LECTURAS MARTES VIGÉSIMA OCTAVA SEMANA

LECTURAS MARTES VIGÉSIMA OCTAVA SEMANA

Ñahendúta Tupã Ñandejára Ñe’ẽ San Pablo ohai va’ekue Galacia guápe 5, 1-6

Che pehẽnguekuéra: Cristo rupi ñane sãsõ. Aipórõ, peñe mohatãke upe sãsõme ha anive pe’a tembiguái reko, yvyra pohýi guýpe.
Pe che rendu. Che, Pablo, ha’e peẽme, peje api’oukárõ, Cristo ndaha’e mo’ãiha mba’eve peë me guarã. Ha’ese jevy oimeraẽva kuimba’e oje api’oukávape, ojapo va’erãha opa he’íva pe tembiapoukapy.

Peẽ, peipotáva pejerereko hekojojáva ramo pejapo haguére tembiapoukapy he’íva, pejei Crístogui. Pepyta okápe Tupã Ñandejára py’a porãgui.

Ore ramo katu, Espíritu ha ore jerovia rupi roha’arõ Tupã Ñandejára ore mboheko joja. Cristo Jesús rupi niko, ndaha’e véima mba’eve jaje api’ouka ramo térã nahániri. Pe iporãva niko, ñande jerovia ojehechaukáva ñane mborayhúpe.

Tupã Ñandejára Ñe’ẽ.

SALMO ÑEMBOHOVÁI 118, 41. 43-45. 47-48

Opavave: Tupã Ñandejára, che poriahuvereko kena

Tupã Ñandejára, che poriahuvereko kena
ha che renohẽ jejopy vaígui, ere haguéicha.
Ñe’ẽ añete ani reipe’a che jurúgui,
ne rembiapoukapy rehe niko ajeko. O.

Ne rembiapoukapy he’i háicha ite
ajapóta, opa árape upéicha ajapóne.
Mba’evete asy nda che py’apýi
chéne ne rembipota ajapógui. O.

Ne rembiapoukapy ahecha ramo,
ha umíva che mbovy’a.
Tuicha ite amomba’e ne rembiapoukapy,
ha ne rembipota che akãme arekóne. O.

ALELUIA Heb 4, 12
Aleluia.
Ñandejára Jesucristo ñe’ë niko hekove ha ikatupyry, oiporavo umi iporã ha ivaíva oĩva ñane akãme ha umi ñane korasõ rembipota.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Lucas omombe’u háicha 11, 37-41

Upe ramo Jesús oñe’ẽmbávo, peteĩ fariséo he’i ichupe oho haguã okaru hógape. Jesús oho ha oike oguapy mesápe. Upe fariséo ohecha ramo Jesús ndojepohéiriha okaru mboyve.

Jesús katu he’i ichupe: Peẽ fariséo pemopotĩ ijapéguio rei pe jay’uha ha pe ña’ẽmbe, ha pende ryepýpe pene renyhẽ opa pe monda va’ekuégui ha pene ñaña porégui. Pende výro. Ndapeikuaái piko pe ojapo va’ekue ijapere, ojapo hague avei hyepyre? Peme’ẽ pene tupã mba’e pende py’a ite guive, ha upéicharõ opa mba’e ipotĩta.

Ñandejára Jesucristo Ñe’ẽ