LECTURAS: MIÉRCOLES 4º DURANTE EL AÑO

LECTURAS: MIÉRCOLES 4º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe       12, 4-7. 11-15

Che pehẽnguekuéra:

Peẽ niko ne’ĩra gueteri peguahẽ mano meve peñorairõhápe angaipa ndive, ha pende resaráima Tupã Ñandejára oñemoñe’ẽ hague peẽme ta’ýrape ramo guáicha. He’i Ñandejára Ñe’ẽme: “Ani rejahéi, che ra’y, pe Tupã Ñandejára reko mbo’ére, ha ani nde py’a kangy nde ja’o haguére. Tupã Ñandejára niko oheko mbo’e umi ohayhúvape, ha oinupã umi ta’ýraicha oguerekóvape”.

Peẽ niko pehasa asy hína pejeheko mbo’e haguã. Tupã pende rereko ta’ýra ramo guáicha. Oĩ nga’u piko túva oinupã’ỹva ita’ýrape?

Añetehápe niko, mba’eveichagua ñenupã naiporãi pe jahupity jave, hasy katu. Ha jaikuaávo mba’épa he’ise, ogueru ñandéve py’aguapy ha ñane mboheko joja.

Aipórõ ta imbarete jevy pende po ikane’õva ha pene renypy’ã ikangýva, ha peheka tape ivai’ỹva, okuera haguã umi ikarẽva ha ani osẽ tapégui.

Peñeha’ã peiko porã pende rapicha kuéra ndive ha peiko imarangatu vaicha. Cháke marangatu’ỹre avave ndaikatúi chéne ohecha Tupä Ñandejárape. Peñeha’ã opavave to hupity Tupã pytyvõ, ani haguã avavégui oiko ku yvyra rapo iróvaicha, oporombyai ha oporojukáva.

Tupã Ñandejára Ñe’ẽ.

SALMO ÑEMBOHOVÁI         102, 1-2. 13-14. 17- 18a

R. Tupä Ñandejára mborayhu katu ndopái araka’eve

Amomba’e guasu Tupä Ñandejárape che py’a ite guive,

che py’a ite guive amomba’e guasu héra marangatu.

Amomba’e guasu Tupä Ñandejárape che py’a ite guive,

ndache resarái chéne heta mba’e porã ome’ẽ hague chéve. R.

Túva omokunu’ũ háicha ta’ýrakuérape,

upéicha Tupä Ñandejára umi ichupe omomba’éva ndive,

Ha’e oikuaa mba’éguipa ñande apo raka’e, oikuaa porã yvýnteha voi ñande. R.

Tupä Ñandejára mborayhu katu ndopái araka’eve,

ohupity umi ichupe omomba’éva ñemoñarépe, umi ojapóva iñe’ẽ ome’ẽ va’ekue 

ha imandu’áva hembiapoukapýre. R.

ALELUIA  Jn 10, 27

Aleluia.

Ñandejára Jesucristo he’i: Che ovechakuéra ohendu che ñe’ë,

Che aikuaa ichupekuéra ha ha’ekuéra oho che rapykuéri.

Aleluia.

EVANGELIO

Ko’ágä  ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                    6, 1-6

Upe ramo Jesús oho upégui oikove ypy haguépe, ha hemimbo’e kuéra oho hendive. Oguahẽvo pytu’uha ára oñepyrũ oporombo’e judíokuéra tupaópe. Ha heta ohendúva Jesúspe, ijurujái ha oporandu ojupe: Moõgui piko oikuaa kóva heta ite mba’e?

Moõgui piko oguenohẽ imba’ekuaa ha umi mba’e rechapyrã ojapóva? Ndaha’éi piko kóva ku karpintéro, María memby, ha ityvýra kuéra Santiago, José, Judas ha Simón? Ha heindy kuéra nga’u piko ndoikói ñande apytépe?

Ha ndojeroviái hese hikuái. Jesús katu he’i ichupe kuéra: Opa rupi niko maranduhára kuérape oñembojerovia, hógape ha hogagua apytépe, ha oikove ypy haguépe katu nahániri.

Ndaikatúi ojapo upépe mba’eve hechapyrãva, mbovymi hasývarente omoĩ ipo ha omonguera. Ha ohecha ramo ndojeroviaiha hese hikuái.

Jesús ohóva umi táva aguĩha rupi oporombo’évo.

Ñandejára Jesucristo Ñe’ẽ