LECTURAS MARTES VIGÉSIMO

LECTURAS MARTES VIGÉSIMO

LECTURA PETEÎHA:

Ko’ágã ñahendúta Tupã Ñandejára ñe’ẽ Ezequiel arandukápe oĩ háicha   28, 1-10

Tupã Ñandejára ojere ha he’i chéve: “Nde, kuimba’e, ere Tiro pegua mburuvicha guasúpe: Kóicha he’i Tupã Ñandejára: ‘Nde py’apy henyhë jejapógui, ha reimo’ã ndeha Tupã Ñandejára oguapýva tupã nguéra apytépe ha ne mbojereha yguasu.

Nde katu ndaha’éi tupã, yvypórante nde, reimo’ãva ne arandu tupãicha. Ne aranduve nga’u piko Daniélgui?

Oime nga’u piko mba’e jekuaa’ỹ nde reikuaáiva?

Ne arandu ha nde katupyry rehe ae rehupity mba’e reta, ne karameguã kuéra remoenyhẽ óro ha plátagui.

Nde katupyrýgui mba’e ñemúme remboheta hetave rerekóva, ha ne mba’e reta ne mbojejapo.

Upévare Tupã Ñandejára he’i: Reimo’ãgui rerekoha peteĩ tupã arandu, amboúta nde ári ambue tetãguakuéra, umi heko añavéva, oharyvo táva kyse puku ne rãirõ haguã, ndéve, ne porã na he arandu etéva, ha ohejáta ne mimbikue yvýre.

Ne rundíta yvykua pypukúpe ha remano vaíta yguasu mbytépe.

Ha reimo’ãtantepa reína ne aranduha peteĩ tupãicha, reime marõ nde jukaharã renondépe?

Umi nde jukáva pópe yvypóra rei etétante hína nde!

Remanóta ne retãgua’ỹ pópe, omano háicha Tupã Ñandejára rerovia’ýha.

Che, Tupã Ñandejára, añe’ẽma, che ame’ẽma che ñe’ẽ.”

Tupã Ñandejára Ñe’ẽ.

SALMO ÑEMBOHOVÁI Deut 32, 26-28. 30. 35c-36b

Opavave: Ñandejára ojapóta hekojojáva hetã ñemoñarépe

 Ikatu va’erã mo’ã yvy tĩmbo ichuguikuéra ajapo,

ha ahapo’o yvy árigui oikove’ẽ haguã hese kuéra mandu’a. O.

Ha he’i: ‘Ore pyapy mbaretépe rojapo,

ndaha’éi Tupã Ñandejára ojapóva hesekuéra.’

Umi tetã nguéra itavyrai, ndoguerekói iñakãme mba’eve. O.

Mba’éicha piko ikatúta peteĩnte omuña 1.000 kuimba’épe, térã mokõi 10.000 rehe ipu’aka?

Ndohecha kuaái piko. Imo’ãhára hague upe ohejáva

ichupe kuéra, Ijára hague upe ome’ẽva ipópe kuéra? O.

Hi’aguĩma hína ñerundi ára, oguahẽmba itéma pe oha’arõva ichupe kuéra.

Tupã Ñandejára ojapóta hekojojáva hetã ñemoñarépe,

oiporiahuverekóta hembiguáikuérape. O.

ALELUIA 2Cor  8,9

Aleluia.

Ñandejára Jesucristo imba’e retáva ramo jepe ñande rehe hápe oñemomboriahu, ikatu haguäicha ñane momba’e reta imboriahukuépe.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha  19, 23-30

Upe ramo Jesús he’i hemimbo’ekuérape: Añete ha’e peẽme, hasyha umi imba’e retávape oike haguã Tupã Ñandejára sãmbyhýpe. Ha’eve katu peẽme, hasyvéta peteĩ imba’e retávape oike haguã Tupã Ñandejára sãmbyhýpe, peteĩ kavajúgui ohasa rangue ju resa rupi.

Hemimbo’ekuéra ohendúvo upéva omomba’ete, ha he’i ojupe: Máva piko aipórõ ikatúta oñepysyrõ?

Jesús oma’ẽ hesekuéra ha he’i: Yvypóra kuérape guarã upéva ndaikatúi. Tupã Ñandejárape guarã katu ndaipóri mba’eve ikatu’ỹva ojapo.

Upe marõ Pedro he’i ichupe: Ore niko roheja opa mba’e ndéve romoirũ haguã. Mba’éichapa oñemoengoviáta oréve upéva?

Jesús he’i ichupekuéra: Añetehápe ha’e peẽme, oguahẽvo pe ára opa mba’e oñembopyahupa jevývo, che, yvypóraicha aju va’ekue, aguapýta che guapyha omimbipávape. Ha peẽ che moirũ va’ekue, peguapýta avei 12 guapyhápe, pembojovake haguã umi 12 Israelgua ñemoñarépe. Ha opa oheja va’ekuépe hóga térã ityvýra, térã iteindýra, térã itúva, térã isy, térã hembireko, térã ita’ýra, térã ijyvy che rehehápe, pe peteĩ oheja va’ekue  rendaguépe ohupitýta 100. Ha heta umi ko’ágä  itenondéva, itapykuéta. Ha heta umi Ko’ágã itapykuéva, itenondéta.

Ñandejára Jesucristo Ñe’ẽ