LECTURAS INOCENTEKUÉRA ÁRA

LECTURAS INOCENTEKUÉRA ÁRA

LECTURA PETEÎHA:

Ñahendúta Tupã Ñandejára Ñe’ẽ San Juan aranduka peteĩhápe oĩ háicha  1,5-2,2

Kóva hína pe ñe’ẽ Jesucrísto  ore mbo’e va’ekue ha amoerakuãva peẽme: Tupã Ñandejára hína tesapehára ha ipype ndaipóri mba’eveichagua pytũ. Ja’e ramo ñaimeha hendive ha jaiko pytũmbýpe, ñande japu ha ndajaikói pe añete ojerure háicha. Ha jaiko ramo tesapeha rendýpe, Tupã Ñandejára oiko háicha tesapeha rendýpe, upéicha ramo ñaime oñondive peteĩ py’ápe, ha ita’ýra Jesús ruguy ñane mopotĩ ñane angaipágui.

Ja’e ramo na ñane angaipaiha, ñañe mbotavy ñande jupe voi, ha ndaipóri ñande pype añete, ha ñañemombe’u ramo ñane angaipágui, ikatu jarovia Tupã Ñandejára, heko jojáva, oheja reitaha ñane angaipa ha ñane mopotĩtaha opa teko añágui, ja’e ramo na ñane angaipaiha, ja’e hína Tupã Ñandejára ijapuha, ha ndajarohorýi añetehápe iñe’ẽ.

Che ra’ykuéra pohayhuetéva: ahai peẽme ko’ã mba’e ani haguã pejapo ivaíva. Opáichavo, jajapo ramo ivaíva, jareko Jesucrístope ojeruréva ñande rehe Itúvape. Ha’e imarangatu. Ha omano va’ekue ojeheja rei haguã ñandéve ñane angaipa, ha nda ha’éi  ñandévente, opa yvypórape avei.

Tupã Ñandejára Ñe’ẽ.

SALMO ÑEMBOHOVÁI   124,2-5. 7b-8

Opavave: Upe ñane pytyvõva niko Tupä Ñandejára.

Tupã Ñandejára noñemoĩri rire ñande yke rehe, yvypórakuéra opu’ã ramo guare 

pýra ite ñane mokõ va’erã mo’ã. O.

Ipochy hendy hague rehe ñane ndive hikuái,

Y ñande aho’ipa va’erã mo’ã, y pochy ñane moñapymi va’erã mo’ã. O.

Upe ñuhã opẽ ha ñande ñasẽ ñakañy joaite.

Upe ñane pytyvõva niko Tupã Ñandejára, yvága ha yvy apohare. O.

ALELUIA

Aleluia.

Ndéve, Tupã Ñandejára romomba’eguasu ha rogueropurahéi, ndéve, Ñandejára, ne momba’eguasu ha

nde gueropurahéi umi ne mborayhúre omanóva.

Aleluia.

EVANGELIO

Marandu porã Ñandejára Jesucrísto  rekove ha hemimbo’e San Mateo omombe’u háicha    2, 13-18

Upe ramo oho rire umi karai arandu, peteĩ Tupã Ñandejára remimbou ojehechauka Josépe iképe, ha he’i ichupe:

Epáy ha epu’ã. Eraha ne ndive pe mitã ha isy, ha pya’e Te reho  Egíptope. Epyta upépe che romomarandu peve. Herodes ohekaukáta hína pe mitã ojuka haguã.

Upévo José opáy. Pe pyharépe voi ogueraha pe mitã ha isy Egíptope. Ha opyta hikuái upépe Herodes omano meve. Péicha ojehu oiko haguã heko itépe upe Tupã Ñandejára he’i va’ekue maranduhára rupi: “Egíptogui ahenói va’ekue che Ra’ýpe”.

Herodes ohecha kuaávo umi karai arandu ombotavy hague ichupe, ipochy eterei. Upéva rehe, ojukaukapaite mitã kuimba’e omboty’ỹva guive mokõi áño, oikóva Belénpe ha ijerekuévo. Umi mitã ojejuka karai arandu kuéra omombe’u hague rehe ichupe mba’e árapepa ohecha ra’e hikuái pe mbyja.

Ha péicha oiko, ojehu haguã heko itépe maranduhára Jeremías omoĩ va’ekue kuatiápe: Oñehendu Ramáme tasẽ ha jahe’o soro. Raquel ojahe’o hína imembykuéra rehe, ha omanomba hague rehe hikuái ndohejái avavépe omoangapyhy ichupe.

Ñandejára Jesucrísto  Ñe’ẽ.