LECTURAS LUNES SEMANA XX TO

LECTURAS LUNES SEMANA XX TO

Ko’ágã  ñahendúta Tupã Ñandejára ñe’ẽ Ezequiel arandukápe oĩ háicha  24, 15-24

Tupã Ñandejára he’i chéve: Nde kuimba’e, aipe’áta nde hegui pya’e ha voi, pe nde rehayhuvéva. Ha ani reñembyasy ha ne rasẽ, ha reñohẽ nde resay. Eñembyasy kirirĩháme ha ani reñemboao hũ, ojejapo háicha omanóvare.

Ani reiko akã nandi ha pynandi. Ani remo’ã nde rova rehechaukávo reñembyasyha, ha anítei re’u mbuja, oje’úva péicha jave. Pyhareve añe’ẽ aína che rapicha kuéra ndive ha ka’aru omano che rembireko. Upe riregua ára oúvape, ajapo umi Tupã Ñandejára he’i va’ekue  chéve ajapo haguã.

Upépe umi távagua he’i chéve: Eremína oréve mba’épa he’ise pe rejapóva reína. Che ha’e ichupekuéra: Tupä Ñandejára he’i chéve: Amomarãta che róga, peẽ pema’ẽseteha, pehayhu etéva pende jeroviaháva ha pene mombaretéva. Pende ra’y ha pende rajy peheja va’ekue  Jerusalénpe ojejukapáta.

Ha ere ichupekuéra: Peẽ pejapóta che ajapo haguéicha, napemo’ã kuaa mo’ãi pende rova pehechaukávo mba’e mbyasy, ha ndape’u mo’ãi upe mbuja oje’úva péicha jave.

Ndapeiko mo’ãi akãnandi ha py nandi. Napeñembyasy mo’ãi ha na pene rasẽ mo’ãi. Pene kangypáta pende reko añanguére peñemoĩta pejahe’o joa oñondive. Ezequiel, peẽme guarã peteĩ mba’e rechaukapýta, ha opa mba’e ha’e ojapo va’ekue  peẽ pejapóta. Ágã upéva oikóvo, pehecha kuaáta cheha opa mba’e Jára.

Tupã Ñandejára Ñe’ẽ.

SALMO ÑEMBOHOVÁI     Deut 32, 18-21

Opavave: Reapo’i mo’ãhárape ne moingo va’ekue

Reapo’i mo’ãhárape ne moingo va’ekue ,

reñemboesarái Tupã Ñandejáragui nemoñemoña va’ekue!

Tupä Ñandejára ohecha, ha ipochy rendýpe

omosẽ ita’ýra ha itajýrakuérape. O.

Up e ramo he’i: “Añomíta che rova,

jahecha mba’épa oiko ichugui kuéra!

Umíva hína ñemoñare ahẽ, ta’ýra jeroviaha’ỹ. O.

Che mohendague tupã’ỹva ndive,

che mbopochy rendy ita’ãnga reípe.

Che avei amohendaguéta ichupekuéra tetã’ỹva ndive,

ambopochy vaíta ichupekuéra tetã ojejapóva ndive. O.

ALELUIA Mt 5, 3

Aleluia.

Ovy’a va’erä umi hi’ánga heko mboriahúva,

imba’ekuérarä Tupã Ñandejára sambyhy yvágape.

Aleluia.

EVANGELIO

Marandu porã Ñandejára Jesucristo rekove ha hemimbo’e San Mateo omombe’u háicha 19, 16-22

Upe ramo peteĩ karia’y oguahẽ Jesús rendápe ha oporandu ichupe: Mbo’ehára, mba’e iporãvapa ajapo va’erã ahupity haguã jeikove opave’ỹva?

Jesús he’i ichupe: Mba’éicha rupi piko reporandu chéve mba’épa hína pe iporãva? Tupã Ñandejára rehe añónte niko ikatu ja’e upéva. Ha reikovese ramo, ejapo Tupã Ñandejára rembiapoukapy he’íva.

Pe karia’y he’i ichupe: Mava itévapa?

Ha Jesús he’i ichupe: Ani reporojuka, ani reporomoakã ratĩ, ani remonda, ani eñe’ẽ rei nde rapicháre, emomba’e nde ru ha nde sýpe, ha ehayhu nde rapichápe rejehayhu háicha nde.

Pe karia’y he’i ichupe: Opa umíva niko ajapopáma. Mba’éiko ajapove va’erã?

Jesús he’i ichupe: Nde reko porãse ramo Tupã Ñandejára oipota háicha, tereho eñemumba opa rerekóvare ha eme’ẽ mboriahúpe. Péicharõ rerekóta mba’eta yvágape. Upéi, eju che moirũ.

Pe karia’y ohendúvo upéva, tuicha ñembyasýpe oho, heta mba’e oguerekógui.

Ñandejára Jesucristo Ñe’ẽ.