LECTURAS: VIERNES 3º DURANTE EL AÑO

LECTURAS: VIERNES 3º DURANTE EL AÑO

Ñahendúta Tupã Ñandejára Ñe’ẽ San Pablo ohai va’ekue Hebreos guápe 10, 32-39

Che pehẽnguekuéra: Pene mandu’a yma guarére, pejehesape ypy ramo guare, ha pero pu’aka va’ekue py’ambaretépe jehasa asy oguerúva peẽme. Pejeja’o ha peñenupã va’ekue opavave renondépe, ha upéi avei pemoirũ va’ekue umi péicha ohasa asy ha oñenupãvape.

Peẽ pe poriahuvereko va’ekue umi yvyrakuápe oĩvape, ha vy’ápe avei peheja ojepe’a pende hegui perekóva, peikuaávo yvágape perekoha mba’e iporãvéva opa ára guarãva. Ani pehejátei ikangy pende hegui pende jerovia, upéva hetápe omoengoviáta peẽme.

Peẽ peikotevẽ pene mbarete jehasa asýpe, pejapo haguã Tupã Ñandejára rembipota, ha oñeme’ẽ peẽme upéicharõ pe ha’e he’iva’ekue ome’ẽtaha peẽme. Ñandejára ñe’ẽ niko he’i: “Pya’e, pya’eetéma oúta pe ou va’erã, ndahi’aremo’ãvéima.

Heko jojáva ogueroviávare oikove va’erã, ohórõ hapykuévo katu, ndarohorýichéne.”
Ha ñande ndaha’éi umi ohóva hapykuévo rehegua, ñañenupã haguã. Ñande hína umi osẽva jejopy vaígui jajerovia rupi.

Tupã Ñandejára Ñe’ẽ.

SALMO ÑEMBOHOVÁI 36, 3-6. 23-24. 39-40

R.Tupä Ñandejára oipytyvõ hekopotĩvape

Tupä Ñandejára rehe ejerovia ha ko yvy ári reikóvo
rehupitýne py’aguapy, Ñandejára nde py’a tombovy’a, ha’e ohupityukáne ndéve
opa mba’e nde py’aite guive reipotáva. R.

Tupä Ñandejára pópe emoĩ nde rekove, hese ejerovia, ha ha’e oñangarekóne nde rehe,
kuarahýicha ojajái ne nde reko joja, araícha hesakãne nde reko potĩ. R.

Tupä Ñandejára oisãmbyhy yvypóra rekove,
ha’e omboguata ichupe hapére. Ho’a ramo jepe opu’ã jeýne.
Tupä Ñandejára ipógui omboguatágui. R.

Tupä Ñandejára oipytyvõ heko potĩvape,
hendápe ha’ekuéra oguahẽ kuaa ojejopy vai jave.
Tupä Ñandejára oipe’a ichupekuéra upe jejopy vaígui, ha’ekuéra ojerovia haguére hese. R.

ALELUIA Cf. Mt 11, 25

Aleluia.
Romomba’e guasu che Ru, yvy ha yvága Jára,
reikuaauka hague mba’e guasuete Sambyhy rehegua naiñarandúivape.
Aleluia.

EVANGELIO

Ko’ágä ñahendúta Ñandejára Jesucristo rekove ha hemimbo’e San Marcos omombe’u háicha 4, 26-34

Upe ramo Jesús he’i hemimbo’ekuérape: “Tupã Ñandejára sãmbyhy ojehu, ojehu háicha kuimba’e oñemitỹ va’ekuépe. Ha’e okérõ térã ipáype, pyhare térã arakue, pe mba’era’ÿi heñói ha okakuaa, ha’e oikuaa’ỹre mba’éichapa. Pe yvýgui niko ijehegui voi heñói raẽ upéi hakã ha upéi hi’a. Ha umíva hi’ajúvo omboaty, oguahẽmagui mono’õha ára.”

He’i avei Jesús: Mba’épepa ojogua Tupã Ñandejára sãmbyhy? Mba’épepa ñambojojáta? Ojogua ku mostása ra’ỹime oñeñotỹva. Mostása ra’ỹigui michĩvéva niko ndaipóri. Oñeñotỹvo katu okakuaave opa mba’e kokuépe opu’ãvagui, ha guyrakuéra jepe ou ojaitypo umi hakãre.

Upéicha Jesús omombe’ú vai chupekuéra pe ñe’ẽ heta mbojoja ko’ãichagua rupi, ikatu haguã oike iñakãmenguéra. Ha mba’eve nde’íri ichupekuéra mbojoja oipuru’ỹre. Hemimbo’ekuérape katu omyesakã opa mba’e upe rire.

Ñandejára Jesucristo Ñe’ẽ