LECTURAS: VIERNES 5º DURANTE EL AÑO

LECTURAS: VIERNES 5º DURANTE EL AÑO

Ko’ágã  ñahendúta Tupã Ñandejára ñe’ẽ Génesis arandukápe oĩ háicha  3, 1-8

Mbói va’ekue, opa tymba ñumegua Tupã Ñandejára ojapo va’ekuégui, upe oporombotavy kuaavéva. Ha’e he’i kuñáme: Añete piko Tupã Ñandejára he’i peẽme ani haguã pe’u mba’eveichagua yva ko’ápe pegua?

Kuña he’i ichupe: Ikatu ro’u yva ko’ápe pegua, upe yva oĩva mbytépente ndaikatúi ro’u. Tupã Ñandejára he’i oréve ani haguã ro’u ichugui  térã ropokónte jepe hese. Ro’u ramo romanóta.

Mbói he’i ichupe: He’i reíko peẽme. Napemano mo’ãi. Tupã oikuaa porã, pe’u ramo upe yva pejesape’ataha ha peikuaáta iporãva ha ivaíva. Ha peẽta Tupãicha.

Kuña oma’ẽvo upe yva iporã itévare, ojuhu iporã ho’u ha oikuaa haguã opa mba’e. Upérõ oipo’o hi’a ha ho’u. Upéi ome’ẽ iménape ha ha’e avei ho’u. Ho’upa vovénte ojesape’a hikuái ha ojecha opívo. Upévare ojapo hikuái oñemo’ã haguã yvyra roguégui.

Kuimba’e ha kuña ohendu Tupã Ñandejárape oguata ramo hína yvaty rupi ka’aru, yvytu oñepyrũvo oipeju kangy. Ha okañy ichugui  umi yvyra kupépe.

Tupã Ñandejára Ñe’ẽ.

SALMO ÑEMBOHOVÁI          31, 1-2. 5-7

Opavave: Ovy’a upe ojeheja reívape iñangaipa ha umívagui oiko tesarái.

Ovy’a upe ojeheja reívape iñangaipa ha umívagui oiko tesarái.

Ovy’a upe hova mokõi’ỹva, Tupã Ñandejára oheja reívape hembiapo vaikue. O.

Amombe’u ndéve che angaipa, mba’evete namokañýi,

che py’a pýpe arekógui ndéve aikuaaukávo. O.

Umíva nde reheja rei chéve, upévare,

opa nde rojeroviáva, oñembo’éne ndéve ojejopy vai jave.

Umi y ojupi ha ojaho’i ramo opa mba’e, ndohupitýi chéne ichupekuéra. O.

Nde hína pe che rehe reñangarekóva, che pytyvõva ajejopy vai jave.

Vy’ápe che añuãmbáva jejopy vaígui che pe’a jave. O.

ALELUIA      Cf. Hech. 16, 14b

Aleluia.

Tupã Ñandejára eipe’a ore korasõ romoneï hagua nde Ra’y Ñe’ẽ.

Aleluia.

EVANGELIO

Marandu porã ñahendúta Ñandejára Jesucristo rekove ha hemimbo’e San Marcos omombe’u háicha  7, 31-37

Upe ramo Jesús osẽ jevy Tiro retãgui ha ohasávo Sidón rupi oguahẽ Galiléa yguasúpe, Decápolis mbytépe.

Upépe ojereraha hendápe peteĩ ohendu’ỹva ha iñe’ẽ pa’ãvape ha ojerure hikuái ichupe omoĩ haguã ipo hese. Jesús ogueraha ichupe peteĩ ha’eñoháme, omoinge ikuã ijapysápe ha omoĩ hendy ikũare. Upéi oma’ẽvo yvágare hi’ãho ha he’i pe kuimba’épe: “Efata” (he’iséva: “Ejepe’a!”)

Upe vove upe ohendu’ỹva apysa ojepe’a, ojera ikũ ha oñe’ẽ porã. Jesús he’i ichupe kuéra ani haguã he’i avavépe. Ha he’ivérõ jepe, ko’ýte omombe’u hikuái. Ohecha ramo etereígui he’i joa: “Opa mba’e ojapo porã: Ohendu’ỹvape omohendu jevy ha iñe’ẽngúvape omoñe’ẽ!”

Ñandejára Jesucristo Ñe’ẽ