LECTURAS: SÁBADO 5º DURANTE EL AÑO

LECTURAS: SÁBADO 5º DURANTE EL AÑO

Ko’ágã ñahendúta Tupã Ñandejára ñe’ẽ Génesis arandukápe oĩ háicha              3, 9-24

Umi ñande ypykuérakue, Adán ha Éva, ho’u rire upe yva Tupã ndoipotái va’ekue, Tupã Ñandejára ohenói upe kuimba’épe ha oporandu ichupe: Mamo piko reime?

Upe kuimba’e he’i: Ahendu reguata ramo yvaty rupi ha akyhyje ajechágui opívo, upévare akañy.

Tupã Ñandejára oporandu ichupe: Máva piko he’i ndéve nde opivoha? Re’u piko ra’e upe yva ha’e va’ekue ndéve ani haguã re’u?

Upe kuimba’e he’i: Kuña reme’ẽ va’ekue chéve che irũrã, ome’ẽ chéve upe yva ha ha’u.

Tupã Ñandejára oporandu kuñáme: Mba’e piko rejapo?

Ha’e he’i: Mbói che mbotavýgui ha’u.

Upérõ Tupã Ñandejára he’i mbóipe: Rejapo haguére kóva, ne año ite reikóta tymba jaheipýrõ, retyryrýta reikóvo yvýre ha ne ñembyahýi ramo re’úta yvy.

Kuña ndive romoingo vaíta, ha iñemoñare ne ñemoñare ndive.

Kuña ñemoñare ne akãre opyrũta, nde katu reha’ãta reisu’u ipytápe.

Kuñáme he’i kóicha: Nde rye guasu aja heta reiko asýta, ha vaípe rejecháta ne membýta jave.

Ha ne ménare reikotevẽ mantéta, ha opáichavo, ha’e nde rerekóta ipoguýpe.

Ha he’i kuimba’épe: Ne rembirekópe remotenondévo, he’ívo ndéve: “He’úna avei”, chéve che mbotapykue, ha re’u upe yva ha’e va’ekue ndéve ani haguã re’u.

Upévare ko’ágä  yvy ojeharúta. Kane’õme renohẽta ichugui  ne rembi’urã, reikove aja pukukue. Ñuatĩ ha javorái ome’ẽta ndéve ne rembi’urã.

Syva ry’áipe rehupitýne re’u va’erã, oiko jevy peve nde hegui yvy.

Ndéko hína yvýgui guarénte ha yvýpe jevy repa va’erã.

Kuimba’e ombohéra hembirekópe Eva he’iséva sy, opa yvypóra sýgui ha’e.

Tupã Ñandejára ojapo Adán ha hembirekópe ijaorã tymba pirekuégui.

Upéi he’i: “Péina ko’ágä   kuimba’e ñandeichaguáma, oikuaáma iporãva ha ivaíva. Anínte jaheja upeichahágui oipyso ijyva ha ho’u avei upe yva oporomoingove vagui, ha oikove opa ára guarãma.”

Upévare omosẽ ichupe yvaty Edéngui omomba’apo haguã yvýre, Tupã Ñandejára ichupe oguenohẽ haguégui. Omosẽ rire ichupe, omoĩ yvaty Edén renondépe, kuarahy resẽ gotyo, tekove ipepóva ha kyse puku tata joguaha ovava mantéva, omboty haguã yva oporomoingovéva rape.

Tupã Ñandejára Ñe’ẽ.

SALMO ÑEMBOHOVÁI         89, 2-6. 12-13

Opavave: Ñandejára, Nde ha’e pe py’aguapy reme’ëva oréve

Umi yvyty opu’ã mboyve, ko yvy ojejapo mboyve, yma ite guive opa árape guarã,

nde hína Tupã Ñandejára. O.

Nde upe yvypórape remondóva oiko haguã ichugui  yvy

ichupekuéra erévo: “Tapeho jevy yvýpe pepa.”

Mil áño niko ndéve guarã ku ára ohasa va’ekuéicha,

opa jeýmava, térã ku pyhare mbykýicha, pya’e ohasáva. O.

Ku jake ramo guáicha sapy’a ite reraha ichupekuéra,

ku ñana heñói vaicha, ko’ẽ vove.

Mil ary ndéve guarä peteï ára ohasáva, pyhare heñói ha ipoty, ka’aru haviru ha ipiru. O.

Ehechauka oréve ore rekove mbykyha

ikatu haguã ore akã guapy, ore Jára, eju ore rendápe!

Araka’e peve piko reñeha’arõukáta?

Ore poriahuverekóna, ore niko ne rembiguái hína. O.

ALELUIA   Mt 4, 4b

Aleluia.

Yvypóra ndoikovéi mbuja año rehe, opavave ñe’ë rehe uvei osẽva Tupã Ñandejára jurúgui.

Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Marcos omombe’u háicha    8, 1-10

Peteĩ ára ijaty jevy heta eterei ha ndaipóri hi’upyrã, Jesús ohenói hemimbo’ekuérape ha he’i ichupekuéra: Aiporiahuvereko niko ko’ãvape. Ojapóma niko mbohapy ára oĩha ko’ápe che ndive, ha ndo guereko véima mba’eve ho’u va’erã.

Amondo ramo hógape ñembyahýireve, tapére ipy’a mano mba’éne. Oĩ niko mombyrýgui oúva. Hemimbo’e kuéra he’i ichupe: Máva piko ojuhúta tembi’u omongaru haguã opavavépe? Ko’a rupi niko ndaipóri avave oikóva.

Jesús oporandu ichupe kuéra: Mboy mbuja piko pereko?

-7, he’i hikuái.

Upépe Jesús omboguapy yvýpe opavavépe. Ha ojapyhy ipópe umi 7 mbuja ha umi pira, ha oñembo’e Tupã Ñandejárape ohovasa haguã. Upéi oipehe’ã umi mbuja ha ome’ẽ hemimbo’e kuérape, ha ha’e kuéra ome’ẽ opavavépe.

Oguereko avei hikuái mbovymi pira mimi ha umívare avei oñembo’e Tupã Ñandejárape ohovasa haguã, ha he’i oñemboja’o haguã. Ha okaru hikuái hyvatã meve. Ha umi hembývagui omboaty 7 ajaka renyhẽ. Umi okarúva niko amo 4.000 rupi.

Upéi Jesús omondo opavavépe hógape. Ha’e katu ojupi kanóape hemimbo’ekuéra ndive, ha oho Dalmanuta gotyo.

Ñandejára Jesucristo Ñe’ẽ