LECTURAS MIÉRCOLES DECIMOOCTAVA SEMANA

LECTURAS MIÉRCOLES DECIMOOCTAVA SEMANA

LECTURA PETEÎHA:

Ko’ágã ñahendúta Tupã Ñandejára ñe’ẽ Jeremías arandukápe oĩ háicha 31, 1-7

Tupã Ñandejára he’i: “Upe árape chéta hína opa Israel ñemoñare Tupã, ha ha’ekuérata che retãgua.” Tupã Ñandejára he’i: “Yvy ojeiko’ỹháme che py’a porã va’ekue tetãgua ndive aipe’a va’ekuépe jejukágui.

Israel oheka ramo guare opytu’u haguãme, Che ajechauka va’ekue ichupe mombyry guive. Che rohayhu va’ekue opa árape guarãicha, upévare, akóinte che py’a porã ne ndive. Romoakã rapu’ã jevýta , Israel.

Reju jevýta mba’epu pararã rory reheve rejeroky rorývo. Reñotỹ jevýta parralty Samaría pegua yvy yvatépe, ha umi oñotỹva parral ho’úta hi’a. Oútagui ára umi oma’ẽ mombyrýva osapukáita Efraín yvy yvatépe: ‘Peju jaha Siónpe, Tupã Ñandejára rendápe.’”

Tupã Ñandejára he’i: “Pesapukái rory ha pevy’a Jacob retãre, upe itenondéva opa tetã apytépe. Pemoerakuã porã ichupe ha peje: ‘Tupã Ñandejára oipe’a ivaívagui hetã guápe, Israel rembyrépe.’

Tupã Ñandejára Ñe’ẽ.

SALMO ÑEMBOHOVÁI Jer 31, 10-12b. 13

Opavave: Tupã Ñandejára oñangarekóta ñande rehe ovecha rerekua oñangareko háicha ijovecháre.

Tetãnguéra, pehendu Ñandejára Ñe’ẽ
ha tetã mombyry rupi pemoerakuã:
‘Ñandejára omosarambi va’ekue Israélpe, omboaty jevýta,
ha oikóta ovecha rerekua oñangareko háicha ijovecháre.’ O.

Tupã Ñandejára oguenohẽ haguére hetãgua Jacob,
oipe’a tetã imbaretevéva poguýgui.
Oúta ha vy’águi opurahéita yvyty Siónpe,
Tupã Ñandejára remime’ẽgui henyhẽta. O.

Kuñataĩnguéra ojerokýta vy’a pópe,
ha upéicha avei mitã rusu ha tujami.
Che ambovy’a jevýta ichupekuéra:
ojahe’ohágui ambovy’a jevýta. O.

ALELUIA Lc 7, 16b

Aleluia.
Peteĩ Maranduhára tuicháva osë ñande apytépe ha Tupã Ñandejára ou ohecha hetäguápe.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 15, 21-28

Upe ramo Jesús osẽ Genesarétgui ha oho táva Tiro ha Sidón gotyo. Ha peteĩ kuña Canaangua, upe rupi oikóva, oñemboja Jesús rendápe. Ha osapukái: Che Jára, David ra’y, che poriahuverekomína!

Che memby kuña niko oĩ mba’epochy poguýpe, ha ombohasa asy eterei ichupe. Jesús katu nde’íri ichupe mba’eve.

Upe marõ hemimbo’e kuéra oñemboja hendápe, ha he’i ichupe: Eréna pe kuñáme toho ko’águi. Osapukái niko oúvo ñande rapykuéri.
Upépe Jesús he’i: Tupã Ñandejára niko che mbou umi Israelgua, ovecháicha okañýva rekávonte.

Upe jave katu pe kuña oguahẽ ha oñesũ Jesús renondépe, ha he’i ichupe: Che Jára, che pytyvõmína! Ha Jesús he’i ichupe: Naiporãi niko mitã jurúgui jaipe’a tembi’u ha ñame’ẽ jaguápe.

Pe kuña katu he’i ichupe: Añete niko pe eréva che Jára. Péicharõ jepe, jaguánte avei ho’úva umi tembi’u rembyre ho’áva ijára kuéra meságui.

Upe marõ Jesús he’i ichupe: Nde katu ha’e kuña rejeroviáva che rehe! Toiko upe reipota háicha. Upepete voi okuera pe imemby kuña.

Ñandejára Jesucristo Ñe’ẽ