LUNES 9º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Pedro ohai va’ekue     1, 2-7

Che Pehẽnguekuéra:

Ajerure Tupã Ñandejárape ha’e pende rovasa haguã ha ome’ẽ haguã peẽme py’aguapy, peikuaágui Tupãme ha Ñandejára Jesucrístope.

Tupã Ñandejára ipokatu rupi niko ome’ẽ ñandéve opa ñane remikotevẽ ha jaikove haguã ha’e oipota háicha. Ha’e oikuaauka ñandéve Cristo, pe ñane renói va’ekue umi mba’e hechapyrãva ha’e ojapo va’ekue rupi. Péicha, ha’e ha ome’ẽ ñandéve umi mba’e tuicha iteha iporã itéva he’i voi va’ekue ome’ẽtaha.

Umíva rupi niko peẽ ikatu pejei pe teko ky’a vaígui ombotujupáva opa mba’e ko yvy ári, ha peju peike Tupã Ñandejára rekópe.

Upévare, pende jerovia reheve peñeha’ã va’erã pende reko potĩ, ha pende reko potĩ reheve peñeha’ã va’erã pene arandu. Arandu reheve peñeha’ã va’erã pene akã guapy, akã guapy reheve peñeha’ã va’erã ani haguã pende pochy rei, ha upéva ári peñeha’ã va’erã peiko Tupã Ñandejára oipota háicha. Peiko ramo Tupã Ñandajára oipota háicha, peñeha’ã va’erã peiko porã opavave ndive, ha upévare  peporohayhu.

Ñandejára Jesucristo Ñe’ẽ.

SALMO ÑEMBOHOVÁI  90, 1-2. 14-16

Opavave: Tupã Ñandejára nde rehénte ajerovia

Upe oikóva upe Yvatetegua ãme, ha oñemoĩva

upe Ipu’akapáva guýpe, he’i Ñandejárape: “Tupã, nde hína upe che mo’ãva,

nde rehe che ajerovia.” O.

“Ha’e oñemoĩgui che pópe anohẽta ichupe jejopy vaígui,

ha’e che kuaágui añangarekóta hese.

Ajapysakáta hese chéve oñembo’évo,

ojejopy vai ramo hendive che aiméta. O.

Ajapysakáta hese chéve oñembo’évo,

ojejopy vai ramo hendive che aiméta.

Amoingove pukúta ichupe ha ovy’áta anohẽvo ichupe jejopy vaígui”. O.

ALELUIA Cf. Ap 1, 5ab

Aleluia.

Ñandejára Jesucristo nde niko hechapyre hekopeguáva; 

pe oikove jevy ypýva omanóva apytégui,

nde ruguy rehe ae.

Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha   12, 1-12

Upérõ Jesús oñe’ẽ umi Moisés rembiapoukapy mbo’eha ha pa’i ruvichakuérape  ñe’ẽ mbojoja rupi. He’i ichupe kuéra: “Peteĩ karai oñotỹuka va’ekue peteĩ parralty ijyvýpe. Omongorapy ha upéi ojapouka oñeñami haguãme  umi parral a. Omopu’ã avei peteĩ óga yvate, upégui oũ haguã omaña oñangarekóva ijyvýre. Upéi katu, oiporuka hepýre mba’apohára kuérape, ha oho mombyry.

Ha oguahẽvo ára parral a ojepo’o haguã, omondo peteĩ hembiguái umi mba’apohára rendápe ogueraha haguã ichupe upe imba’erãva. Ha’ekuéra katu ojeity hi’ári ha oinupã heta rire, omondo po nandi. Upe marõ pe parralty jára omondo ambue hembiguáipe, kóvape katu oñakã joka ha oja’o heta hikuái. Pe karai katu omondo jevy ambuépe, kóvape katu ojuka hikuái.

Upéi omondo hetavépe, ha umívagui oĩ oñenupãva ha oĩ ojejukáva. Opyta gueteri ichupe peteĩ ita’ýra tee, ha’e ohayhu etéva. Ipahápe omondo ichupe, he’ívo ipy’apýpe: ‘Che ra’ýpe niko ojapóta mba’e ramo.’ Umi mba’apohára katu he’i ojupe: ‘Pévape opytapáta hína opa mba’e. Jajuka ha topyta ñandéve ko yvy.’ Ha ojeity hi’ári hikuái, ojuka ichupe ha oguenohẽ pe parraltýgui.

Mba’épa hi’ã peẽme ojapotaha pe yvy jára? Ohóta ojuka umi mba’apohárape ha ome’ẽta iparralty ambuépe. Peẽ niko peikuaa Tupä Ñandejára ñe’ẽ he’iha: Upe ita omboykéva umi óga mopu’ãhára upéva ári ko’ágä   oñemopu’ã. Tupä Ñandejára upéicha ojapo ha ore jurujái rohechávo.”

Ha omoakãsãse hikuái Jesúspe oikuaágui oiporu hague ñe’ẽ mbojoja hese kuéra. Okyhyjénte opavavégui, oguerekógui ichupe hikuái maranduhára ramo.

Ñandejára Jesucristo Ñe’ẽ