LECTURAS MIÉRCOLES I DE CUARESMA

LECTURA PETEÎHA:

Ko’ágä   ñahendúta Tupã Ñandejára ñe’ẽ Jonás arandukápe oĩ háicha                                                  3, 1-10

Oñe’ẽ jevy Tupä Ñandejára Jonáspe ha he’i ichupe kóicha:

Tereho upe táva guasu ete Nínive héravape ha eikuaauka ichupekuéra che ñe’ẽ ame’ẽva ndéve. Ha ojapo Jonás Tupä Ñandejára ojerure háicha. Nínive niko peteĩ táva nde tuichapa jepéva mbohapy árape ojeguatáva peteĩ hembe’ýgui ambue hembe’y peve. Ha Jonás oguahẽ upe távape. Upe oguahẽha árape oguata upe távare ha he’i umi upépe guápe: Ko ára guive 40 ára haguépe Nínive oñehundíta.

Umi Ninivegua oguerovia Tupä Ñandejára Ñe’ẽ. Ha ohechauka haguã oñembyasyha hembiapo vaígui, oĩ haguéicha, imboriahúva ha imboriahu’ỹva ndo’uvéi mba’eve ha oñemonde ao vosakuépe. Nínive ruvicha guasu ohendúvo ko’ã mba’e, oheja iguapyha, oipe’a ijehegui ijao jegua, omonde ao vosakue ha oguapy tanimbu apytépe.

Ha ojekuaauka umi Nínive guápe Ñe’ẽ oúva mburuvicha guasu ha umi mburuvicha iguýpe oĩvagui ha he’íva kóicha: “Avave to’u’ỹ mba’eve; opavave Ninivegua ha hymba kuéra anítei ho’u mba’eve térã hoy’u. Opavave to ñemonde ao vosakuépe ha upéicha avei to monde hymbakuéra.

Opavavete to ñembo’e ipy’a ite guive Tupã Ñandejárape ha to heja heko vai ha hembiapo vai. Ikatu mba’e niko upéicha Tupã Ñandejára oheja rei ñandéve ñane rembiapo vaikue, ndaipochyvéi ñane ndive ha nañamanói.” Ha ohecha Tupã Ñandejára umi mba’e Ninivegua ojapóva. Ohecha ohejaha hikuái heko vai. Upévare nohundíri ichupekuéra he’i haguéicha ojapotaha.

Tupã Ñandejára Ñe’ẽ.

SALMO ÑEMBOHOVÁI  50, 3-4. 12-13. 18-19

Opavave: Tupã Ñandejára, embopyahu che rekove

Tupã Ñandejára, che poriahuvereko, nde niko ne mba’e porã.

Che poriahuvereko ha eipe’a che árigui che rembiapo vaikue.

Che johéi porã teko vaígui, che mopotĩ che angaipágui. O.

Tupã Ñandejára, embopyahu che rekove ha ta imara’ỹ, che py’a to ñembopyahu ha ta imbarete.

Anítei che mosẽ ne renondégui, térã reipe’a che hegui nde pytu marangatu. O.

Nderehecha ramói mba’e kuave’ẽ. Ndéve aikuave’ẽ ramo, naiporãi ndéve.

Taikuave’ẽna ndéve ñembyasy ha rasy ñemomichĩ,

upéva katu rehecha ramo Tupã Ñandejára. O.

VERSÍCULO ANTES DEL EVANGELIO Jl 2, 12 -13

Pende py’a ite guive pejevy che rendápe, che, chemba’e porä ha aporoporiahuvereko.

EVANGELIO

Ko’ágã ñahendúta Ñandejára Jesucristo rekove ha hemimbo’e San Lucas omombe’u háicha    11, 29-32

Upe ramo heta hetave ohóvo Jesús rehe oñembojáva, ha ha’e oñepyrũ he’i ichupe kuéra: “Tekove ahẽ ko’agãguánte ojerure ohecha haguã mba’e hechapyrãva. Ndojehechauka mo’ãi peẽme mba’eveichagua mba’e hechapyrãva. Tupã Ñandejára ohechaukáta peẽme maranduhára Jonás rehe ojapo haguéicha. Pe Jonáspe ojehechauka va’ekue niko Nínivepe guarã mba’e hechapyrãva va’ekue.

Upéicha avei che, yvypóraicha aju va’ekue, mba’e hechapyrãva hína opavavépe guarã. Ñembojovakeha árape, oĩmarõ Tupã Ñandejára renondépe yvypóra ko’agãgua, pe mburuvicha guasu kuñáva tetã Sebá pegua, opu’ã va’erã avei mbojovakeha árape, ha pene moĩ vaíta Tupã Ñandejára renondépe pene rembiapo vai haguére.

Ha’e niko mombyry mombyryvégui oho va’ekue ohendu haguã Salomón Ñe’ẽ arandu. Ha che ha’e peẽme, peteĩ mba’e guasuvéva Salomóngui oĩ hína ko’ápe ko’ágã. Umi Ninivegua avei opu’ã va’erã pe ñembojovakeha árape, ojepyguarávo yvypóra rekovekue ko’ágã guápe, pene moĩ vai haguã. Ninivegua niko ojere va’ekue Tupã Ñandejára gotyo ohendúvo Jonás marandu, ha pe ko’ápe oĩva hína mba’e guasuve Jonásgui.”

Ñandejára Jesucristo Ñe’ẽ.