LECTURAS: SÁBADO 3º DURANTE EL AÑO

LECTURAS: SÁBADO 3º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe   11, 1-2. 8-19

Che pehẽnguekuéra:

Jarovia ramo, jaikuaa porã jahupityha katu ete pe ñaha’arõva, he’ise, jarovia añete ramo umi mba’e jahecha’ỹva. Ñande ru ypy kuéra kuépe Tupã Ñandejára ombojerovia va’ekue orovia haguére.

Orovia rupi, Abraham, ohenóivo ichupe Tupã Ñandejára, iñe’ẽ rendu ha osẽ oho haguã pe yvy ichupe ome’ẽtavape. Ha osẽ va’ekue pe oikohágui oikuaa’ỹre mamópa oho. Ha orovia rupi, oiko mombyrygua ramo pe yvy Tupã Ñandejára oikuave’ỹ va’ekuépe ichupe.

Oiko umi óga vakapípe, Isaac ha Jacob oiko haguéicha, ohupity va’ekue avei upe Tupã Ñandejára he’i va’ekue ome’ẽtaha. Orovia rupi, Abraham oha’arõ va’ekue pe táva guasu opa ára guarãva, Tupã Ñandejára omopu’ã va’ekue.

Orovia rupi avei, ndaikatúi ramo jepe Sara imemby ha Abraham ituja etereíma, oñeme’ẽ ichupe mbarete ita’ýra haguã, oguerovia rupi Tupã Ñandejára ojapotaha katu ete he’i haguéicha. Aipórõ Abraham, hi’ára guahẽ aguĩma ramo jepe, ou heta iterei ita’ýra, mbyja oĩ háicha yvate ha yguasu rembe’ýpe yvyku’i, ikatu’ỹ vaicha ojepapa.

Opa ko’ã yvypóra omano ohupity’ỹre umi mba’e Tupã Ñandejára he’i va’ekue ome’ẽtaha.

Ha orovia rupi, ohecha hikuái mombyry guive ha omomaitei, ojehecha kuaávo ha’e kuéra mombyryguaha ohasáva ko yvy ári. Ha umi péicha he’íva, oikuaauka porã oikoha gueteri oheka hikóni hetãrã. Imandu’a rire hikuái pe yvy oheja va’ekue, ikatúnte va’erã mo’ã oho jevy hikuái upépe. Ha ha’ekuéra katu oipota va’ekue peteĩ tetã iporãvéva, he’ise, tetã yvága pegua.

Upévare Tupã Ñandejára notĩri oiko haguã Itupã nguéra ramo. Oguereko niko ichupe kuéra guarã peteĩ táva guasu ombosako’íva. Ojerovia rupi, Abraham, Tupã Ñandejára oipy’a ra’ãvo ichupe, ohupi Isaácpe oikuave’ë haguã pe ta’ýra peteĩmi.

Tupã Ñandejára ome’ẽ rire ramo jepe ichupe iñe’ẽ, he’i ramo “Isaac rupi ne ñemoñaréta.” Abraham niko ohechakuaa Tupã Ñandejára ipu’akaha omoingove jevy haguã omano va’ekuépe. Ha upévare Abraham oguereko jevy ita’ýrape, ha upéva opyta mba’e rechaukaha ramo.

Tupã Ñandejára Ñe’ẽ.

SALMO ÑEMBOHOVÁI Lc 1, 69-75

R. Ñamomba’e guasu Tupã Ñandejárape

Péina ombou ñandéve peteĩ Ipu’akapáva

ñande pysyrõtáva ñane angaipágui, hembiguái David ñemoñare

oñe’ẽ va’ekue imaranduhára juru rupi. R.

Ha’e  ñande pe’ataha umi ñande rehe ija’e’ỹva ha ñande rayhu’ỹva pógui,

oiporiahuverekotaha umi ñande ru ypykuépe

ha ndahesarái mo’ãiha iñe’ẽ me’ẽ marangatúgui. R.

Imandu’a iñe’ẽ me’ẽ ñande ru Abrahámpe:

ohejataha ñandéve jaiko jakyhyje’ỹre,

ñande pe’a ñande rehe ija’e’ỹva poguýgui,

jaiko haguã hembijokuái ramo marangatu ha teko jojápe. R.

ALELUIA     Jn  3, 16

Aleluia.

Tupä Ñandejára ñande rayhu etereígui ome’ë Ta’ýra peteïmi; maymave Ichupe oroviáva oreko Tekove opa ára guaräva.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?                                                    4, 35-41

Upe ramo ka’arúma upe árape, Jesús he’i hemimbo’e kuérape: Jahasa yguasu mboypýri. Ha omondo rire opavavépe, hemimbo’ekuéra ogueraha Jesúspe upe kanóa oĩháme.

Oĩ ave ambue kanóa kuéra omoirũva ichupekuéra. Ha peichaháguinte oñepyrũ oipeju yvytu ne ratãva, ha pe y pochy ho’a pe kanóa ári ha omoenyhẽ ýgui. Jesús katu oke hína upe kanóa ruguáipe, peteĩ akãngyta ári.

Omombáy ha he’i ichupe hikuái: Mbo’ehára, nderehecha kuaái piko ja’yguyha?

Jesús opu’ã, oja’o pe yvytúpe ha he’i pe yguasúpe: Ekirirĩ! Epyta emyi’ỹre!

Ha opi pe yvytu ha oguapy pe y. Upéi Jesús he’i hemimbo’e kuérape: Mba’ére piko peñemondýi? Ne’ĩra gueteri piko pejerovia?

Hemimbo’ekuéra katu okyhyje eterei ha oporandu joa ojupe: Máva piko kóva, yvytu ha yguasu jepe iñe’ẽ rendúva ichupe?

Ñandejára Jesucristo Ñe’ẽ