LECTURAS MARTES VIGÉSIMO TERCERO SEMANA

LECTURAS MARTES VIGÉSIMO TERCERO SEMANA

LECTURA PETEÎHA:

Ñahendúta Tupã Ñandejára Ñe’ẽ San Pablo ohai va’ekue Corintos guápe      6, 1-11

Che pehẽnguekuéra:

Oime ramo peteĩ peẽva ojoavy hapicha ndive, mba’ére piko ojeruréta omboheko joja haguã ichupe kuéra umi mbojovakehára heko jeroviaha’ỹva, ojerure rangue umi Tupã Ñandejára mba’évape? Ndapeikuaái nga’u piko peẽ, Tupã Ñandejára mba’éva, pembojovake va’erãha yvy ári guápe?

Ha peẽ pembojovake va’erã ramo yvy ári guápe, mba’éicha piko napembojovake kuaa mo’ãi ko’a mba’e michĩva? Ndapeikuaái piko umi Tupã Ñandejára rembiguáipe jepe ñande ñambojovake va’erãha? Ha piko nañambojovake mo’ãi yvy arigua? Aipórõ, oimérõ pejoavyha ko yvy ári guáre, mba’ére piko pemoĩta pene mbojovakeha ramo, umi Tupã Ñandejára rehegua’ỹme?

Kóicha ha’e petĩ haguã: Ndaipóri piko pene pa’ũme peteĩ ikatupyry porãva ohecha va’erã pe mba’e ojehúva oñopehẽngue  apytépe? Ndaha’éi peño rairõnteva oñondive, peẽ oñopehẽngue. Peho katu mbojovakehára heko jeroviaha’ỹva renondépe, ha’e pene mbojovake haguã.

Pejoavy haguérente ojoapytépe, ivai etereíma. Naiporãvéi va’erãpa peropu’aka pe jeiko joja’ỹ? Naiporãvéi va’erãpa peheja ta pene monda? Ha peẽ katu, upéva rangue, napemboheko jojái ha pemotĩ uvei pene pehenguépe voi.

Ndapeikuaái piko peẽ, umi nda hekojojáiva ndaikatu mo’ãiha oike Tupã Ñandejára sãmbyhýpe? Ani peñembotavy, Tupã Ñandejára sãmbyhýpe ndaija mo’ãi umi ojeitýva teko vaípe, umi omomba’éva ta’ãnga rei, umi omoakãratĩva hembirekópe, umi heko kuñáva ha oikóva kuña ramo, umi oikóva omonda, umi hakate’ỹva, umi ika’úva, umi oñe’ẽ reíva hapicháre, umi mondaha. Ha oime va’ekue  pene pa’ũme péichava. Ha ko’ágä  pehupitýma ñemopotĩ, pene marangatúma ha pende rekojojáma, Ñandejára Jesucristo rérape ha Tupã Ñandejára Espíritu rupi.

Tupã Ñandejára Ñe’ẽ.

SALMO ÑEMBOHOVÁI   149, 1-6a. 9b

Opavave: Tupã Ñandejára niko ohayhu hetã guápe.

Pepurahéi Tupã Ñandejárape purahéi pyahu, umi hese ojeroviáva atýpe ichupe to ñemomba’e guasu.

Israelgua to guerohory ijapo harépe, Siongua to guerohory huvicha guasúpe. O.

Héra rehehápe pejeroky, tambor ha árpa púpe ichupe pepurahéi.

Tupã Ñandejára niko ohayhu hetã guápe, imboriahúvape oguenohẽ jejopy vaígui. O.

Ta hory umi hese ojeroviáva héra herakuã porãre.

Ijurúgui ta ñahendu omomba’e guasúrõ Tupã Ñandejárape,

umi hese ojeroviáva kóicha osẽ porãta.

To ñemomba’e guasu Tupã Ñandejára. O.

ALELUIA Cf. Jn 15, 16

Aleluia.

Ñandejára Jesucristo he’i: “Che poiporavo yvypóra apytégui, peho haguä ha heta mba’e porä osë haguä pende hegui

ha umi mba’e porä toiko opa árape”.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha   6, 12-19

Umíva umi árape, Jesús oho peteĩ yvytýpe oñembo’évo, ha pyhare pukukue oñembo’e Tupã Ñandejárape. Ko’ẽ rire ohenói umi hemimbo’épe, ha oiporavo 12 ijapytégui kuéra, ohenóiva apóstol. Umíva va’ekue : Simón, ombohéra va’ekue  avei Pedro; Andrés, Simón ryvy; Santiago, Juan, Felipe, Bartolomé, Mateo, Tomás; Santiago, Alfeo ra’y; Simón, oñembohérava avei “Tetã rayhupára”, Judas, Santiago ra’y; ha Judas Iscariote, pe upéi omoñuhã va’ekue  Jesúspe.

Jesús oguejy upe yvytýgui hemimbo’e kuéra ndive, ha opyta peteĩ ñúme. Oñemboaty ra’e upépe umi hapykuéri oikóva ha heta Judeagua, Jerusalén pegua ha umi Tiro rembe’ýpe oikóva, ha Sidónpe. Oguahë ra’e hikuái ohendúvo Jesúspe, ha ha’eomonguera haguã ichupekuéra imba’asýgui. Umi ipype oguerekóva mba’epochy okuerapa avei. Ha upéicha, opavave opokosénte jepe Jesús rehe, oporomonguerágui pe pokatu osẽva ichugui .

Ñandejára Jesucristo Ñe’ẽ