SOLEMNIDAD DE LA SANTÍSIMA TRINIDAD

SOLEMNIDAD DE LA SANTÍSIMA TRINIDAD

LECTURA PETEĨHA:

Ko’ágã ñahendúta Tupã Ñandejára ñe’ẽ Éxodo arandukápe oĩ háicha     34, 4b-6.8-9

Ñandejára he’i Moiséspe: ejupi yvytýpe che ta hai ipypekuéra ñe’ẽ umi ita nde rejoka va’ekuépe. Eñembosako’i rejupi haguã ko’ẽ ramo pyhareve Sinaí ru’ãme. Upépe eñemboja che rendápe. Ani ojupítei ne ndive avave, térã ojehecha avave upe yvyty rupi. Ani oĩ avei ovecha térã vaka okarúva yvyty rovái.

Upéma ramo Ñandejára oguejy peteï araípe, opyta upépe hendive ha Moisés ohenói  Ñandejára réra tee.  Ñandejára ohasávo henonde rupi osapukái:

Ñandejára ha’e Tupã oporo mbyasýva ha oporo poriahuverekóva, ipochy kuaa’ỹva, oporo hayhu etéva ha nopyrũiva iñe’ẽngue rehe.

Upépe oñesũ Moisés, omboja isyva yvy rehe, ha he’i: Ha che Jára, añetehápe che ne irũ ramo, eju ore ndive. Añete niko ha’e kuéra oikose iñakã rehénte voi, upéicha ramo jepe, eheja reína oréve ore añangue ha ore angaipa, ha orereko ne mba’e teéva ramo.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI      Dn 3, 52-56

Opavave: Ndéve roguerohory ha romomba’e guasu opa araite.

Ndéve roguerohory Ñandejára, ore rukuéra ypykue Jára

Ndéve romomba’e guasu opa ára.

Roguerohory nde réra marangatu tuichaite, ha romomba’e guasu opa ára. O.

Nde rejererohory nde Tupao marangatu mimbipápe,

reñemomba’e guasu ha reñemomorã opa ára.

Nde rejererohory mburuvicha guasúicha reguapýva,

reñemomba’e guasu ha reñemomorã opa ára. O.

Nde rejerohory rehechagui ipypukuvehápe,

ha reguapy umi ángel kuéra apytépe,

nde rejerohory yvága ha arapýre,

reñemomba’e guasu ha reñemomorã opa ára. O.

LECTURA MOKÕIHA:

Ñahendúta Tupã Ñandejára Ñe’ẽ San Pablo ohai va’ekue ikuatia mokõiháme Corinto guápe     13, 11-13

Che pehẽnguekuéra, tapevy’a joaitékena. Ta pene marangatu, peñomokyre’ỹ, peiko porãmba oñondive ha peikopa py’a guapýpe.

Tupã mborayhu ha ipy’a guapy toĩ pene ndive. Peñomomaitei ha peño’añuã mbarete. Ko’a rupi opa umi Ñandejárare ojeroviáva pene momaitei.

Ñandejára Jesucrísto ta pende rovasa. Tupã mborayhu ta pene añuã, Espíritu Sánto toĩ pene ndive.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

ALELUIA   Cf. Apoc. 1,8

Aleluia.

“Che hína pe iñepyrũ ha pe ipaha”, he’i Ñandejára, Tupã ipu’akapáva,

pe oikovéva, oikove va’ekue ha oikove va’erãva.

Aleluia.

EVANGELIO

Marandu porã Ñandejára Hesukrísto rehegua San Juan omombe’u háicha      3, 16-18

Opavave: Romomba’e guasu ndéve, Ñandejára.

            Uperõ Jesús he’i Nicodémope: – Tupã ohayhu etereígui opa yvypórape, ome’ẽ vaekue Ta’ýra peteĩete, ani haguã omano umi hese ojeroviáva, oikove haguã uvei opa ára. Tupã niko nomboúi Ta’ýra yvy ári ohundi haguã yvypórape. Ombou chupe, ha’e rupi osalva haguã yvypórakuérape.

       Pe ojeroviáva Tupã ra’ýre noñehundíri. Pe ojerovia’ỹva katu oñehundíma, ojerovia’ỹ haguére Tupã ra’ýre.

Ñandejára Jesucrísto  Ñe’ẽ.

Opavave:  Romomba’e guasu ndéve, Ñandejára Hesukrísto.