LECTURAS MARTES I DE CUARESMA

LECTURA PETEÎHA:

Ko’ágã ñahendúta Tupã Ñandejára ñe’ẽ Isaías arandukápe oĩ háicha   55, 10-11

Péicha he’i Tupã Ñandejára: Ama ha y rypy’a oguejy háicha yvágagui ha ndojevýi, omohe’õ mboyve yvy, heñói haguã mba’e ra’ỹi oñemitÿvape ha oĩ haguã tembi’u okarúvape guarã.

Péichata pe ñe’ẽ osẽva che jurúgui, ndojevy mo’ãi che rendápe, ojapo’ỹre che rembipota, ha oikopa pe che ha’e va’ekue.

Tupã Ñandejára Ñe’ẽ.

SALMO ÑEMBOHOVÁI    33, 4-7. 16-19

Opavave: Oñondive ñamomba’e guasu Tupã Ñandejárape.

Oñondive ñamomba’e guasu Tupã Ñandejárape, héra jaropurahéi oñondivepa.

Tupã Ñandejárape añembo’e, ha’e che rendu, ha oipe’apa che hegui umi mba’e che mongyhyjéva. O.

Umi Tupä Ñandejára rehe ojeroviáva vy’águi ojajaipáne, ha hova noñomi chéne ñemotĩgui.

Che, tekove poriahu, Tupã Ñandejárape añembo’e. Ha’e, che rendu ha che pe’a jejopy vaígui. O.

Tupã Ñandejára oñangareko umi ijohéi pyrévare, ha ohendu umíva ñembo’e.

Heko vaívagui katu ndoikuaaséi mba’eve, umíva opa va’erã tesaráipe. O.

Tupã Ñandejára ohendu umi ijohéi pyréva ñembo’e ha oguenohẽ ichupekuéra upe ojejopy vai hágui. Tupã Ñandejára oñemboja umi ohasa asývare ha oguenohẽ umi ikangypávape jejopy vaígui. O.

VERSÍCULO ANTES DEL EVANGELIO Mt  4, 4b

Yvypóra ndoikovéi mbujape añóre katu opvave Tupã Ñandejára jurúgui osẽva ñe’ẽgui.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 6, 7-15

Upe ramo Jesús he’i hemimbo’ekuérape: Peñembo’e jave ani hetarei  peñe’ẽ, ojapo háicha umi Tupã Ñanejárare ojerovia’ỹva. Ha’e kuéra niko oimo’ã oñe’ẽ heta haguére Tupã Ñandejára ohendutaha ichupekuéra. Ani pejapo ha’ekuéra ojapo háicha.

Pende Ru niko oikuaáma voi pene remikotevẽ, peẽ pejerure mboyve ichupe. Upévare, kóicha peñembo’e va’erã: Ore Ru yvágape reiméva, to ñemomba’e nde réra marangatu.

Eju ore sãmbyhy, to jejapo ne rembipota yvy ári vágape guáicha.

Eme’ẽ oréve ore rembi’urã ko árape guarã.

Eheja rei oréve ore rembiapo vaikue, ore roheja rei háicha opavave ore rehe ojapo vai va’ekuépe. Ani kena rehejátei rojepy’a ra’ã. Ore pe’a uvei ivaívagui.      

Peẽ peheja rei ramo pende rehe ojapo vaívapa, pende Ru yvágape oĩva ohejareíta avei peẽme ivaíva pejapo va’ekue hese. Ndapehejái reíri ramo katu, umi pende rehe ojapo vaíva, pende Ru oĩva yvágape ndoheja rei mo’ãi peẽme pene angaipa.

Ñandejára Jesucristo Ñe’ẽ.