LECTURAS LUNES TRIGÉSIMA PRIMERA SEMANA

LECTURAS LUNES TRIGÉSIMA PRIMERA SEMANA

Ñahendúta Tupã Ñandejára Ñe’ẽ San Pablo ohai va’ekue Filipos guápe 2, 1-4

Che pehẽnguekuéra: Oimérõ Cristo ome’ẽ ra’e peẽme ipokatu peporo mokyre’ỹ haguã, pe mborayhu pene atõi ramo peporo mbovy’a jevy haguã, opavave pehupity ramo peteĩ Espíritunte, peporo poriahuvereko kuaárõ, pe che moenyhẽna vy’águi peikóvo oñondivepa peteĩ py’ápe, peñe mbojoajúvo oñondive peteĩ mborayhúnte, peteĩ espíritunte ha peteĩ tembipotánte.

Ani pejapo mba’eve peẽ nteségui térã pejejapógui, jejapo’ỹme uvei ha peteĩ teĩ to guereko hapichápe mba’eguasuvérõ guáicha ichugui. Avave to heka’ỹ pe chupénte ou porãva, pe ou porãva hapichakuérape avei katu.

Tupã Ñandejára Ñe’ẽ.

SALMO ÑEMBOHOVÁI 130, 1-3

Opavave: Che Jára, ndaha’éi ku añemo ha’enteséva

Che Jára, ndaha’éi ku añemo ha’enteséva, térã amoĩva che resa mba’e tuichávare.
Ndaha’éi yvate eterei aguahẽséva, térã aipotáva mba’e hendape’ỹ, ndahupitýiva. O.

Che ajoko umi che mba’e pota, ku mitã okambu vaicha aiko py’a guapýpe.
Péicha oĩ che ánga che ryepýpe.
Israel! ejerovia Ñandejára rehe Ko’ágã ha opa ára. O.

ALELUIA Jn 8, 31b.32a

Aleluia.
Ñandejára Jesucristo he’i: “Ndape mboykéi ramo che ñe’ẽ, peikóta añetehápe che remimbo’e ramo ha peikuaáta pe añetegua”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha 14, 1. 12-14

Upe ramo peteĩ pytu’uha árape Ñandejára oho pe kuimba’e ojerure va’ekue ichupe oho haguã okarúvo hógape: Rejapóvo peteĩ jekaru, asaje térã pyhare, ani rejerure oho haguã ne irũ nguérape, térã nde ryvy ha nde ryke’ykuérape, ha opa nde róga guápe ha nde róga ykeregua imba’e retávape. Ha’ekuéra ojeruréne avei ndéve reho haguã, ha upéicha omoengoviáta ndéve hikuái.

Rejapo ramo karu guasu, ejerure uvei oho haguã upe karuhápe umi imboriahúvape, umi oĩmba’ỹva ha iñepãvape, umi ohecha’ỹvape, ha revy’áta. Umíva niko ndaikatu mo’ãi ohepyme’ẽ ndéve. Ndéve katu oñemoengoviáta opavave hekojojáva oikove jevyha árape.

Ñandejára Jesucristo Ñe’ẽ.