DOMINGO SEMANA XX TO

LECTURA PETEÏHA:

Ko’ágä ñahendúta Tupä Ñandejára ñe’ẽ Isaías  arandukápe oĩ háicha   56, 1. 6-7

Ñandejára he’i: “Pejapo heko joja ha hekópe guáva.  Oguahẽ mbotáma ára ivaívagui oñesẽ haguã ha teko joja che mba’éva oĩma ojechauka haguãicha.

Ha umi mombyrygua oikóva che rape rupi ojapo haguã che rembipota, che rayhu, ha oiko haguã che rembiguái ramo, omboaje  ha nomomarãi ramo pytu’uha ára ha oñemohatã che ñe’ẽme, arúta ichupekuéra che yvyty marangatúpe ha ambovy’áta che ñembo’e rógape.

Arohorýta che altárpe imymbahapy ha imymbajuka,che róga rehe oje’étagui opa tetãme guarã, ñembo’e róga”.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI            66, 2-3.5-6.8

Opavave:   Maymáva ta ne momba’e guasu, ta ne momba’e guasu maymávaite.

Ñandejárata ñande poriahuvereko, ha ta ñande rovasa, to ma’ẽ  ñande rehe.

Tojekuaa  opa rupi hembipota, ha opa tetã rupi

ha’e oporope’aha jejopy vaígui. O.

To purahéi  vy’a pópe tetãnguéra,

reisambyhýgui opavave teko jojápe,

hekopete emboguata tetãnguéra yvy ári. O.

Ha Ñandejára! Maymáva ta ne momba’e guasu,

ta ne momba’e guasu maymáva.

Ñandejára ta ñande rovasa, ha to ñemomba’e  ichupe ko yvy jerekuévo. O.

LECTURA MOKÖIHA:  

Ñahendúta Tupä Ñandejára Ñe’ẽ San Pablo ohai va’ekue Roma guápe         11, 13-15. 29-32

Che pehengue kuéra: Areko peteï mba’e ha’e va’erã judio’ỹvape. Tupä che moĩ aja pukukue amba’apo haguã judio’ỹva apytépe, arohory eténe ko tembiapo. Aipota umi che retãguáva ipochy pende rehe, ha upéicha aipysyrõ haguã ichupe kuéra. Tupä jejahéi judío kuéra rehe ogueru rire jeiko porã jevy hendive, mba’e nipo ndoguerúi chéne, Tupä oheja jevy ramo oñemoaguĩ hese hikuái: Jeikove jevy umi omano va’ekuépe guarã!

Tupä ome’ẽva ndoipe’ái, ha ndoheja reíri oporohenói ramo. Yma peë na pene ñe’ẽ rendúi va’ekue Tupäme, ha ko’ágã judío kuéra naiñe’ẽ rendúiva, Tupä pende poriahuvereko. Upeichaite avei, ko’ágã naiñe’ẽ rendúi ha’e kuéra, ha upéva Tupä pende poriahuvereko haguãnte, ha ko’ágã avei, oiporiahuvereko haguã ichupe kuéra. Tupä oñapytĩ va’ekue opavavépe iñe’ẽ rendu’ỹ haguã, oiporiahuvereko joja haguã peteïcha opavavépe.

Tupä Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA        Cf. Mt 4, 23

Aleluia.

Jesús oiko yvy Galilea rupi, ha oporombo’e umi judío kuéra tupao rupi. Ha’e omoherakuã marandu porã oñe’ẽva Tupä Ñandejára sãmbyhy  rehe. Hetápe avei omonguera opaichagua mba’asy ha mba’e vaígui.

Aleluia.

EVANGELIO

Marandu porã Ñandejára Hesukrísto rehegua San Mateo omombe’u háicha                                                                                        15, 21-28

Opavave: Romomba’e guasu ndéve, Ñandejára

Upéramo Jesús osẽ Genesarétgui ha oho oiko Tíro ha Sidón jerére. Ha peteĩ kuña Canaangua upe rupi oikóva, oñemboja Jesús rendápe. Osapukái hápe he’i:

—Karai, ndéko hína ku Mesías. Che poriahuverekóna. Che membykuña niko oĩ demóño poguýpe, ha oguereko vai eterei chupe.

Jesús katu nopenái hese. Upémarõ idisípulo kuéra oñemboja hendápe, ha he’i chupe:

—Ehechána mba’épa oipota pe kuña. Osapukái niko oúvo ñande rapykuéri.

Upépe Jesús he’i chupekuéra:

—Tupã niko che mbou Israelguápente. Umíva niko ku ovecha herekua’ỹvaicha oiko.

Upe jave katu pe kuña og̃uahẽ ha oñesũ Jesús renondépe, ha he’i chupe:

—Karai, che pytyvõna.

Jesús he’i chupe:

—Na’iporãi niko jaipe’a mitã jurúgui tembi’u ha ñame’ẽ jaguápe.

Pe kuña katu he’i chupe:

—Añete niko pe eréva. Péicharõ jepe, jaguánte avei niko ho’u pe tembi’u rembyre ho’áva ijára meságui.

Upémarõ Jesús he’i chupe:

—Tuichaite piko rejerovia che rehe. Pévare, toiko ndéve pe rejeruréva.

Upévo okuera imemby kuña.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.