LECTURAS: MARTES 4º DURANTE EL AÑO

LECTURAS: MARTES 4º DURANTE EL AÑO

Ñahendúta Tupã Ñandejára Ñe’ẽ  San Pablo ohai va’ekue Hebreos guápe  12, 1- 4

Che pehẽnguekuéra:

Upévare, ñande jarekógui heta yvypórape ñande jerére, ohechauka va’ekue ojeroviaha, jaheja ijyképe opa mba’e ñande jokóva ha angaipa ñanemo apañuáiva, ha jaipykúi py’a mbaretépe tape jarekóva ñane renonderãme.

Ñama’ẽna pe Jesús rehe, ichugui  ou ñandéve pe ñande jerovia ha ha’e pe omoporã añetéva. Jesús ogueropu’aka va’ekue kurusu, otĩ’ỹre omanoha upéicha, oikuaa rupi pe jehasa asy rire oguerekotaha vy’a. Ha ko’ágä  oguapy hína Tupã Ñandejára akatúape.

Aipórõ, pejepy’a mongetami Jesús rekovekuére, heta ite mba’e vai ohupity va’ekue umi angaipa apohágui. Upévare, ani pene kane’õ ha pende py’a kangy. Peẽ niko ne’ĩra gueteri peguahẽ mano meve peñorairõhápe angaipa ndive,

Tupã Ñandejára Ñe’ẽ.

SALMO ÑEMBOHOVÁI    21, 26b-28. 30abcd. 31b-32

Opavave: Ñandejára rehe ojeroviáva omomba’e guasúne ichupe

Upévare Tupã, romomba’e guasúne aty guasúpe, ha opa nde rehe ojeroviáva rovake

ajapóne umi mba’e ndéve ha’e va’ekue ajapotaha.

Imboriahúva okarúne hyvatã meve. O.

Opa tetã nguéra, ha mayma ko yvy apére oikóva, imandu’áne Tupã Ñandejára rehe, oúne henondépe oñesũ.

To ñesũ henondépe ha to momba’e guasu ichupe umi imba’e retáva. O.

Opavave omanóva okéva yvyguýpe oñesüta henondépe;

umi oho jevýva yvýpe, oñesüta henondépe. O.

Ita’ýra kuéra omomba’e guasúne Tupã Ñandejárape, hese imandu’áne oikove aja pukukue,

umi upe rire guápe avei imandu’áne, Tupã Ñandejára reko joja ha hembiapokuére. O.

ALELUIA         Mt 8,  17

Aleluia.

Cristo omoï ijapére ñande py’a kangykue ha ogueraha avei ñene mba’asy.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 5, 21-43

Upe ramo Jesús oguahẽ jevývo kanóape yguasu mboypýrigui, heta eterei oĩ ijatýva hese, ha ha’e opyta yguasu rembe’ýpe. Upévo, oguahẽ Jairo. Ha’e niko umi judíokuéra tupao pegua ruvicha hína. Ha ohechávo Jesúspe oñesũ henondépe, ha ojerure asy ichupe he’ívo: Che rajy niko omano pota ite. Ejúna emoĩ nde po hi’ári okuera ha oikove haguã.

Jesús oho hendive, ha heta omoirũva ichupekuéra ha ojopypáva ichupe. Umíva apytépe oĩ peteĩ kuña hasýva ojapóma 12 áño huguy mantéva. Heta ohasa asy va’ekue ha oiporupa opa oguerekóva okueraségui, ha ndaipóri pohãnohára ikatúva omonguera ichupe.

Ohendúvo pe Jesús rehe oje’éva, ko kuña omopa’ũ opavave apyte rupi, oñemboja hese hapykuéguio ha opoko ijaóre. Pe kuña niko he’i ipy’apýpe: “Ijao rehénte jepe apokórõ, akueráta.”

Upe vove huguy syry opyta, ha oñandu hetépe okuera hague imba’asýgui. Jesús oñandu osẽ hague ichugui  pokatu, oñembojere oma’ẽ opavavére ha oporandu: Mávapa opoko ra’e che aóre?

Hemimbo’ekuéra he’i ichupe: Rehecháma niko opavave nde jopyha opáguio, ha piko reporandu mávapa opoko nde rehe? Jesús katu akóinte oma’ẽ ijerekuévo, ohecha haguã mávapa opoko hese.

Upérõ pe kuña oryryihápe kyhyjégui, ha oikuaa porãgui upe ojehu va’ekue, oñesũ henondépe ha omombe’upa ichupe. Jesús he’i ichupe: Che rajy, che rehe rejerovia haguére rekuera. Tereho katu rejepy’apy’ỹre. Rekueráma ne mba’asýgui.

Jesús oñe’ẽ jave gueteri hína, oguahẽ peteĩ tembijokuái ha he’i Jáirope: Nde rajy omanóma. Ma’erã piko remoangekoivéta Mbo’ehárape?

Jesús katu ojepy’apy’ỹre pe oje’évare, he’i pe judío kuéra tupao pegua mburuvichápe: Ani rekyhyje. Ejerovia che rehe.

Ha ndohejái avave omoirũ ichupe, Pedro, Santiago ha ityvýra Juánpe añónte. Oguahẽvo Jairo rógape ha ohechávo pe ayvu, tasẽ ha sapukái oikóva, oike ha he’i ichupe kuéra: Mba’ére piko pende ayvu ha pene rasẽ upéicha? Ko mitãkuña niko nomanói, okénte hína.

Ha opukapa hese hikuái. Ha’e katu omosẽ opavavépe, ha oike itúva, isy ha umi imoirũhára ndive upe mitãkuña oĩháme. Ipojái ipóre ha he’i ichupe: Talitá cum (he’iséva: “Mitãkuña, ndéve ha’e, epu’ã.”)

Upe vove pe mitãkuña, oguerekóva 12 áño, opu’ã ha oñemoĩ oguata. Ha opavave ijurujái opytávo. Jesús katu he’i ichupe kuéra ani haguã omombe’u avavetépe, ha he’i oñemongaru haguã upe mitã kuñáme.

Ñandejára Jesucristo Ñe’ẽ