, ha ipochy rendýpe omosẽ ita’ýra ha itajýrakuérape. O.

Upéma ramo he’i: “Añomíta che rova, jahecha mba’épa oiko ichuguikuéra!

Umíva hína ñemoñare ahẽ, ta’ýra heko jeroviaha’ỹ. O.

Che mohendague tupã’ỹva ndive, che mbopochy rendy ita’ãnga reípe.

Che avei amohendaguéta ichupe kuéra tetã’ỹva ndive,

ambopochy vaíta ichupekuéra tetã ojejapóva ndive. O.

ALELUIA Sant 1, 18

Aleluia.

Ñande Ru niko ñane moingove pyahuse jevy Ñe’ẽ añetéva rupi, oiko hagua ñande hegui opa mba’e ojejapo ypýva.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha     13, 31-35

Upe ramo Jesús omombe’u opavavépe ambue ñe’ẽ mbojoja. He’i ichupekuéra: “Tupã Ñandejára sãmbyhy yvágagui oúva niko ojogua ku mostása ra’ỹime ojereraháva oñeñotỹ kokuépe. Mostása ra’ỹigui michĩvéva niko ndaipóri, ha okakuaa rire ijyvateve opa mba’e kokuépe opu’ãvagui. Yvyra mátaicha ijyvate ha guyra kuéra ou ojaitypo hakãre.”

Jesús omombe’u opavavépe mbuja mbovuha rehegua ñe’ẽ mbojoja. He’i ichupekuéra: “Tupã Ñandejára sãmbyhy yvágagui oúva niko ojogua ku mbuja mbovu háicha peteĩ kuñakarai ombojehe’áva 25 kílo rupi hu’itĩ, ipahápe ombovupáva.”

Jesús oiporu ñe’ẽ mbojoja omombe’u haguã opavavépe ko’ã mba’e. Ha mba’eve nde’íri ichupe kuéra oiporu’ỹre ñe’ẽ mbojoja. Péicha ojapo oiko haguã heko itépe maranduhára he’i va’ekue  ojehutaha he’i ramo:

Añe’ẽta ichupekuéra ñe’ẽ mbojoja rupi amombe’úta ichupekuéra oĩva iñemimby Tupã Ñandejára ojapo ypy guive ko yvy.

Ñandejára Jesucristo Ñe’ẽ.