LUNES SEMANA XXVI TO

Ko’ágä   ñahendúta Tupã Ñandejára ñe’ẽ Job arandukápe oĩ háicha                              1, 6-22

Peteĩ
oguahẽha árape hína Tupä Ñandejára renondépe hembiguái
kuéra, oguahẽ avei ijapytépe kuéra Tupã Ñandejára rembiguái
oporomombe’úva. Tupä Ñandejára oporandu ichupe: Mamóguipa reju.

Ha upe Tupã Ñandejára
rembiguái oporomombe’úva he’i: Aiko kuri ápe ha pépe yvy tuichakue.

Aipórõ he’i ichupe Tupä
Ñandejára: Rehechápa che rembiguái Jóbpe? Yvy tuichakue ndaipóri ha’eichagua
imarangatu ha ijohéi pyréva, ha oñeha’ãva ani haguã ojapo ivaíva.

Ha Tupã Ñandejára
rembiguái oporomombe’úva ombohovái ichupe: Ndareíri niko ndéve iñe’ẽ
rendu opa ára. Nderehejái avavépe opoko hese, hogaguáre ha umi mba’e reta
oguerekóvare. Nde rehovasa opa mba’e ojapóva, ha ha’e niko hína pe hymba
hetavéva tetã tuichakue.

Eipe’a míntena
ichugui  opa ite mba’e oguerekóva ha
rehecháta mba’éichapa ojahéi nde rehe.

Tupä Ñandejára he’i pe
tembiguái oporomombe’úvape: Ha iporã. Ejapo ejaposéva umi mba’e Job
oguerekóvagui, hesénte ani repoko.

Upépe Tupã Ñandejára
rembiguái oporomombe’úva osẽ oho.

Peteĩ
árape, ta’ýra ha tajýra kuéra ojapo jave peteĩ karu guasu, tyke’ýra
rógape, peteĩ karia’y oguahẽ Job rógape ha he’i
ichupe: Rojoka hína yvy umi guéi reheve, umi vúrro okaru aja pe aguĩha
rupi, peichahágui oguahẽ umi Sabéo, omondapa tymba kuéra ha ojuka kysépe
opavavépe. Che año ite apyta aju haguã romomarandu.

Oñe’ë mbamívo upe
karia’y, oguahẽ ambue he’íva: Aratiri ho’a ha ojukapa ite
ovecha ha iñangarekoha kuérape. Che año ite apyta ha aju romomarandúvo.

Oñe’ẽ mba
upe karia’y ha oguahẽ ambue he’íva: Mbohapy atýra Caldéo osẽ
oréve, omondapa ore hegui kaméllo kuéra ha ojuka opavavépe. Che año ite akañy
ha aju romomarandu.

Oñe’ẽ mbamívo ko karia’y oguahẽ ambue he’íva: Nde ra’y ha nde rajy kuéra ojapo jave peteĩ karu guasu pe nde ra’y ypykue rógape, ou sapy’a yvytu ratã yvy ojeiko’ỹhaguio ha oity hi’ári kuéra pe óga. Omanomba ite hikuái. Che año ite apyta aju haguã romomarandu. Upépe Job opu’ã oñembyasy tuicha ite, omondoro ijao, oñemyakã perõ, ojeity yvýre, ha he’i: Opívo aju va’ekue  ko yvy ári ha opívo asẽ jevýne ichugui.

Tupä Ñandejára ome’ẽmba chéve, ha Tupä Ñandejára oipe’apa jevy che hegui. To ñemomba’e guasu Tupä Ñandejára réra! Ha upéicha, Job ndojapói ivaíva ha noñe’ẽ vaíri Tupã Ñandejára rehe.

Tupã Ñandejára Ñe’ẽ.

SALMO ÑEMBOHOVÁI        16, 1-3b. 6-7

R. Tupä Ñandejára ndéve niko añembo’e ejapysaka kena che rehe ha che rendu.

Tupä Ñandejára,
hendapegua nteko ajerure ndéve.

Ndéve niko rohenói jevy
jevy.

Ehendúkena che ñembo’e,
añeteguánteko ha’e ndéve.

Nde rejapóta che rehe pe hendapete oĩva. R.

Che apytu’ũ
nguápe reike ramo,

pyharekue reju ramo
remaña che rehe,

ha tatápe che py’a ra’ã
ramo,

nde rejuhúi chéne ajapoha ivaíva. R.

Mba’eve hendape’ỹ
nda’éi, che Jára, ndéve niko añembo’e.

Ejapysaka kena che rehe
ha che rendu.

Ehechauka chéve ne
mborayhu.

Nde renohẽ upe nde rehe ojeroviávape ija’e’ỹva po guýgui. R.

ALELUIA Mc 10, 45

Aleluia.

Che yvypóraicha aju va’ekue aikóvo
tembiguai ramo

ha ame’ëvo che rekove mayma yvypóra
rayhupápe.

Aleluia.

EVANGELIO

Ko’ágä  
ñahendúta Ñandejára Jesucristo rekove ha hemimbo’e San Lucas omombe’u
háicha. Pejapysaka porãtapa hese?                                                9, 46-50

Upe ramo Jesús remimbo’ekuéra oñemoĩ he’i ojupe mávapa pe mba’e guasuvéva ijapytépe kuéra. Jesús, ohecha kuaávo mba’épa oguereko hikuái iñakãme, ohenói peteĩ mitãme, omoĩ ijypýpe, ha he’i ichupekuéra:

Che rérape
oguerohorýva ko mitãme, chéve che rerohory, ha oguerohory avei pe che mbou
va’ekuépe. Upévare, pe michĩvéva pende apytépe, upéva hína upe mba’e
guasuvéva.

Juan he’i
ichupe: Mbo’ehára, rohecha kuri peteĩ omosẽva mba’epochy
nde rérape, ha rojoko, ndaha’éigui ore ndivegua.

Ha Jesús
he’i ichupe: Ani pejoko, pe opu’ã’ỹva ñande rehe niko oĩ
ñane ndive.

Ñandejára Jesucristo Ñe’ẽ