LECTURAS VIERNES 8º TIEMPO DURANTE EL AÑO

LECTURAS VIERNES 8º TIEMPO DURANTE EL AÑO

Ñahendúta Tupã Ñandejára Ñe’ẽ San Pedro ohai va’ekue    4, 7-13

Che pehẽnguekuéra:

Oguahẽma hína ára opa mba’e opa haguã. Upévare, pene akã porãke ha peñembo’e katu ete. Opa mba’e mboyve toĩ mborayhu tuicháva pende apytépe. Pe mborayhúko heta angaipakue oheja rei hína. Peñomoguahẽke ojohógape, pe ñe’ẽ’ỹre avavére. Tupã Ñandejára remime’ẽngue opaichagua pehupityukáke pende rapichápe oñeme’ẽ haguéicha ichupe.

Oimérõ oñemoñe’ẽva, to ñe’ẽ Tupã Ñandejára oñe’ẽ ramo guáicha. Oimérõ hapichápe oipytyvõva, toipytyvõ pe mbarete Tupã Ñandejára ome’ẽ va’ekue ichupe reheve. Opa pejapóva, pejapo Tupã Ñandejára ojererohory haguã Jesucristo rupi, imba’e niko pe ñemomba’e guasu ha pokatu opa ára guarã. Amén.

Che pehẽngue  kuéra ahayhu etéva, aníke pehecha ramo tuicha iterei mba’éva ramo pejejuhuha ñeha’ã ratápe. Upéva rangue, pe vy’a va’erã uvei peime haguére avei Jesucristo jehasa asýpe, pene renyhẽ haguã avei vy’águi, ojehechaukávo heko mimbipa.

Tupã Ñandejára Ñe’ẽ.

SALMO ÑEMBOHOVÁI   95, 10-13

R. Tupã Ñandejára ñande ruvicha guasu hína.

To je’e opa tetã rupi:

“Ñandejára ñande ruvicha guasu hína”.

Hatã omoĩ hendápe ko yvy, ha ndaipóri omongu’éva.

Ha’e oisãmbyhy tekojojápe tetã nguéra. R.

To vy’a yvága ha yvy.

To sununu pe yguasu ha opa ipype oĩva.

To vy’a umi ñu ha opa mba’e ipype oĩva,

vy’águi to sapukái umi yvyra ka’aguy pegua. R.

To jepurahéi Tupä Ñandejára renondépe,

ha’e ou ko yvy oisãmbyhy haguã.

Tekojojápe ko yvy oisãmbyhýta,

ha añetépe tetãnguéra. R.

ALELUIA Cf. Jn 15, 16

Aleluia.

Ñandejára Jesucristo he’i: 

“Che poiporavo yvypóra apytégui,

peho haguä heta mba’e porä osë haguä pende hegui

ha umi mba’e porä opa ára guarä”.

Aleluia.

EVANGELIO

Marandu porä  Ñandejára Jesucristo rekove ha hemimbo’e San Marcos omombe’u háicha                        11, 11-25

Upe ramo Jesús oike Jerusalénpe ha oho Tupaópe. Oma’ẽ opa rupi ha oho Betániape umi 12 hemimbo’e ndive, ka’aru etémagui. Upe ára ambuépe, osévo hikuái Betániagui, Jesús oñandu iñembyahýi. Mombyry guive ohecha peteĩ ígo máta hoguéva, ha oñemboja hese ohecha haguã hi’apa. Ndojuhúi hese hi’aha, hogue mante oĩ hese. Upépe Jesús he’i pe ígo mátape: Avavéke to’uve’ỹ nde’águi araka’eve! Hemimbo’e kuéra ohendu upéva.

Oguahẽ rire hikuái Jerusalénpe, Jesús oike Tupaópe ha omosẽmba upégui umi upépe oñemúvape.

Upépe oĩ umi oñemúva viru Tupaópe oñeme’ë va’erãre ha ome’ẽva ambue tetã megua virúre. Umíva mesa ha’e oitypa yvýre. Umi pykasu mymbajukarã rehe oñemúva renda avei oitypa, ha ndohejái avave ohasa Tupao rupi oguerahávo mba’eve, ha oñemoĩ ombo’e ichupe kuéra he’ívo: Tupä Ñandejára ñe’ë me niko he’i: ‘Che rógare oje’éta, ñembo’ehao’. Peẽ katu pejapo ichugui  mondaha kuára.

Ohendúvo kóva, pa’i ruvicha kuéra ha Moisés rembiapoukapy mbo’eha oñepyrũ oheka mba’éichapa ojukáta Jesúspe, okyhyjégui ichugui, opavave niko oguerohory hemimbo’e. Pyhare oguahẽvo katu, Jesús ha hemimbo’e kuéra osẽ upe távagui.

Pe pyharevépe ohasa hikuái pe ígo ypy rupi, ha ohecha ipiru hague hapo guive. Upérõ Pedro, imandu’ávo pe ojehu va’ekuére, he’i Jesúspe: Mbo’ehára, ema’ẽmi, pe ígo remboharu va’ekue ipiru.

Jesús he’i: Pejerovia Tupã Ñandejárare. Añetehápe ha’e peẽme, oĩrõ he’íva ko yvytýpe: ‘Epu’ã ko’águi ha tereho ejeity yguasúpe’, ha ipy’a mokõi’ỹre ojerovia oikotaha ha’e he’íva, upéicha ojehúta. Upévare ha’e peẽme: ‘Pejerovia ramo Tupã Ñandejárare, opa mba’e pejeruréva pene ñembo’épe oñeme’ẽta peẽme’.

Ha peñembo’érõ peheja rei pende rapichápe, ikatu haguã pende Ru yvágape oĩva oheja reíta avei peẽme pene rembiapo vaikue. Peẽ ndapeheja reíri ramo pende rapichápe, pende Ru yvágape oĩva ndoheja rei mo’ãi avei peẽme pende rembiapo vaikue.

Ñandejára Jesucristo Ñe’ẽ.