SÁBADO 8º TIEMPO DURANTE EL AÑO

LECTURA PETEÎHA:

Ñahendúta Tupã Ñandejára Ñe’ẽ San Juda ohai va’ekue        17. 20b-25

Che pehẽnguekuéra:

Che pehẽnguekuéra pohayhúva, pene mandu’áke umi mba’e he’i va’ekue Ñandejára Jesucristo apóstolkuéra. Peẽ katu, che pehẽnguekuéra pohayhúva, peñe mohatãke pende jerovia imarangatu etévape. Peñembo’e ha Espíritu Santo ta pene sãmbyhy. Peiko Tupã Ñandejára mborayhúpe, peha’arõvo pe ára Ñandejára Jesucristo ipy’a poriahuvereko rupi, ome’ẽtaha ñandéve pe jeikove opa’ỹva. Peiporiahuvereko umi ipy’a kangývape.

Peipytyvõ pende rapichápe, peteĩvape peipe’ávo tatágui, ambue ndive katu pende py’a porã, peñe ñangareko jepe ichuguikuéra. Umíva ao kuérare jepe ani pepoko ona’ỹ haguã pende rehe heko ky’akue.

Upe ikatúvape pende joko ani haguã pe’a ivaívape, ha pende reraha teko marã’ỹme ha vy’apópe heko mimbipa renondépe, Tupã Ñandejára ñoite, ñande pe’áva ivaívagui Ñandejára Jesucristo rupi, ichupe guarã teko mimbipa, jererohory, teko mbarete ha pokatu, ko’ágã mboyve, ko’ágã ha opa árape guarã. Amén.

Tupã Ñandejára Ñe’ẽ

SALMO ÑEMBOHOVÁI    62, 2-6

Opavave: Tupã Ñandejára, opa che rekove nde rehe oikotevẽ

Tupã, nde niko che Jára.

Opa rupi roheka che py’a nde hegui amoenyhẽségui.

Opa che rekove niko nde rehe oikotevẽ,

ku yvy ojeiko’ỹha y oikotevẽ háicha. O.

Tupaópe rohechase, nde pu’aka

ha nde reko mimbipa amomba’e haguã.

Ne mborayhu niko tuicha iteve jeikovégui.

Ndéve rogueropurahéine. O.

Aikove aja pukukue romomba’éne.

Ndéve añembo’évo che po ahupíne.

Avy’aiténe apytávo ku so’o kyra ha karaku

ha’u ramo guáicha ha torypápe romomba’e guasúne. O.

ALELUIA Cf. Col 3, 16a. 17c

Aleluia.

Ñandejára Jesucristo ñe’ẽ toiko pende pype opa ite mba’e porä reheve;

peaguyjeve me’ẽvo ichupe ha Tupã ñande Rúpe.

Aleluia.

EVANGELIO

Marandu Ñandejára Jesucristo rekove ha hemimbo’e San Marcos omombe’u háicha 11, 27-33

Upe ramo Jesús omosẽ rire Tupãógui umi oñemúvape ha ohepyme’ẽva opa mba’épe, oho jevy hikuái Jerusalénpe. Oguata aja pe Tupao rupi oguahẽ hendápe pa’i ruvichakuéra, Moisés rembiapoukapy mbo’eha ha moakãhárakuéra. Oporandu ichupe hikuái: Máva piko oheja ndéve rejapo haguã ko’ã mba’e? Máva pokatu rupi reju? Jesús ombohovái ichupekuéra:

Che avei aporandúta peẽme peteĩ mba’e, ha peje ramo chéve, ha’éta peẽme mba’éicha rupípa ajapo ko’ã mba’e. Peje chéve: Máva piko ombou raka’e Juánpe oporomongarai haguã? Tupã Ñandejára térã piko yvypóra?

Ha’e kuéra katu oñepyrũ oñomongeta kyre’ỹ oñondive, ha he’i: “Ja’e ramo Tupã Ñandejára ombou hague ichupe, he’íta ñandéve: ‘Mba’ére ndaperoviái ra’e ichupe?’ Ha ja’e ramo yvypóra hague…”

Okyhyje hikuái opavave opu’ã ramo guarã hesekuéra, ogueroviágui hikuái Juan maranduhára hague. Upévare he’i hikuái Jesúspe: Ndoroikuaái.

Upépe Jesús he’i ichupe kuéra: Upéicharõ, che avei namombe’u mo’ãi peẽme máva pokatu rupípa ajapo ko’ã mba’e.

Ñandejára Jesucristo Ñe’ẽ.