LECTURAS SÁBADO VIGESIMO PRIMERA SEMANA

LECTURAS SÁBADO VIGESIMO PRIMERA SEMANA

PRIMERA LECTURA:

Ñahendúta Tupã Ñandejára Ñe’ẽ San Pablo ohai va’ekue Corintos guápe 1, 26-31

Che pehẽnguekuéra: Pene mandu’áke mba’épa raka’e peẽ Tupã Ñandejára pene renói ramo guare. Yvypóra ohecha háicha mbovy pende apytépe iñarandúva, mburuvicháva, térã umi oñemomba’e va’ekue ñemoñare. Tupã Ñandejára niko, omotĩ umi iñarandúvape, ha oiporavo umi itavýva ramo ojererekóvape. Ha omotĩ haguã umi imbaretévape, oiporavo umi ikangýva ramo ojererekóvape.

Tupã Ñandejára oiporavo umi ojejahéiva ha umi ndaha’éivape mba’eve ko yvy ári, he’ise, umi ndaha’éi etéva mba’eve, ombotapykue haguã umi tuichávape.

Upéicharõ avave ndojejapo mo’ãi Tupã Ñandejára renondépe. Ha Tupã Ñandejára voi katu pene mbojoaju va’ekue Jesucristo rehe, ha ojapo avei Crístogui ñane arandu, ñande reko joja, ñande reko marangatu ha ñañe pysyrõ. Ha upéicha, he’i háicha Tupã Ñandejára Ñe’ẽ: “Oimérõ ojejaposéva, to jejapo Tupã Ñandejára rehe.”

Tupã Ñandejára Ñe’ẽ.

SALMO ÑEMBOHOVÁI 32, 12-13. 18-21

Opavave: Ovy’a upe tetã oguerekóva Tupã Ñandejárape ijára ramo.

Ovy’a upe tetã oguerekóva Tupã Ñandejárape ijára ramo,
upe tetã ha’e oiporavo va’ekue imba’e teerã.
Tupä Ñandejára omaña yvága guive ha opavavépe ohecha.
Ñandejára katu oñangareko umi ichupe omomba’évape. O.

Tupã Ñandejára oma’ë porã umi hese ojeroviávare.
Umívape ha’e ndohejái omano.
Omoingove katu ichupekuéra ñembyahýi guasu ou jave. O.

Tupã Ñandejára rehe ore rojerovia.
Ha’e upe ore pytyvõ ha oñangarekóva ore rehe.
Tupã Ñandejára ore mbopy’a rory ha héra marangatu rehe rojerovia. O.

ALELUIA Jn 13, 34

Aleluia.
Ñandejára Jesucristo he’i: “Che ame’ẽ peẽme tembiapoukapy ipyahúva:
pejoayhúke oñondivepa, Che pohayhu háicha”.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Mateo omombe’u háicha 25, 14-30

Upe ramo Jesús he’i hemimbo’ekuérape: Upe Tupã Ñandejára sãmbyhy yvága pegua kóichata. Oĩ va’ekue peteĩ kuimba’e ohótáva hína tetã mombyrýpe. Ohenói mbohapyve hembiguáipe ha oheja ichupekuéra iviru omomemby haguã ichupe.

Pe iñakã porãvévape oheja hetave ha umi ambuépe katu michĩve. Pe tenonde guápe oheja 5.000 óro pehẽngue , pe ambuépe 2.000 ha pe tapykue guápe katu 1.000. Peteĩ teĩme ome’ẽ upe ikatupyry háicha, ha upéi osẽ oho mombyry.

Upe 5.000 ohupity va’ekue, oho omomba’apo pe iviru ha omomemby 5.000 jevy. Upe 2.000 ohupity va’ekue oho avei omomba’apo pe iviru, ha omomemby jevy 2.000. Upe 1.000 ohupity va’ekue katu, oho oñotỹ pe ijára viru peteĩ yvykuápe.

Ha are rire, ou jevy umi tembiguái jára ha oporandu ichupe kuéra mba’épa ojapo raka’e pe viru ichupe kuéra oheja va’ekuére. Tenondete ou hendápe pe hembiguái oguereko va’ekue 5.000 ha ome’ẽ ijárape.

Upekuévo he’i ichupe: “Che ruvicha, 5.000 niko reheja va’ekue chéve, ha kóina ápe hi’ári 5.000, amomemby va’ekue ndéve.” Ijára he’i ichupe: “Iporã. Nde niko hína mba’apohára ikatupyry ha jeroviaháva. Ha jeroviapópe ikatu haguére aheja nde pópe viru michĩmi, heta iteve ahejáta nde pópe. Eju javy’a chendive.”

Upéi ou pe hembiguái oguereko va’ekue 2.000, ha he’i ijárape: “Che ruvicha, 2.000 niko reheja va’ekue chéve, ha kóina ápe hi’ári 2.000, amomemby va’ekue ndéve.” Ijára he’i ichupe: “Iporã. Nde hína tembiguái ikatupyry ha jeroviaháva. Ha jeroviapópe ikatu haguére aheja nde pópe viru michĩmi, heta iteve ahejáta nde pópe.

Eju javy’a che ndive.” Ha oguahẽvo pe hembiguái oguereko va’ekue 1.000, he’i ijárape: “Che ruvicha, che niko aikuaa nde rejopy etereiha, ha remono’õvaha reñemitỹ’ỹ haguépe, ha rembyatývaha remosarambi’ỹ haguégui. Akyhyjégui nde hegui, aha añotỹ yvy guýpe pe nde viru. Kóina, kóva ne mba’e hína.”

Upépe pe karai he’i ichupe: “Nde tekove ateỹ. Mba’everã niko na ne porãi. Ha reikuaa porã amono’õha añemitỹ’ỹ haguégui, ha amboatyha amosarambi’ỹ haguégui.

Upévare remoĩ va’erã mo’ã che viru ikatuhápe oñemomba’apo. Péicharõ aju jeývo aguenohẽ, imemby va’erã mo’ã chéve michĩmínte jepe ra’e.” Ha he’i umi upépe hendive oĩvape: “Peipe’a ichugui 1.000 oguerekóva ha peme’ẽ pe 5.000 oguerekóvape. Upe oguerekóvape, oñeme’ẽvéta ha hembypáta ichupe.

Upe oguereko’ỹvagui katu, ojepe’áta pe michĩmi oguerekóva jepe, ha mba’evete ndopyta mo’ãi ichupe. Ko tembiguái pituápe katu pemosẽ okápe pytũmbýpe. Ha upépe ojahe’o soróta ha hãi mante opururũta.”

Ñandejára Jesucristo Ñe’ẽ