LECTURAS DEDICACIÓN DE LA BASÍLICA DE LETRÁN

LECTURAS DEDICACIÓN DE LA BASÍLICA DE LETRÁN

Ñahendúta Tupã Ñandejára ñe’ẽ Ezequiel arandukápe oĩ háicha 47, 1-2. 8-9. 12

Pe karia’y che reraha jevy upe rire pe tupaópe ojeikehápe. Upépe ahecha pe okẽguy rupi osẽha y, ha osyryha kuarahy resẽvo, oma’ẽha gotyo tupao. Pe y oguejy tupao akatúavo, altar yvy gotyo pegua gotyo. Upéi che renohẽ okápe yvate gotyogua okẽ rupi ha che mbojere ojeikeha okavogua peve, pe opytáva kuarahy resẽvo.

Upépe ahecha y osẽha pe ojeikehagui yvy gotyo. Upépe he’i chéve: “Ko y osyry kuarahy resẽ gotyo ha oguahẽ ysyry Jordán peve, upégui oho oñehẽ yguasu hérava Mar Muértope. Oguahẽvo upépe, pe yguasu nahe’ẽ juky mo’ã véima. Mamo oguahẽháme pe ysyry ikatúta oiko ipype opaichagua pira ha ijere rehe katu opaichagua tymba. Ko y kóva omohe’ẽta y iróva ojuhúva hapépe, ha opáichavo oĩta oikovéva.

Pe ysyry rembe’ýpe opu’ãta opaichagua yvyra hi’áva. Umi yvyra rogue ndo’a mo’ãi araka’eve, ha opa ára hi’áta. Ohasávo mes jepi hi’áta. Opa ára hi’y porãta pe ysyry osẽvagui tupao guive. Yva oĩta oje’u haguã ha yvyra rogue pohãguã”.

Tupã Ñandejára Ñe’ẽ.

SALMO ÑEMBOHOVÁI 45, 2-3. 5-6 8 9

Opavave: Pejúke pehecha Ñandejára rembiapokue.

Tupã ñane mo’ã ha ñane mombarete,
ha’e oñangareko ñande rehe jajejopy vai jave.
Upéva rehe ndajakyhyje mo’ãi, ko yvy oñehundi ramo jepe
ha umi yvyty ho’a ramo yguasu ruguápe. O.

Upe ysyry hakãmbýva ogueru tory Tupä távape,
upe Yvatetegua rekoha marangatúpe.
Tupä oiko ipype, ndo’ái chéne araka’eve.
Ko’ẽ vove ha’e oúne oipytyvõ ichupe. O.

Ñandejára ipu’akapáva oĩ ñane ndive.
Upe ñane mo’ãva hína Jacob Tupã.
Pejúke pehecha Ñandejára rembiapokue.
mba’e hechapyrãva niko ojapo ko yvy ape rehe. O.

Ñahendúta Tupã Ñandejára Ñe’ẽ San Pablo ohai va’ekue ikuatia peteĩháme Corinto guápe 3, 9c-11. 16-17

Che pehenguekuéra: Peẽ niko hína pe ñemitỹ ha pe mba’e apopy Tupä mba’éva. Che niko pe óga apoha ikatupyrýva, Tupã ome’ẽ hague, ipy’a porãgui amoĩ haguã pe óga pyendaguã, ha ambue ou omopu’ã hi’ári. Ha mokõive oma’ẽ porã va’erã mba’éichapa ojapo.

Avave ndaikatu véima omopyenda jevy pe ipyendámava, ha upe pyenda hína Jesucrísto .
Ndapeikuaáinga’u piko peẽ Tupã rogaha, ha Tupã Espíritu oikoha pende pype?
Oime ramo ohundíva Tupã róga, Tupã ohundíta ichupe, Tupã róga imarangatu ha upéva peẽ voi.

Tupä Ñandejára Ñe’ẽ.

ALELUIA 2 Crón 7, 16

Aleluia.
aiporavo niko ha amboyke che mba’erã ko tupao aiko haguã pype opa árape guarã. Añangarekóta ha che mandu’áta hese opa ára.
Aleluia.

EVANGELIO

Marandu porã Ñandejára Jesucrísto rekove ha hemimbo’e San Juan omombe’u háicha 2, 13-22

Hi’aguĩma Páskua arete, ha upéva rehe Jesús oho Jerusalénpe. Tupaópe ojuhu mba’e ñemuhára kuérape oguerekóva novíllo, ovecha ha pykasu oñemu haguã. Ojuhu avei upépe imesakuérape oguapy hína, umi ojoguáva viru tetã ambuegua viru Tupaópe ojeporúvare.

Upéva ohechávo, Jesús ipojái tukumbóre ha upévape omosẽmba Tupaógui opavavépe, ijovecha ha inovíllo kuéra reheve. Umi viru ojoguávagui katu omosarambipa iviru yvy rehe, ha oitypa imesakuéra. Umi pykasúre oñemúvape katu he’i: Penohẽ umíva ko’águi. Che ru rógagui ani pejapo mba’e ñemuha renda.

Upépe hemimbo’e kuéra imandu’a Ñandejára Ñe’ẽme he’iha: “Nde Tupao ahayhúgui tatáicha che rehe okaru”.
18 Umi judío kuéra oporandu ichupe: Mba’épa hechapyrãva rejapóta rehechauka haguã oréve nde ikatuha reju rejapóvo ko’ã mba’e?

Jesús he’i ichupe kuéra: Peitypa ko Tupao, ha mbohapy árape amopu’ã jevýne.

Umi judío he’i ichupe: Ko Tupao oñemopu’ã haguã niko 46 áño oñemba’apo va’ekue, ha piko nde remopu’ã jevýta mbohapy árape?

Jesús oñe’ẽvo tupao rehe, hetére oñe’ẽ hína. Upéva rehe, upe Jesús opu’ã jevývo omanóva apytégui, hemimbo’e kuéra imandu’a upe ha’e he’i va’ekue rehe. Oguerovia hikuái upe Ñandejára he’íva ha upe Jesús he’íva.

Ñandejára Jesucrísto Ñe’ẽ.