LECTURAS: MIÉRCOLES 1° DURANTE EL AÑO

LECTURAS: MIÉRCOLES 1° DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe                    2, 14-18

Che pehẽngue kuéra: Ta’ýra kuéra ha’e háicha peteĩ to’o ha peteĩ tuguýgui guare, upéicha avei Jesús oiko va’ekue yvypóraicha, ho’o ha huguy reheve, imano rupi ipu’aka haguã Aña, ikatúva oporojukáre. Ha péicha oipysyrõ opa umi oiko va’ekue kyhyje poguýpe oikove aja pukukue.

Añetehápe niko ha’e ndoúi va’ekue oipytyvõvo umi Tupã Ñandejára remimboúpe, ha’e ou oipytyvõ haguã Abraham ñemoñarépe. Upévare, oiko va’erã va’ekue  ipehẽngue kuéraicha opa mba’épe, oiko haguã ichugui  peteĩ Pa’i Guasu heko jeroviaháva ha oporo poriahuvereko kuaáva, omba’apóva Tupã Ñandejárape guarã, ha ojeheja rei haguã yvypórape iñangaipa. Ha ha’e voi ohasa asy ha ojepy’a ra’ã rupi, ko’ágã ikatu oipytyvõ umi ojepy’a ra’ãvape avei.

Tupã Ñandejára Ñe’ẽ.

SALMO ÑEMBOHOVÁI       104, 1-4. 6-9

R. Pemomba’e guasu Ñandejárape, héra pemomba’e.

Opa tetã rupi pemoherakuã umi mba’e hechapyrãva ha’e ojapo va’ekue.

Ichupe peropurahéi ha pemoherakuã

imombe’upyrãva ha’e ojapo va’ekue . R.

Héra marangatu pembotuicha. Tupä Ñandejára rehe ojeroviáva tovy’a.

Peguahẽ Tupä Ñandejára rendápe pytyvõ rekávo.

Opa ára peñemboja hendápe. R.

Peẽ hembiguái kuéra Abraham ñemoñaréva,

peẽ hembiporavo Jacob ra’ykuéra, Tupã niko Ñandejára hína,

ha’e oisãmbyhy ko yvy tuichakue. R.

Ha’e imandu’a mante iñe’ẽ ome’ẽ va’ekuére.

Iñe’ẽ ome’ẽ va’ekuére opa árape guarã.

Ha’ete voi ome’ẽ va’ekue iñe’ẽ Abrahámpe, héra tee rehe ome’ẽ va’ekue iñe’ẽ Isaácpe. R.

ALELUIA Jn 10, 27

Aleluia.

Ñandejára Jesucristo he’i:

“Che ovecha kuéra ohendu che ñe’ë,

Che aikuaa ichupekuéra ha ha’e kuéra oho che rapykuéri”.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 1, 29-39

Upe ramo Jesús oho Santiago ha Juan ndive, Simón ha Andrés rógape. Simón rembireko sy iñakãnundu ha oĩ hupápe. Jesús ohendu upéva, oñemboja ha ipojáivo ipóre omopu’ã ichupe. Upévo opi iñakãnundu ha oñemoĩ ohecha mba’épa ha’ekuéra oikotevẽ.

Ka’aruete, oikévo kuarahy, ogueraha hikuái Jesús rendápe opa hasýva ha oguerekóva mba’epochy, ha opa távagua oñemboaty hokẽme. Jesús omonguera heta hasývape opaichagua mba’asýgui ha omosẽ heta mba’epochy. Ha ndohejái ichupe kuéra oñe’ẽ, ha’e kuéra oikuaágui ichupe

Ko’ẽ mboyve Jesús opu’ã ha osẽ pe távagui, ha oho peteĩ avave oĩ’ỹháme oñembo’e haguã. Simón ha iñirũ nguéra oho Jesús píari, ha ojuhúvo he’i ichupe: Opavave nde reka. Jesús katu he’i ichupe kuéra: Jaha umi hi’aguĩha rupi. Umi rupi avei tekotevẽ amoasãi che Ñe’ẽ, upevarã niko asẽ va’ekue.

Ha upéicha Jesús oiko Galiléa rupi omombe’úvo iñe’ẽ umi judío kuéra tupao rupi, ha omosẽvo mba’epochykuéra.

Ñandejára Jesucristo Ñe’ẽ